Mingəçevir Gənclər Evində 2 Fevral Gənclər Günü münasibətilə YAP şəhər təşkilatının rəhbərliyi gənc fəalları, tələbələr, eləcə də idarə və müəssislərdə çalışan gənclərlə görüş keçirilib.
“Azərbaycan gəncləri yeni zirvələrə doğru” adlanan görüş ötən il “Gənclər paytaxtı” seçilən Mingəçevirdə həyata keçirilmiş tədbirlərlə bağlı videoçarxın nümayişi ilə başlayıb. Sonra şəhər icra hakimiyyətinin başçısı İlham İsmayılov çıxış edərək ölkəmizdə gənclərə göstərilən diqqət və qayğıdan danışıb, o, Ulu öndər Heydər Əliyevin sabahımızın sahiblərinə daim xüsusi münasibət bəslədiyini vurğulayıb. Şəhər rəhbəri xatırladıb ki, Gənclər və İdman Nazirliyinin yaradılması, Gənclər Gününün təsis edilməsi məhz Ümummilli liderin adı ilə bağlıdır. Ölkəmizdə gənclər siyasətini uğurla davam etdirən dövlətimiz də gənclərin təhsilinə, fiziki sağlamlığına, yüksək vəzifələrə irəli çəkilməsinə ciddi önəm verir.
Bildirilib ki, gənclərimizin güclü vətənpərvərlər kimi tərbiyəsinin nəticəsidir ki, 44 günlük Vətən müharibəsində onlar böyük rəşadətlər göstərib, torpaqlarımızın düşmən tapdağından azad olunmasında və möhtəşəm Zəfərin əldə edilməsində misilsiz qəhrəmanlıq nümunələri ilə fərqləniblər. Gənclər Günü münasibəti ilə görüş iştirakçılarına təbriklərini çatdıran şəhər rəhbəri onlara xoş arzularını bildirib.
Mərkəzi Aran Regional Gənclər və İdman İdarəsinin rəisi Azad Gözəlov, Gənclər Evinin müdiri Tural Kərimli, MDU-nun dekanı Nizami Zeynalov, “İşıqlı Gələcək” Gənclər Birliyinin sədri Samrin Xanlayev, “Asan Xidmət” müəssisəsinin direktor müavini Elşən Əliyev, baş məsləhətçi Aysel Aslanova ürək sözlərini söyləyiblər. Görüşdə 2015–2025-ci illərə dair Azərbaycan gənclərinin inkişaf strategiyasından söz açılıb və bununla əlaqədar həyata keçirilən tədbirlər diqqətə çatdırılıb.
Sonda bir qrup gəncə şəhər icra hakimiyyətinin fərxi fərmanları, Mərkəzi Aran Regional Gənclər və İdman İdarəsinin və Gənclər Evinin təşəkkürnamələri verilib.
İlqar HƏSƏNOV,
XQ-nin bölgə müxbiri