Azərbaycan nümayəndə heyəti Avropa Şurası Parlament Assam-bleyası ilə əməkdaşlığını və təşkilatda iştirakını qeyri-müəyyən müddətə dayandırdı. Nümayəndə heyətimizin üzvləri bununla bağlı bəyanat qəbul etdilər. İndi qurumun Fransanın oyuncağı olan almaniyalı deputat Frank Şvabe kimi ermənipərəstlər və onların əli ilə hərəkətə gətirilən miskinlər sürüsü ölkəmizlə bağlı nə qərar çıxarırlarsa, çıxarsınlar. Erməni sevdalıları, Azərbaycanı, hətta, Avropa Şurasından da uzaqlaşdıra bilərlər. Buyurub iki ayaqlarını bir başmağa çəksinlər! Görək, nə qazanacaqlar! Görək, ermənipərəstlik onlara nə verəcək!
AŞPA-dakı Azərbaycan nümayəndə heyətinin verdiyi qərar son dərəcə yerində atılmış addımdır. Bu, Avropada hər kəsə dərs olmalıdır. Hər kəs bilməlidir ki, ölkəmizlə oyun oynamaq, haqq səsimizi boğmağa çalışmaq heç bir fayda verməyəcək. Bu əməllərlə Azərbaycana təzyiq göstərmək cəhdləri də həmçinin.
İndi, qoy, nəinki Avropa Şurasının rəhbərliyi, eləcə də bir-biri ilə əlaqəli olan Avropa təsisatlarının rəhbərliyində oturanlar, beyin mərkəzlərinin təmsilçiləri düşünsünlər. Özü də yaxşı-yaxşı. Düşünsünlər ki, ermənipərəstlik yolunda nəyi itirirlər. Bir zəhmət, Azərbaycanın AŞPA-dakı fəaliyyətini dayandırması durumunun formalaşmasında “əməyi” keçənlərin təmsil etdikləri məmləkətləri gələcəkdə hansı aqibətin gözləyəcəyini də götür-qoy etsinlər. İtirən onlar olacaq, Azərbaycan yox! Mübarizə istəyirlərsə, buyursunlar!
Mübarizədən söz düşmüşkən, Azərbaycanın AŞPA-dakı nümayəndə heyətinin bəyanatı da mübarizə ruhundadır. Bəyanatda Azərbaycanın 1991-ciildən başladığı müstəqillik yolu təhlil edilir. AŞPA-nın müxtəlif ölkələrin parlamentariləri arasında qarşılıqlı hörmət və bərabər hüquqlara əsaslanan dialoq platforması olduğunun vurğulandığı sənəddə Azərbaycanın 2001-ci ildə Avropa Şurasına üzv olmaqla qarşısına qoyduğu məqsəd açıqlanır. Bildirilir ki, respublikamız beynəlxalq səviyyədə tanınmış ərazilərinin bir hissəsinin Ermənistan tərəfindən hərbi təcavüzə və işğala məruz qalması nəticəsində hüquqları pozulmuş yüz minlərlə azərbaycanlının hüquqlarının bərpasında köməyə, beləliklə regionda davamlı sülhün əldə olunması naminə ədalətin öz yerini tutacağına ümid bəsləyib. Lakin: “2001-ci ildən 2020-ci ilə qədər olan 19 il ərzində AŞPA işğalçı dövləti –Ermənistanı Avropa Şurasının əsas dəyər və prinsiplərinə zidd hərəkətlərinə görə cavab vermək barədə qınamayıb. Burada söhbət xüsusilə etnik təmizləməyə məruz qalmış azərbaycanlı qaçqın və məcburi köçkünlərin insan haqlarına qarşı açıq-aşkar hörmətsizlikdən gedir”.
Bəyanatda, eyni zamanda, vurğulanır ki, Azərbaycan təcavüz, işğal və zorakı separatizm üzərində tarixi Qələbəsindən, ərazi bütövlüyünün və suverenliyinin bərpasından sonra, ləkələnmək, əldə etdiyi nailiyyətlərə kölgə salmaq üçün təşkil olunmuş qarayaxma kampaniyası ilə üz-üzədir. Bəli, hazırda AŞPA müstəvisində oynanılan çirkin oyunun da məqsədi məhz budur. Sual həqiqətən yerindədir: necə ola bilər ki, təxminən iyirmi ilə yaxın müddətdə Azərbaycan nümayəndə heyətinə erməni işğalının AŞPA ilə bağlı məsələ, qurumun münaqişənin müzakirəsi üçün düzgün format olmadığı deyilib, indi isə Azərbaycan–Ermənistan münasibətləri, Qarabağ reallıqları fonunda ölkəmizə qarşı qərəzli mövqe tutulub? Bu, son dərəcə məntiqsiz, məntiqsiz olduğu qədər də əcayib yanaşma deyilmi? Niyə bir milyondan artıq azərbaycanlı insan sayılmırdı? Nəyə görə onların otuz ilə yaxın müddətdə üzləşdikləri durum insan hüquqlarının pozulması anlamına gəlmirdi? Elə ona görə də nümayəndə heyətimizin bəyanatında bildirilir: “İndi isə həmin AŞPA və həmin deputatlar bunun əksini deyir və Azərbaycana hücum etmək üçün heç bir fürsəti əldən vermirlər. Beynəlxalq hüququn selektiv şərhi, dövlətlərin ərazi bütövlüyü və suverenliyi ilə bağlı məsələlərə fərqli yanaşma bu biabırçı təklifin müəlliflərinin rüsvayçı və ikiüzlü xarakterini nümayiş etdirir”.
Bəli, AŞPA alətdir. Təəssüf ki, siyasi alətə çevrilmək hazırda dünyanın bir çox aparıcı beynəlxalq təşkilatlarının üzləşdikləri acınacaqlı durumdur. Bu durum təməl prinsiplərə aşkar həqarətin təzahürüdür. Elə bir təzahürdür ki, son dərəcə dəhşətli presedent formalaşdırmaq ehtimalı böyükdür. Belə çıxır ki, hər cür ədalətsizliyin ədalət, hər cür hüquq pozuntusunun haqq kimi leqallaşması mümkündür. Həqiqətən də ortada demokratiya adına utancverici mənzərə var. “Müəyyən qərəzli qruplar AŞPA-nın əsas prinsiplərindən öz dar maraqlarının təmini məqsədilə sui-istifadə edirlər. AŞPA-da siyasi korrupsiya, ayrı-seçkilik, etnik və dini nifrət, ikili standartlar, təkəbbürlülük, şovinizm hökm sürən praktikaya çevrilib”, – deyən bəyanat müəlliflərinin məhz qeyd etdiyimiz məqamı diqqətə çatdırdıqları aşkardır. Nəzərə alaq ki, şvabelərin Azərbaycanın AŞPA-dakı nümayəndə heyətinin etimadnaməsinə etiraz etmək təşəbbüsü də çirkin tendensiyanın tərkib hissəsidir.
Əlbəttə, AŞPA-nın anti-Azərbaycan ritorikasındakı başlıca məqam 7 fevral prezident seçkiləridir. Dünyada hər bir aparıcı qütb yaxşı anlayır ki, seçki Azərbaycan xalqının iradəsinin növbəti təzahür meydanı, xalq-iqtidar vəhdətinin təntənə anı olacaq. Məqsədləri proseslə bağlı total antipatiya yaratmaqdır. İstəkləri ölkəmizin iradəsini sivil dünyadan təcrid durumunun elementi kimi göstərməkdir. Ancaq başlarını itiriblər. Xaricdəki anti-Azərbaycan qüvvələrin bir qismi prezident seçkilərini müşahidə etməyəcəyini açıqlayır, AŞPA isə bəhanə gətirir. Guya, ölkəmizin qurumdakı nümayəndə heyəti prosedur qaydalarını pozaraq seçkiyə dəvət göndərməyib. Bilməmişik, bunlar üçün xalça sərmək kimi vəzifəmiz var imiş. Utanmaz-utanmaz özlərini böyük sayırlar. Görəsən, hansı haqla?
Təbii ki, heç bir haqdan söhbət gedə bilməz. Azərbaycanın AŞPA-dakı nümayəndə heyətinin bəyanatında bildirildiyi kimi, ölkəmizə qarşı oynanılan çirkin oyun seçki prosesinə əsassız müdaxiləyə yönəlmiş məqsədyönlü və qəbuledilməz cəhd, demokratik təsisatların fəaliyyətinə xələl gətirən məkrli addımdır. Ancaq AŞPA-dakılar unutmamalıdırlar ki, “nümayəndə heyətimizin etimadnaməsini ratifikasiya etməkdən imtina ilə bağlı təklif bütövlükdə Avropa Şurasının etibarlılığına və qərəzsizliyinə ciddi zərbə olacaq, bunun ciddi və geri dönməz nəticələrinə görə məsuliyyət tamamilə onun təşəbbüskarlarının üzərinə düşəcək”.
Bəli, sitatdakı fikirlər sanki şapalaq effekti verir. Azərbaycan 44 günlük müharibə və lokal xarakterli antiterror tədbirləri ilə Ermənistana və onun havadarlarına dərs verdiyi kimi, AŞPA-dakı nümayəndə heyətimizin bəyanatındakı bu fikirlər də dərsdir, elə tərs şapalağın özüdür: “Dünyada heç kim, o cümlədən bu zalda əyləşənlər Azərbaycanla təhdid və şantaj dili ilə danışa bilməzlər”.
Sənəddəki təsirli məqamlardan biri də AŞPA-nın tarixində heç vaxt bu təşkilatın özünü belə biabırçı şəkildə aparmadığının vurğulanmasıdır. Deməli, qurumda qəbuledilməz, rüsvayçı ab-hava, ləyaqət hissinə meydan oxuyan çirkin vəziyyət formalaşıb. Dözülməz irqçilik, Azərbaycanofobiya və İslamofobiya da öz yerində. Bu səbəbdən: “Azərbaycan nümayəndə heyəti AŞPA ilə əməkdaşlığı və təşkilatda iştirakını qeyri-müəyyən müddətə dayandırmaq qərarına gəlib”.
İndi papaqlarını qabaqlarına qoyub düşünmək növbəsi nəinki AŞPA-nın, eyni zamanda, Avropa Şurasının, ümumən “köhnə qitə”nin özünü mütərəqqi sayan qurumlarının aparıcı şəxslərinindir. Əlbəttə, papaqları varsa, yaxud onları ermənilərə bağışlamayıblarsa!
XQ-nin analitik qrupu