Fransız deputat sərsəmləmələrindən qalmır
Hazırda Fransa ermənipərəstliyinin əsas simalarından biri olan ölkə parlamentinin Fransa – Ermənistan dostluq qrupunun rəhbəri Ann-Lorens Petel yenə sərsəmləyib. Onun “Tvitter” paylaşımında iki başlıca məqam var.
Məlumdur ki, Ermənistan hakimiyyətinin, eləcə də onun xaricdəki havadarlarının anti-Azərbaycan təbliğatında mühüm yeri ölkəmizin qeyri-demokratik, avtoritar üsuli-idarəsinə malik məmləkət təqdimatı tutur. Bu fonda Ermənistanın, guya, demokratik olduğu qabardılır, Bakı-İrəvan münasibətləri baxımından birincinin ikinciyə hücumu ritorikası gündəmə gətirilir. Beləliklə, beynəlxalq ictimaiyyətin əsl həqiqətlərdən uzaq tutulması xətti götürülür. Çalışılır ki, xarici aləm Azərbaycana qarşı təzyiq yolunu tutsun. Bir sözlə, tam manipulyativ yanaşma həyata keçirilir. Yanaşmanın adı budur: demokratiyanı diktaturanın hücumundan qorumaq. İndi Ann-Lorens Petelin də sosial şəbəkə hesabında yazdıqlarına da məhz bu “məna yükü” hakim kəsilib.
Fransız xanım parlamentarinin üzərində dayandığı ikinci məsələ budur ki, ermənipərəst dairələr çox tez-tez Azərbaycan tərəfindən “Qarabağın erməni mədəni irsinin məhvi” məsələsini qaldırırlar. Əlbəttə, burada bilinmir ki, söhbət ölkəmizin hansı hərəkətindən gedir. Digər tərəfdən, Qarabağda olan xristian dini məbədləri ermənilərə məxsus deyil. Otuz ilə yaxın davam etmiş işğal dövründə bölgədəki qədim alban məbədləri erməniləşdirilib və hazırda Azərbaycan dövləti məhz bu tendensiyanın izlərini silir, həmin abidələri əvvəlki görkəminə gətirir. Yəni, tarixilik baxımından ölkəmizin gerçəkləşdirdiyində heç bir qüsur yoxdur və məsələ elmi cəhətdən də mübahisələndirilə bilməz.
***
“Qarabağın erməni mədəni irsinin dağıdılması” məsələsində ermənipərəstlərin apardıqları təbliğatdakı haqqında söz açacağımız növbəti motiv çox gülməlidir. Elə Ann-Lorens Petel də məhz gülünc məqamı qabardır. Sən demə, separatçı rejimin “milli assambleyası” adlanan qurumun binası erməni mədəni mirası imiş. Bir neçə ay əvvəldən Azərbaycanın binanı sökməsi xüsusunda hay-küy qaldırılmışdı. İndi isə həmin rejimin Xankəndidə yerləşən “hökumət binası”ndakı təmir işləri eyni mənfur prizmadan qiymətləndirilir. Yəni, həmin binanın üzərində olan qondarma rejimin gerbi sökülüb. Xanım Petelin də narahatlığının səbəbi budur.
Qeyd edək ki, bu ilin martından sabiq separatçı xunta rejiminin Xankəndi şəhərində 1994-cü ildə inşa etdiyi və 2009-cu ildə yenidənqurma işləri apardığı “parlament binası”nın Azərbaycan hökumətinin göstərişinə əsasən sökülməsinə başlanılıb. Üçmərtəbəli, sahəsi 1350 kvadratmetr olan tikilidə qondarma rejimin 33 “deputat”ı fəaliyyət göstərib. “Hökumət binası”na gəlincə, onunla bağlı Prezident İlham Əliyev martın 18-də xalqımıza Novruz bayramı münasibətilə Xankəndidən ünvanladığı təbrik nitqində məlumat vermişdi. Özü də müfəssəl şəkildə. Dövlətimizin başçısı bildirmişdi ki, Xankəndi sovet dövründə Azərbaycan büdcəsi hesabına, Azərbaycan memarları və inşaatçıları tərəfindən inşa edilib: “Bax, arxadakı bina Vilayət Partiya Komitəsinin binası idi. Bu binanın müəllifi Azərbaycan memarı Həsən Məcidov idi. Onun yanındakı bina 1970-ci illərdə inşa edilmişdir, Vilayət İcraiyyə Komitəsinin binası idi. Bu binanın müəllifi Azərbaycan memarı Nəsrullah Kəngərli idi”...
Göründüyü kimi, real faktlar var. Belə olan halda Petel və onun kimilərinin qaldırdıqları vay-şivənin heç bir əhəmiyyəti yoxdur. Ancaq burada qeyd ediləsi bir məqam da var. Hər şeydən əvvəl, Qarabağ Azərbaycanın torpağıdır. Ərazidəki heç bir mədəni irs nümunəsinə qəsb gerçəkləşdirilmir. Ancaq vurğuladıq ki, ermənilər otuz ilə yaxın müddətdə qəsb və vandallıq həyata keçiriblər. Nəinki Qarabağda, eyni zamanda, işğala məruz qoyduqları digər bölgələrimizdə. İkincisi, nə zamandan bir ölkənin ərazisindəki separatçı quruluşda rəmz kimi qiymətləndirilən binalar mədəni irs sayılır?
O da görünür ki, ermənipərəst dairələr üçün beynəlxalq hüquq prinsipləri heç nədir. Həmin prinsiplərə ən aşkar etinasızlığı məhz Fransanın ermənipərəstləri edirlər. Ölkə parlamentinin deputatı və Fransa – Ermənistan dostluq qrupunun sədri Ann-Lorens Petel bu baxımdan daha “irəli getməsi” ilə fərqlənir. Böyük ehtimalla onun yerli erməni lobbi və diaspor təşkilatlarından aldığı maliyyə vəsaitinin miqdarı o qədər çoxdur ki, hər cür cəfəngiyyatı dilə gətirməkdə, yazmaqda çətinlik çəkmir.
Yeri gəlmişkən, xanım Petel ötən ay İrəvana səfəri zamanı da cəfəng fikirləri ilə yadda qalmışdı. O, “Armenpress”ə müsahibəsində demişdi ki, Fransa Ermənistanın müdafiə qabiliyyətini və suverenliyini gücləndirməlidir. Guya, Parisin mövqeyi İrəvanın “təcavüzkar Azərbaycanla” münasibətlərini balanslaşdırmağa hesablanıb. Qızışdırıcı mövqe tutan xanım parlamentari müsahibəsində, həmçinin artıq mövcud olmayan Qarabağ münaqişəsinin həllindən, ölkəsinin bu istiqamətdəki fəaliyyətindən və digər məsələlərdən söz açaraq bildirmişdi ki, “Fransa Azərbaycanın Ermənistana qarşı təcavüzünü dayandırmağa, Bakını Qarabağ ermənilərinin geri qayıtmaları, onların təh-lükəsizliklərinin və rifah hallarının təminatı üçün müvafiq şərait yaratmağa çağırır”.
Petel, eyni zamanda, Fransa Senatının Azərbaycanla bağlı qətnaməsindən söz açmış və vurğulamışdı ki, Qarabağ ermənilərinin geri qayıtma hüquqlarının təminatı, onların təhlükəsizliyi və rifahı naminə çağırış ruhuna malik sənəd Azərbaycanı öz silahlı qüvvələrini Ermənistan ərazisindən çıxarmağı tələb edir. Ən əsası isə o, qətnamədə Bakıya sanksiyaların tətbiqi çağırışının yer aldığını qabartmışdı.
Bəli, Ann-Lorens Petelin bir ay əvvəl Ermənistanı Azərbaycana qarşı yeni müharibəyə sövq edən fikirlər səsləndirməsi fonunda, onun hazırda erməni mədəni mirası məsələsindəki “təəssübkeşliyi” Parisin anti-Azərbaycan, ermənipərəst xəttinin tərkib hissəsidir. Şübhəsiz, bu sayaq gedişlərin heç bir faydası yoxdur. Əksinə, ziyanı var. Çünki belə yanaşmalar Ermənistan iqtidarının, o cümlədən xəstə erməni cəmiyyətinin düşdüyü illüziya bataqlığında daha da çapalamasına yol açır. Bataqlıq da bataqlıqdır və hər çapalama ora düşəni girdabda boğur.
Ə.RÜSTƏMOV
XQ
