İrəvanın “Roma statutu” adlı siyasi avantürası və yeni ideoloji “gedişi”
Fevralın 1-dən Roma Statutunun qüvvəyə minməsi ilə bağlı Ermənistan hakimiyətinin Azərbaycana yönəlik qərəzli və məsuliyyətsiz açıqlamasına qəzetimiz özünün operativ reaksiyasını bildirmişdi. Fəqət, mövzuya yenidən qayıtmağımızı zəruri edən bəzi məqamlar var. Bu məqamlardan ən başlıcası rəsmi İrəvanın Beynəlxalq Cinayət Məhkəməsində qazandığı yeni statusundan yararlanaraq, guya, bu müstəvidə Azərbaycana qarşı bəzi iddiaları qaldıra biləcəyi ehtimalını ictimai rəyə sırımağa çalışmasıdır. Məqsəd isə məhz beynəlxalq ictimai rəy ilə manipulyasiya üzərində qurduğu ideoloji mübarizəsinə təzə nəfəs verməkdir. Əlbəttə, istər 44 günlük müharibənin gedişində, istərsə də postmüharibə dönəmində bütün cəbhələrdə ağır məğlubiyyətə uğramış Ermənistanın diplomatik isteblişmentinin həm yerli ictimaiyyətin, həm də dünya birliyinin gözündə özünü reablitasiya cəhdlərində bulunması başadüşüləndir.
Əgər həqiqətə və reallığa Femidanın bağlı deyil, açıq gözü ilə baxılarsa, əslində, konstitusiyasında qonşu dövlətlərə qarşı ərazi iddiasının yer aldığı Ermənistanın özü müttəhimlər kürsüsünə oturdulmalıdır. 30 il davam edən işğal dövründə Qarabağda və ətraf rayonlarımızda həyata keçirdiyi soyqırımından tutmuş çoxsaylı hərbi cinayətlərə, minlərlə soydaşımızı qətlə yetirdiyinə görə ittihamlar məhz həmin Beynəlxalq Cinayət Məhkəməsinin tribunasından irəli sürülməlidir. Bundan başqa, işğal altında saxladığı onlarca şəhərimizi, minlərlə qəsəbə və kəndimizi xarabazara çevirməsi rəsmi İrəvana xatırladılmalı, buna görə boynuna məsuliyyət yükü qoyulmalı, eyni zamanda, ondan Azərbaycana vurduğu ziyana görə təzminat tələb olunmalıdır.
“Beynəlxalq birliyin Ermənistanın Azərbaycana qarşı təcavüzünün qarşısını ala bilməməsi və 30 ilə yaxın müddətdə ərazilərimizin işğalına son qoyulmaması, Ermənistan tərəfindən kütləvi vəhşiliklər və insanlıq əleyhinə cinayətlər törədilməsinə, Ermənistanın müharibəni qızışdıran bəyanat və hərəkətlərini davam etdirməsinə maneçilik törətməməsi bu ölkədə cəzasızlıq hissinə təkan verib”. Azərbaycan XİN-in hayların baş diplomatı Ararat Mirzoyanın Niderlandda Ermənistanın Beynəlxalq Cinayət Məhkəməsinin Roma Statutuna qoşulmasına həsr olunmuş mərasimdəki çıxışına verdiyi şərhdə belə deyilir. Şərhdə birmənalı şəkildə qeyd olunur ki, Mirzoyanın məlum çıxışı Ermənistanın Roma Statutuna qoşulmasının bu qurumlardan özünün əsassız iddiaları, məkrli hərəkətləri, nifrət təbliğatı, dezinformasiya və beynəlxalq hüququn yanlış təfsiri üçün istifadə etmək cəhdidir.
* * *
“Ermənilər Azərbaycan torpaqlarında cinayətlər törədəndə beynəlxalq təşkilatlarla məsafə saxlayırdılar. Çünki bilirdilər ki, həmin qurumların qarşısında cavab verməli olacaqlar. Necə ki, BMT Təhlükəsizlik Şurasının dörd qətnaməsini heç nə sanırdılar, Baş Assambleyanın qərarlarını veclərinə almırdılar. Avropa Parlamentinin, Avropa Şurasının, İslam Əməkdaşlıq Təşkilatının, eləcə də Qoşulmama Hərəkatının çoxsaylı çağırışlarına da məhəl qoymurdular”.
Mövzu ilə bağlı “XQ”-ya açıqlamasında bu fikirləri xüsusi olaraq vurğulayan Milli Məclisin deputatı, politoloq Rasim Musabəyov rəsmi İrəvanın indiki vəziyyətdə müəyyən beynəlxalq təşkilatlara soxulmaqla onlardan Azərbaycana qarşı istifadə etməyə çalışdığını dedi:
“Hazırda quyruğu qapı arasında qalmış Ernmənistan hakimiyyətinin bu cəhdlərinin heç bir faydası olmayacaq. Heç kəs çörəyi qulağına yemir. İrəvan həmin Beynəlxalq Cinayət Məhkəməsinə üz tutacağı halda, Bakının ermənilərin bizim torpaqlarımızda törətdiyi cinayətlərlə bağlı məhkəməyə onlarla, yüzlərlə fakt və sübutlar təqdim olunacaq. Əgər İrəvan düşünürsə ki, bu yolla Azərbaycana siyasi təzyiq göstərə biləcək, kökündən yanılır. Onlar üz tutduqları beynəlxalq qurumlardan, bu vaxtacan olduğu kimi, yenə də əlləri ətəklərindən uzun qayıdacaqlar. Roma Statunun verdiyi digər imtiyaza gəldikdə isə İrəvanın Rusiya Prezidenti Vladimir Putinin həbsinə qərar verməyə cürəti çatmaz. Moskva lap əvvəldən İrəvanın bu avantürasına kəskin tənqidini açıqladı və indiki vəziyyətdə oradan Ermənistan hakimiyyətinə minnətçi düşənin olmayacağı aydındır”.
Ermənistan XİN başçısı Ararat Mirzoyanın yaramaz və satqın olduğunu Nikol Paşinyanın özünün də yaxşı bildiyinə diqqəti çəkən R.Musabəyov yaxın vaxtlarda onun tutduğu vəzifədən uzaqlaşdırılması ehtimalını da istisna etmədi.
* * *
Rəsmi İrəvan son günlər sərgilədiyi məlum siyasi davranışları ilə Bakı üçün yeni heç nə ortaya qoymur. Bütün müstəvilərdə və platformalarda üstün mövqelərdə olan Azərbaycana hansı cinahdan və kimlərin vasitəsilə zərbə vurmaq barədə baş sındıran Ermənistan hakimiyyətinin sınaqdan çıxardığı yalan, dezinfiormasiya “taktikasından” heç cür irəli gedə bilmədiyi aşkar görünməkdədir. Bu durum təkcə ölkənin siyasi elitasına deyil, eyni zamanda, cəmiyyətin “daxili təzyiqinə” də mənfi təsirini göstərir.
Tanınmış siyasi şərhçi Tofiq Abbasov İrəvanın diplomatik savaşda elementar leksikonunun belə tükəndiyini dilə gətirdi:
“Ermənistan Roma Statutu ilə bağlı böyük bir “spekulyativ” əməliyyata start verib. Biz Hayastan cəmiyyətində siyasi parçalanmaların əlamətlərini görürük. Baş nazir Nikol Paşinyan ictimai rəyi bir tərəfə, spiker Alenm Simonyan başqa tərəfə çəkir. Qərbin məlum institutlarına sıx bağlı olan bədnam xarici işlər naziri Ararat Mirzoyan isə öz oyununu oynayır. Bütün bunların bizə birbaşa təsiri olmasa da, sadəcə kiminlə tərəf müqabili olduğumuzu dəqiq bilməliyik. Digər tərəfdən isə yüksək səlahiyyət sahibi olan erməni siyasi fiqurların fərqli qütblərə bağlılığı hakimiyyətdə, o cümlədən, cəmiyyətdə hərc-mərclik yaratdığı kimi, Azərbaycanla ikitərəfli dialoqda da ikibaşlılıq, anlaşılmazlıq yaradır. Düşünürəm ki, bu mərhələdə tələskənliyə yol verməməliyik. Bizi etmədiyimiz cinayətlərdə suçlamağa cəhdlər edən İrəvan bu zaman ümidlərini beynəlxalq arbitraja bağlayır. Amma bunun nəticəsi olacaqmı? Bu, harada görünüb ki, yalançı, cinayətkar tərəfi haqlı, düzü, qarşı tərəfin əməllərinin qurbanı olanı isə günahkar çıxarsınlar? Bu, mümkün deyil”.
T.Abbasov sözlərinə onu da əlavə etdi ki, erməni tərəfi yaxşı bilir ki, Azərbaycan beynəlxalq Femidanın qarşısında işğalçı və talançı İrəvana qarşı təzminat məsələsini qaldıranda və bu məsələlər məhkəmə araşdırmasına çevriləndə əlləri boş qalacaq: “Özü üçün o arzuolaunmaz perspektivə indidən “dəstəvuz” hazırlamağa girişən İrəvanın nə müşahidə etdiyimiz diplomatik fəaliyyətinin, nə də deyəcəyi sözlərin heç bir əhəmiyyəti olmayacaq. Məhz, bu baxımdan, Azərbaycan ciddi və təkzibolunmaz təminat bazasına malikdir. Bu prosesə peşəkar milli hüquqşünaslarımız və neytral beynəlxalq ekspertlər cəlb olunub. Ermənistanın ötən əsrin 90-cı illərindən başladığı cinayət əməlləri bir-bir araşdırılır və müvafiq hüquqi rəylər hazırlanır”.
* * *
Niderlandda avantürist çıxışı ilə ictimai rəydə “xüsusi effekt” yaratmağa çalışan Ararat Mirzoyanın timsalında anti-Azərbaycan kampaniyasını genişləndirməyə qərar verən İrəvanın, ilk növbədə, özünüqoruma instikti ilə davrandığı şübhə doğurmur. Bu yersiz səylərdən heç bir nəticə hasil olmayacağını təşəbbüskarların özləri də yaxşı bilirlər. Sadəcə, onların bu gün qaldırdıqları hay-küy sabah geri çəkilmək üçün “siyasi sığınacaq nöqtəsi” hazırlamağa xidmət edir. Onların bu müstəvidə də heç bir şansı yoxdur. Bu, sadəcə məğlubiyyətini göz qabağına almış rəqibin düşəcəyi durumda özünə haqq qazandırmaqdan ötrü ətrafını aldatmasına bənzəyir. Amma İrəvanın Femidanın mizan-tərəzisinin gözünü belə avantüralarla əyə biləcəyi inandırıcı deyil. Bu həqiqətin sonda Beynəlxalq Cinayət Məhkəməsinin tribunasından elan olunacağına qətiyyən şübhəniz olmasın.
İmran BƏDİRXANLI
XQ