III məqalə
Qaliblər sövdələşməni elə müzakirə edirlər ki, hamı udur.
Arnold Qoldsteyn
Azərbaycanın siyasi-diplomatik inqilabı
II məqalənin sonuncu müddəası belə idi: Azərbaycan rəhbərliyi “3+3” formulunun həyata keçməsi üçün regional reallıqlarla regionlararası reallıqların bir-birinə dəstəyinə nail olmağa başlamışdır. Onu həyata keçirmək mexanizmi isə başlıca olaraq konkret layihələrin (energetik, informasiya, kommunikasiya, logistika, müdafiə, təhlükəsizlik və s.) reallaşması ilə bağlıdır. Bununla rəsmi Bakı meydana gələn yeni əməkdaşlıq mühitinin təhlükəsizliyi məsələsini geniş coğrafi və geo-siyasi məkanda aktuallaşdırmışdır. Həm də onu iştirakçı dövlətlərin milli təhlükəsizliyi ilə birbaşa bağlamışdır.
Azərbaycanın “3+3” nümunəsində bu prosesi başlaması iki trendin sintezini özündə ehtiva edir: birincisi, formulun işitrakçıları ilə yanaşı, digər regionlardan olan dövlətlərin də proseslərə daxil edilməsi təhlükəsizlik sisteminin elementlərini artırmaq və bu mənada müxtəlif maraqları nəzərə almaqla onu şaxələndirməkdir. İkincisi, həmin şaxələndirməni regionlararası mühitdə təhlükəsizliyin və əməkdaşlığın təmini istiqamətinə yönəltməklə, bütövlükdə, prosesi inteqrasiya etməkdir.
Burada başlıca siyasi-nəzəri və praktiki vəzifə bu iki tendensiyanın sintezində “3+3”+digər regionlar formulu kontekstində davamlı təhlükəsizliyi və əməkdaşlığı reallaşdırmaqdan ibarətdir. Eyni zamanda, genişləndirilmiş formada regionlararası təhlükəsizlik mühitində, şərti olaraq, “nüvə formulu” adlandırdığımız “3+3”ün “geosiyasi əriməməsi”nə nail olmaqdır. Və yaxud əksinə, digər regionların “3+3” formulunun təhlükəsizlik məntiqinə, ruhuna və məqsədlərinə uyğunlaşdırılmasıdır. Təbii ki, mürəkkəb və xeyli risklərlə dolu prosesdir. Çünki geniş regionlararası mühitə müxtəlif istiqamətlərdən böyük dövlətlərin təsiri daha artıq olur. Lakin rəsmi Bakı bu cür mürəkkəb vəziyyətdən çox səmərəli xilas yolu tapmışdır və “3+3” formulu həm də bu mənada xilas düsturudur.
XXI əsr geosiyasətinin “avtofaktoru” və “3+3” modeli
Çoxlu sayda fəlsəfi, geosiyasi, siyasi-nəzəri araşdırmalar maraqlı bir əlamətin mövcudluğunu aydınlaşdırmışdır. Biz onu XXI əsr geosiyasətinin “avtofaktoru” adlandırırıq. Geosiyasi “avtofaktor” indiki mərhələdə xaosla nizamlılığın, müəyyənliklə qeyri-müəyyənliyin və təhlükəsizliklə təhdidlərin qarşılıqlı münasibətlər dinamikasının özəlliklərinin əmələ gətirdiyi “daxili özünüyaratma məntiqi” ilə əlaqəlidir. Mövcud mürəkkəb vəziyyətdən həmin məntiq əsasında konstruktiv seçim yolu ilə xilas mümkündür. Yəni, XXI əsr geosiyasətinin ümumi dinamikası fonunda elə təhlükəsizlik sistemi yaradılmalıdır ki, yalnız sabit siyasi normativlərə əməl edən təşkiledicilər olmasın, onların həm də dinamik yeniləşən “özünüyaratma” mexanizmləri mövcud olsun. Özünüyaratma (“avtoyaratma”) hər bir geosiyasi sistemin (regional və qlobal miqyaslı) sürətlə dəyişən situasiyalara yalnız adaptiv deyil, həm də yaradıcı reaksiya vermək özəlliyinə malikdir. Konkret olaraq, “3+3” formulu iki səviyyədə “avtofaktor”a malikdir. Birincisi, bu formulun birbaşa təşkilediciləri olan dövlətlər – Azərbaycan, Gürcüstan, Ermənistan, Türkiyə, Rusiya, İran, yalnız sabit siyasi normativlər əsasında deyil, həm də qarşıya çıaxacaq hər bir qeyri-müəyyənliyə aktiv reaksiya verə biləcək siyasi, iqtisadi, mədəni, energetik, geosiyasi, loqistik və s. faktorların sintezinə malik olmalıdırlar. “3+3” daxilində də bu prosesin “müdafiə kəmərini” Rusiya, Türkiyə, İran münasibətləri təşkil etməlidir.
İkincisi, “3+3”ün “avtoyaratma” mexanizmləri nə qədər geniş məkana təsir gücünə malik olsa, bir o qədər səmərəli olacaq. Bunun üçün mütləq “3+3”ün coğrafi, siyasi, iqtisadi, mədəni, energetik, informasiya və geosiyasi sərhədləri aşılmalıdır. Praktiki aspektdə məhz məsələnin bu tərəfi böyük əhəmiyyət kəsb edir.
Bakı yeni təhlükəsizlik dəyəri yaradır
Azərbaycan “3+3” formulunun “avtofaktor” mexanizmlərini regional və qlobal təşkilatların fəaliyyətinin uyğunlaşdırılması vasitəsi ilə aktivləşdirməkdədir. Bunun üçün rəsmi Bakı MDB, TDT, Qoşulmama Hərəkatı, İslam Əməkdaşlıq Təşkilatı çərçivəsində fəaliyyətini koordinasiyalı şəkildə həyata keçirir. Bu zaman taktiki və strateji olaraq ən yaxın tərəfdaş (partnyor) kimi Avropa İttifaqını seçmişdir. Təhlükəsizlik və əməkdaşlıq dəyərinin məzmunlaşması üçün “Bir yol, bir kəmər” meqalayihəsinin potensialından və real fəaliyyət fəlsəfəsindən istifadə edilir.
Bu prosesi rəsmi Bakı Türkiyə diplomatiyası ilə birlikdə üzv olduqları təşkilatlardakı fəaliyyət+qlobal meqalayihənin reallaşma siyasəti kontekstində aparır. Bu zaman həmin proses konkret nəticə almağa imkan verən fəaliyyət şəbəkəsinin yaradılması fonunda reallaşdırılır. Bununla belə alınır ki, “3+3”+digər regionlar şəbəkəsi, faktiki olaraq, milli təhlükəsizliklə regional təhlükəsizliyin regionlararası təhlükəsizlik şərtləri ilə sıx qarışılqlı əlaqədə həyata keçirilir. Daha konkret ifadə ilə deyə bilərik ki, Bakının yeni təhlükəsizlik avtofaktoru regional təşkilatlardakı fəaliyyəti meqalayihələrlə qarşılıqlı əlaqədə götürməklə, dinamik təhlükəsizlik və əməkdaşlıq mühiti formalaşdırmaqla bağlıdır.
Azərbaycan bu məqsədi üç konkret istiqamətdə strateji layihələrin aktivləşməsi vasitəsi ilə həyata keçirir. Onlar, birincisi, energetik layihələr, ikincisi, informasiya-kommunikasiya layihələri, üçüncüsü, nəqliyyat-loqistika layihələridir. Həmin layihələrin hər biri üçün avtofaktor rolunu müxtəlif marşrutların yaratdığı “kommunikativ yollar şəbəkəsi” təşkil edir. Bununla da maraqlı pilləvari bir sistem yaranır. Çoxlu sayda ölkələr konkret qarşılıqlı fayda verə biləcək layihələr şəbəkəsi ilə bir-birinə “bağlanır” və həmin “bağlantıların” reallaşması dəqiq müəyyən edilmiş “kommunikativ yollar şəbəkəsi” çərçivəsində baş verir. Onlara “dəhlizlər” də deyirlər. Məsələn, “Orta Dəhliz”, “Zəngəzur Dəhlizi”, “Cənub Qaz Dəhlizi”, “Bakı-Ceyhan” nəql marşrutu, TAP, TANAP, Bakı-Tbilisi-Qars “dəmir ipək yolu”, “Şərq-Qərb dəhlizi”, “Şimal-Cənub dəhlizi” və son olaraq “Yaşıl enerji” (bərpaolunan enerji) Dəhlizi. Bunlar, faktiki olaraq, mahiyyət, məzmun və məqsəd baxımından birlikdə dinamik şəbəkə təşkil edən yeni faktorlardır.
Bakının fəaliyyətinin başqa maraqlı və əhəmiyyətli tərəfi ondan ibarətdir ki, bütün kommunkativ potensiallar və onların aktual formaları vahid bir strateji istiqamətə – Qərbə inteqrasiyaya yönəldilmişdir. Bu mənada Azərbaycan regional geosiyasi “avtofaktoru” “3+3” formulu fonunda qlobal miqyasa proyeksiya etmək şansı əldə etmiş olur. Məhz bu səbəbdən, hesab edirik ki, indi Qərbdə bu formula qarşı törədilən təxribatların hamısı stratejidə iflasa uğrayacaq. Onun reallaşmasına alternativ yoxdur!
Bəs Azərbaycanın ardıcıl olaraq yaratdığı bu yeni geosiyasi və təhlükəsizlik dəyərinin dinamikası, çevikliyi, avtotəhlükəsizlik və əməkdaşlıq faktoru rolu oynaması nəyə görə realdır?
Müasir dünya sistemini yaradan təməl faktorlar
Məsələnin mahiyyəti bu məqamla əlaqəlidir. Rəsmi Bakı bütövlükdə müasir dünya üçün zəruri olan elə faktorları aktuallaşdırır ki, onlara hər bir dövlətin hər zaman ciddi ehtiyacı vardır. Bu faktorlar üçdür: enerji, informasiya və kommunikasiya texnologiyaları. Eyni zamanda, həmin təməl faktorları bir-biri ilə siyasi, geosiyasi, təhlükəsizlik aspektlərində bağlayan nəqliyyat-logistika proqramlarıdır. Bu faktorlar sistem halında qarşıya çıxa biləcək hər bir qeyri-müəyyənliyi, riski, təhdid və təhlükəni, xaosu aşa biləcək önəmə sahibdir. Çünki müasir bəşəriyyət onlarsız mövcud ola bilməz! Digər tərəfdən, Azərbaycan konkret aspektlər üzrə elə layihələr irəli sürür ki, onlar strateji əhəmiyyətə malikdirlər. Bu o deməkdir ki, həmin layihələrin uzun müddətə reallaşmasında prosesin bütün iştirakçıları maraqlıdırlar.
Bu sırada Azərbaycanın həyata keçirdiyi siyasətdə bir vacib məqam da var. O, rəsmi Bakının hər yeni mərhələnin xüsusiyyətlərinə uyğun proqramların təşəbbüskarı olmasıdır. Buna nümunə kimi Azərbaycanın enerji sferasında “yaşıl enerji” və ya bərpaolunan enerji layihələrində fəallıq göstərməsini deyə bilərik. Bu layihələr birbaşa Avropanın yeni enerji növü ilə təmin olunması ilə sıx bağlıdır. Bura günəş, elektrik, hidrogen, külək və başqa bərpaolunan enerji növləri daxildir. Artıq bu enerji növlərinin Avropaya nəqli marşurtları müəyyən olunmuşdur. Azərbaycan Yunanıstan–Bolqarıstan (açılışı: oktyabr 2022-ci il) və Serbiya–Bolqarıstan (açılışı: dekabr 2023-cü il) qaz interkonnektorlarının həyata keçməsinin birbaşa iştirakçısıdır. Bundan başqa, Bakı 5 Şərqi Avropa ölkəsi ilə enerji sahəsində yeni əməkdaşlıq formatı yaratmışdır. Həmin format çərçivəsində Azərbaycandan elektrik enerjisi Gürcüstandan və Qara dənizin dibindən keçməklə Rumıniyaya çatdırılır.
Ayrıca, Qərbə gəldikdə isə - onlar gözəl başa düşürlər ki, əgər bütün layihələr sistemi bütövlükdə Avropanın təhlükəsizliyi və inkişafının yeni dinamik şəkil almasına istiqamətlənibsə, deməli, onun üçün həyati əhəmiyyət, var olmanın ana xəttini təşkil edir. Əgər Avropa hələ tam dəli və huşsuz olmayıbsa, elementar düşüncə və analizetmə qabiliyyətinə malikdirsə, geniş miqyasda Azərbaycanın bu prosesini ikiəlli dəstəkləyəcək! Əgər bu, baş verməsə, onda “qoca dəli və huşsuzla” bir planetdə yaşamağın mənası yoxdur! Onu “dəfn etməyin” zamanı gəlmiş olur!
Yekun: “3+3” formulunun alternativsiz perspektivi
Bu formul həm mahiyyətinə, həm də funksiyasının strateji xüsusiyyətlərinə görə regional təhlükəsizlik və əməkdaşlığın alternativsiz formatıdır. Onun reallaşmasının baza prinsiplərini və konkret mexanizmlərini artıq Azərbaycan hazırlamışdır. Onlar sistem və ya mürəkkəb şəbəkə təşkil edirlər. Bir-biri ilə sıx bağlı olan həmin mexanizmlər praktikada işləyirlər. Məhz həmin mexanizmlər sayəsində postmüharibə mərhələsində regionda intriqalı situasiyalar hərbi toqquşmalara gətirib çıxarmır. Onu nəzərə alaq ki, regionda destruktiv fəaliyyət göstərənlər əsasən Qərbdədirlər.
Konkret olaraq, Fransa getdikcə daha dərin və geniş miqyasda Cənubi Qafqazda yeni münaqişəli situasiyalar yaratmaqdadır. Həm də Paris bu dağıdıcılıq fəaliyyətini uzun müddətə təsir edə biləcək faktorlar üzərində qurmağa çalışır. Qəribədir ki, bu məsələdə Fransanın qeyri-konstruktiv fəaliyyətinə bütövlükdə AŞPA da dəstək verir və hətta onu təxribatçı qərarları ilə motivasiya edir.
Digər tərəfdən, rəsmi Parisin və ona “züy tutanlar”ın belə davranışları Avropanın özünün maraqlarına qətiyyən uyğun deyildir. Çünki onlar bilməlidirlər ki, Avropanın enerji təhlükəsizliyinin təminində Azərbaycan strateji rol oynayır. Bunu Avropa İttifaqının rəhbər şəxsləri açıq mətnlə etiraf edirlər.
Belə çıxır ki, Azərbaycanın regionda dağıdıcı qüvvələrə qarşı mübarizəsi indiki ssenari üzrə sonsuza qədər davam etməz. Həmin prosesə “3+3” formatı çərçivəsində kollektiv olaraq reaksiya vermək gərəkdir. Bu formulun hər bir üzvü həmin istiqamətdə fəallaşmalıdır. Regionda marağı olan digər geosiyasi aktorlar mütləq surətdə Azərbaycan–Türkiyə birliyinin çağırışlarına əməli reaksiya verməlidirlər. Regionun təhlükəsizliyi üçün hamı məsuliyyət daşıyır!
Füzuli QURBANOV,
XQ-nin analitiki