II hissə
“Səmimilik ən yaxşı siyasətdir”
Migel de Servantes
Məntiqsizlik, böhtan və şər siyasi spekulyasiyanın “arqumentləri” kimi Frank Şvabe “əsaslandırması”nda üç məqamı vurğulayır. Birincisi, guya Azərbaycanda çoxlu siyasi məhbus vardır. İkincisi, guya, Azərbaycan Qarabağdan 100 mindən çox insanı zorla qovub. Üçüncüsü, bu iki “fakt” da AŞPA üçün elə də önəmli deyil – əsas odur ki, onun nümayəndələrinə nə Laçın yoluna (o, “dəhliz” terminini işlədir – red.) “səyahət etməyə” imkan veriblər, nə də onları 7 fevral prezident seçkilərini müşahidəyə dəvət ediblər.
Belə görünür ki, AŞPA “siyasi məhbus” və “insanların hüququ” məsələsini əsas saymır, onun üçün özünün nüfuzu, təsir dairəsi və nəzərdə tutduğu siyasi məqsədlər vacibdir. Deməli, qurum insan hüquqları ilə bağlı zəruri hesab etmədiyi məsələdən siyasi nüfuzunu artırmaq üçün faydalanmağa çalışır. Bunun bir adı var – spekulyasiya.
Fikrimizi təsdiqləyən ən tutarlı fakt isə AŞPA-nın artıq otuz ildən çoxdur yurdlarından zorla deportasiya edilmiş azərbaycanlıların taleyi ilə maraqlanmadığıdır (bir sıra rəsmi sənədlərdəki sözdə çağırışdan başqa). Reallıq budur: yüz minlərlə azərbaycanlı həm indiki Ermənistan ərazisindən, həm də Qarabağdan qovulub, qaçqın və məcburi köçkün həyatı yaşamağa məhkum duruma düşüb. Otuz ildən çoxdur davam edən məhkumluq bu gün də aktualdır.
Bəli, Qərbi Azərbaycandan olan soydaşlarımız hələ də öz vətənlərinə - Göyçəyə, Zəngəzura və Ermənistanın digər bölgələrinə ayaqlarını belə basa bilmirlər. Bəs bu müddətdə AŞPA da daxil olmaqla, Avropa qurumları onların öz evlərinə qayıtmaları üçün Ermənistandan nə isə tələb ediblərmi?
Laçın yolunu təntənəli şəkildə “dəhliz”, sanki nəfəslik kimi göstərir, lakin həmin “nəfəslik” vasitəsilə azərbaycanlıların öz yurdlarına dönmələri məsələsini heç müzakirə belə etmək istəmirlər. Təsəvvürlərindəki “dəhliz” yalnız ermənilərin və onların havadarlarının Ermənistandan Azərbaycana sərbəst keçməsini təmin etməli olan birtərəfli hərəkət zolağıdır!
Bu tezisi demək üçün çoxlu sayda faktlar var. Elə AŞPA-nın da “faktları” yalnız “ermənilərə onu icazə vermirlər, bunu icazə vermirlər” kimi formal məntiqin çərçivəsini aşmır. Avropa dövlətlərinin (xüsusilə, Fransa və Almaniyanın) bununla bağlı tələblərindən belə qənaət hasil olur ki, “dəhliz” yalnız ermənilər və onların ağaları üçündür. Bu sayaq mükalimələrində çox arxayındırlar. Azərbaycanlılara “dəhliz” məntiqini şamil etməkdən uzaq duranlar Zəngəzur haqqında “Ermənistan ərazisində dəhliz ola bilməz” kimi həyasız bir cümlə işlədirlər.
Bunlarla yanaşı, Fransa və Almaniya başda olmaqla, Aİ üzvləri və Kanada “mülki missiya” adı altında hərbçilərini və kəşfiyyatçılarını Ermənistan tərəfdən Azərbaycan sərhədini və daxili ərazini müşahidə etmək üçün göndərir. Budur, “demokratik vasitəçilik” nümunəsi? Bunlardır, “insan haqları”, “siyasi məhbus” kimi təntənəli terminlərin məzmununu formalaşdıran davranışlar?
Belə süni davranan, işğalçıya hər mənada arxa olan və mövcud fonda Azərbaycan dövlətinin və vətəndaşlarının ən təbii hüquqların belə gözardı edən bir qurumu hansı əsasla seçkiyə müşahidəçi kimi buraxmaq olar? Burada demokratik dəyərləri heçə saymaqdan söhbət gedə bilməz. Gün kimi aydındır ki, AŞPA müşahidəçiləri həqiqəti deyil, Azərbaycanı ləkələmək üçün uyduracaqları “seçki faktları”nı yaymağa çalışacaqlar. Onlar, ümumən, postsovet məkanı ölkələrinə münasibətdə həmişə ayrı-seçkilik ediblər. Bununla bağlı tutarlı faktlar var.
Fridrix Ebert Fondu və onun prezidenti
2014-cü ildə Avropa Parlamentinin o dövrdəki sədri Martin Şults (Almaniya) Ukraynadakı siyasi vəziyyətə aktiv müdaxilə etmişdi. O, indi Fridrix Ebert Fondunun prezidentidir. Bu təşkilat Almaniyanın 1919-1925-ci illərdə prezidenti olmuş və I Dünya müharibəsini alovlandıran siyasətçilərdəndir. Onun adına yaradılmış fond müxtəlif psotsovet ölkələrində fərqli işlər görür. Məsələn, 2022-ci ildən Rusiyada qurumun fəaliyyətinin qadağan edilməsi səbəbində diqqət yetirək. Fond gəncləri antirusiya əhval-ruhiyyəsinə sürükləyirmiş. Müharibəyə qarşı mübarizə aparmaq adı altında Rusiyada həlak olmuş faşistləri reabilitasiya etməyə cəhdlər göstərirmiş. Hətta, bir rus məktəblini Avropaya Rusiyanı ittiham müstəvisində həlak olmuş hansısa alman əsgəri ilə bağlı müzakirələrə aparıbmış.
“Yardımsevər” Şvabe
Və bütün bu işlərdə fəal iştirak edənlərdən biri... Frank Şvabedir. Bu şəxsin siyasi karyerası Sosial-Demokrat Partiyası ilə bağlıdır. O, 2014-cü ildən Almaniya Sosial-Demokrat Partiyasında insan hüquqları və humanitar yardımlar üzrə fraksiyanın spikeridir. Bundan başqa, F.Şvabe AŞPA-da “Sosialistlər, demokratlar və yaşıllar” qrupuna başçılıq edir. 2012-ci ildə Fridrix Ebert Fondunun dəvəti ilə Moskvada “iqlim syasəti”nə həsr edilmiş tədbirə qatılıb. Lakin fəaliyyəti bununla məhdudlaşmayıb. O, az əvvəl haqqında söz açdığımız rusiyalı məktəblinin bir alman əsgərinin həlak olması kontekstində Avropada təxribat xarakterli çıxışının təşkilində də əsas rol oynayıb.
Şvabe 2018-ci ildən AŞPA-da monitorinq, insan hüquqları, miqrasiya, qaçqınlar üzrə komitələrin üzvüdür. O, 2022-ci ildə Rusiya ordusunun fərarilərini, jurnalistləri və hüquq müdafiəçilərini tezliklə Almaniyada “hərtərəfli müdafiəyə” alacaqlarını vəd etmişdi. Və bu şəxsin Azərbaycanla bağlı məlum son bəyanatı var.
Belə görünür ki, F.Şvabenin tərəfsiz olaraq insan haqlarını və hüquqlarını, qaçqınları, məcburi köçkünləri, miqrantları müdafiə etmək üçün, kifayət qədər, imkanları mövcuddur. Ancaq o, xüsusi seçim əsasında hərəkət edir – insanları “özününkülər”ə və “yadlara” bölür. Münasibətini də mövcud rakusdan çıxış edərək bildirir. Bu zaman olmayan şeyləri real fakt kimi təqdim etməkdən çəkinmir. Olan faktları isə görməməzlikdən gəlir. Misal kimi F.Şvabenin deportasiya edilmiş və evlərindən məhrum olmuş azərbaycanlıların hüquqları barədə AŞPA müstəvisində ciddi heç bir addım atmadığını göstərə bilərik.
Bütün bunların fonunda AŞPA rəsmisinin “məqsəd AŞPA-nı zəiflətməkdir” deməsi siyasi spekulyasiyadan başqa bir şey deyil. Özü də sadə insanların talesizliyi üzərində qurulmuş, ədalətsizlik və insan hüquqlarına dərin sayğısızlıqdan qaynaqlanan spekulyasiya! İndiki durumda bir azərbaycanlı uşağın, qadının, qocanın fəryadına kar olmaq, onların öz yurdlarından didərgin salınmasına göz yummaq ən böyük haqsızlıq və cinayətdir.
Beynəlxalq hüquqa vicdansız yanaşma
Üstəlik, bunun yanında öz xoşları ilə Qarabağı tərk etmiş erməniləri “zorla qovulanlar” kimi təqdim etməyə çalışmaq, insan haqlarına və beynəlxalq hüquqa vicdansız yanaşmadır. Əlbəttə, milliyyətindən asılı olmayaraq, hər bir insanın normal yaşamaq hüququ var. Dövlətimiz bu prinsipi həmişə dəqiqliklə gözləyib. Lakin uzun illər azərbaycanlılara qarşı görünməmiş haqsızlıq edən erməni separatçıları və terrorçularının günahı ucbatından sadə ermənilər də evlərindən çıxmalı olublar. Azərbaycanlılardan kimsə onları təhdid etməyib. Ölkəmizin təhlükəsizlik orqanları kon-kret cinayət işlətmiş separatçıları və terrorçuları həbs edib. Onlara qanun çərçivəsində cəza kəsilməlidir.
Bəli, F.Şvabe və ona bənzərlərin Azərbaycana münasibətdə “siyasi məhbusların sayı dəhşətli dərəcədə artır” kimi bəyanatları beynəlxalq miqyasda ciddi cəzalandırılmalı manipulyasiyadır, mənəvi cinayət əməlidir. Çünki bununla həmin “demokratlar” milyonlarla günahsız insanın yenidən qanının axıdılması üçün terroçulara dəstək verirlər, onları yeni-yeni qətllərə motivasiya edirlər. Eyni ssenarinin izlərini Qərbin Yaxın Şərqdə terrorçulara dəstək verməsində, onları stimullaşdırmasında da görürük. Məhz bu baxımdan F.Şvabe və onun kimilərin sifariş yerinə yetirdiyinə dair ciddi şübhələr var.
Bundan başqa, hamı bilir ki, Azərbaycanın təhlükəsizlik orqanlarının həbs etdiyi hər bir separatçı konkret cinayət işlədib və bu, sübut olunub. Məsələn, Qarabağdakı sabiq separatçı rejimin keçmiş lideri Arayik Arutunyan Gəncəyə raket atılması əmrini verdiyini açıq şəkildə bəyan etmişdi. A.Arutunyan və silahdaşlarının cinayətkar olduqlarını sübuta yetirmək üçün təkcə bu fakt da kifayətdir. Məlumdur ki, 44 günlük müharibə dönəmində Gəncənin atəşə tutulması ilə çoxlu sayda insan, o cümlədən, uşaqlar həlak oldular.
Bu faktların mövcudluğu şəraitində belə Azərbaycanı öz xoşuna tərk edən bir erməninin burnu qanamayıb. Əksinə, onların jurnalistlərə dedikləri göstərir ki, ağır vəziyyətin yaranmasında erməni speratçılarını günahlandırırlar. Qarabağı tərk edən ermənilər azərbaycanlılarla heç bir problemlərinin olmadığını bildiriblər.
2 sual və 2 nida!
Bütün bunlar gerçək olduğu halda, Azərbaycanı etnik təmizləmədə necə ittiham etmək olar? Hansı səbəbdən uşaq qatili olan erməni separatçılarını siyasi məhbus adlandırırlar? Bu, absurddur, nonsesdir!
Belə çıxır ki, AŞPA-nın Laçın yoluna səyahət iddiası və “siyasi məhbus” adlandırdıqları cinayətkarlarla görüş tələb etməsi saxtakarlıqdır. Çünki onlar sözün həqiqi mənasında ədalət naminə deyil, öz çirkin planlarını həyata keçirmək üçün bu tələbləri irəli sürürlər.
Nəhayət, onu demək yerinə düşür ki, Azərbaycan hər kəsə anlatdı ki, o, müstəqildir və ədalətli, obyektiv mövqedədir. Kənardan olan istənilən təzyiqə qarşı dayanır və müstəqil qərarlar qəbul edir. Siyasi məsələyə gəldikdə, ölkəmizdə demokratik seçki keçiriləcəyi şübhəsizdir. Azərbaycanı bu yoldan heç bir qüvvə sapdıra bilməz!
Frank Şvabeyə gəlincə isə, o, Azərbaycana qarşı qərəzli qüvvələrin məğlubiyyətinin növbəti nümunəsidir. Ölkəmiz haqqında AŞPA-nın monitorinq qrupu nə qərar qəbul edir-etsin, onun təsiri Strasburqun küçələrindən o tərəfə aşmayacaq.
Füzuli QURBANOV,
XQ-nin analitiki, fəlsəfə elmləri doktoru