Paşa ƏMİRCANOV
[email protected]
Belə görünür ki, Ermənistanda Azərbaycan tərəfindən səsləndirilən hər hansı təklif o dəqiqə bomba effekti yaradır. Son vaxtlar bizim politoloqlar, siyasət adamları belə bir fikir ortaya atıblar ki, Ermənistan konstitusiyasında Azərbaycana və Türkiyəyə qarşı ərazi iddiaları olduğundan İrəvan ana yasasına əl gəzdirməli, dəyişiklik etməldir. Bu fikir erməni cəmiyyətini silkələyib. Məsələyə artıq ölkə parlamentinin spikeri Alen Simonyan da münasibət bildirməli olub.
Ermənistan milli assambleyasının sədri də konstitusiyanın dəyişdirilməsinin zəruri olduğunu bəyan edib. O, dünən Çexiya Deputatlar Palatasının sədri Marketa Pekarova Adamova ilə birgə mətbuat konfransında bildirib: “Biz Ermənistanın hara getdiyini, hansı məqsədlər güddüyünü və niyə mövcud olduğunu başa düşməliyik. Ona görəmi ki, biz böyük və kiçik tarixi Ermənistanı bərpa etmişik, yaxud bu, müstəqillik əldə etdiyimiz 21 sentyabra aiddir, yoxsa təhlükəsiz və firavan yaşamalı olan Hayastan vətəndaşlarına aiddir?”
Həmişəki kimi, ikibaşlı, dolaşıq və nəhayət, bir qədər ermənisayağı danışan Simonyan əlavə edib ki, bəzi məsələlər Ermənistan Respublikasının qanunvericiliyində aydın şəkildə əks olunmayıb: “Ermənistan amorf bir şey ola bilməz, bu məsələdə bizimlə heç kim mübahisə edə bilməz. Ermənistan Respublikasının vətəndaşı bilməlidir ki, vətəni haradan başlayır və harada bitir... Bəli, Ermənistan dağları mənim vətənimdir, beşiyimdir, amma mənim Ermənistan Respublikası adlı dövlətim var. 1991-ci ildə konkret sərhədləri ilə müstəqil olmuş, hamımızın vətəndaşı olduğumuz Ermənistan var və bu, bütün sənədlərdə aydın şəkildə əksini tapmalıdır”.
Bütün bu, nağıllardan sonra erməni parlamentinin sədrinə belə bir konkret sual ünvanlanır: “Konstitusiyanın dəyişdirilməsi Azərbaycanın tələbidir, yoxsa danışıqlarla bağlıdır”. Simonyan belə cavab verib: “Mən sizi çağırıram və vurğulamaq istəyirəm ki, gələcəkdə Ermənistan rəsmilərinə oxşar sual verəndə bilin ki, eyni sual olacaq. Azərbaycan Konstitusiyasında və hüquqi aktlarında da əksini tapmalı olan müddəalar var”.
Əslində, bu, təzə məsələ deyil. Hələ 1989-cu il dekabrın 1-də Ermənistan SSR Ali Soveti “Ermənistan SSR və Dağlıq Qarabağın birləşməsi haqqında” qərar qəbul edib. İşğalçı mahiyyət daşıyan bu qərar hazırda da qüvvədə olan Ermənistan konstitusiyasında qalmaqdadır. Belə şəraitdə Ermənistan hakimiyyətinin Azərbaycanın ərazi bütövlüyünü tanıdığını elan etməsi bu ölkədə rəsmi olaraq anti-konstitusion hesab edilə bilər. Bu ölkənin konstitusiyasında Türkiyəyə qarşı da ərazi iddiaları öz əksini tapıb. Hazırkı baş nazir Nikol Paşinyan Azərbaycanın ərazi bütövlüyünü tanıdığını rəsmi şəkildə elan edəndən sonra Ermənistanda belə bir fikir yenidən gündəmə gəlib ki, Ermənistan konstitusiyası, qanunvericiliyi və bütün digər sənədlər dəyişdirilməlidir. 1991-ci ildən sonrakı respublika artıq iflas edib. Ona görə də dördüncü respublika yaradılmalıdır.
Baş nazir N.Paşinyan da parlamentdəki çıxışlarından birində ölkəsinin gerbini və himnini dəyişmək barədə danışmışdı: “Gerbimiz psixologiyamızı güclü şəkildə əks etdirir. Orada nə göstərilir? Ağrı dağında Nuhun gəmisi və Ermənistanın dörd çarlığının simvolları. Hamımız üçün müqəddəs olan bu obrazın 1991-ci ildə qurulan dövlətə nə dəxli var? Mərkəzə baxanda Ağrı dağında Nuhun gəmisini və indiki Ermənistan Respublikasının su altında qalan ərazisini görmək olar. Orada uzun müddət Ermənistanın təbii şəraitində yaşamayan şiri də görmək mümkündür. Müzakirə etdiyimiz bu problem, əslində, bizim hər birimizdə mövcud olan ikitirəlikdə – tarixi Ermənistanla real Ermənistan arasındadır. Nə qədər emosional və hansı arqumentlərlə əsaslandırılmasından asılı olmayaraq, sual yaranır: həqiqi Ermənistan tarixi Ermənistana, yoxsa tarixi Ermənistan həqiqi Ermənistana xidmət etməlidir?” Zənnimizcə, şərhə ehtiyac yoxdur.
Azərbaycan ictimaiyyəti, xüsusən siyasi şərhçilərimiz də son vaxtlar Ermənistan qanunvericiliyinin dəyişdirilməsi fikrini dəstəkləyirlər. Bildirirlər ki, əgər Ermənistan, həqiqətən də, qonşuları ilə normal əlaqələr qurmaq istəyirsə, onların qanunvericiliyində ərazi iddiaları ilə bağlı olan maddələr çıxarılmalıdır. Çünki bir tərəfdən, Paşinyan sülh müqaviləsinə imza atmalıdır və burada Qarabağ da daxil olmaqla Azərbaycanın ərazi bütövlüyü əks olunacaq. Digər tərəfdən, sülh müqaviləsinin tezliklə imzalanması ilə bağlı tələblər var. Deməli, hüquqi problemlərin yaranmaması üçün konstitusiya dəyişməlidir.
Azərbaycanın son illərdəki tarixi qələbələrindən və özünün ərazi bütövlüyünü tam bərpa etməsindən sonra isə bu ölkənin konstitusiyasında “Ermənistan Dağlıq Qarabağın təminatçısıdır” ifadəsi saxlanıla bilməz. Eyni zamanda, Ermənistan son illərdəki biabırçı məğlubiyyətlər seriyasından sonra bir sıra iddialarından geri çəkilməlidir. Bu barədə Azərbaycan Prezidenti, Ali Baş Komandan İlham Əliyev çıxışlarından birində deyib: "Bundan sonra Ermənistan cəmiyyətində real vəziyyətin düzgün təhlili getməlidir. Artıq mifologiyadan əl çəkməlidirlər. Böyük Ermənistan xülyasından əl çəkməlidirlər. Dənizdən-dənizə qədər mifik Ermənistan xülyasından əl çəkməlidirlər. Azərbaycana və Türkiyəyə qarşı ərazi iddialarından əl çəkməlidirlər və əl çəkəcəklər. Bunun başqa yolu yoxdur".
Demək, vaxt yetişib. Ermənistan konstitusiyasının dəyişdirilməsi zərurətdir.