Erməni avantürizminə görə Azərbaycandan üz döndərməyə dəyərmi?
Bəli, kimlərsə Azərbaycanın Avropa Şurası Parlament Assambleyasındakı səsini dondurmaq, məhdudlaşdırmaq qərarına gəliblər. Əsasları nədir? Görəsən, ölkəmiz nə edib ki, belə bir təşəbbüslə çıxış edənlər var? Əslində, heç nə.
Aydındır ki, bu, “köhnə qitə”nin ermənipərəstliyindən qaynaqlanmış bir durumdur. Guya ki, Azərbaycanda insan hüquqları pozulurmuş və sair ilaxır. Əsas kimi göstərilənlər tam cəfəngiyyatdır. AŞPA-ya utanc gətirəcək cəfəngiyyat. Utancın və cəfəngiyyatın müəllifi də bəllidir – almaniyalı deputat Frank Şvabe.
Deməli, Fransa və Almaniya tandemi iş başındadır. Paris özünün ermənipərəstlik sevdası naminə Almaniyanı alətə çevirir. Tam aydındır ki, Fransa xarici siyasətindəki uğursuzluqlarını sığortalamaq üçün Almaniyanı, sanki, balaca uşaq kimi qabağa verib...
O da görünür ki, kimlərəsə Azərbaycanın dövlət suverenliyini tam bərpa etməsi, mərd hərbçi övladlarımızın ötən il sentyabrın 19–20-də keçirdiyi lokal xarakterli uğurlu antiterror tədbirləri möhkəmcə yer edib. Onlar qısqanclıqlarını hansı formada nümayiş etdirmək lazım olduğunu bilmirlər. Başlarını itiriblər. Cənubi Qafqaza yeritdikləri və əsrlərlə üstündə əsdikləri erməni avantürizminin sıradan çıxmasından, sözün əsl mənasında, qeyzləniblər. O qədər hiddətləniblər ki, Avropa Şurasının təməl prinsiplərini belə pozmağa hazırdırlar.
Əslində, Azərbaycan üçün Avropa Şurasının özünün də heç bir əhəmiyyəti yoxdur. Qurum bəşəri dəyərləri qorumaq naminə ortada olduğunu bildirirsə, görəsən, ölkəmizin iyirmi faizi işğal altında olanda nə edirdi? Növbətçi qətnamələrdən, mənasız söz yığını bəyanatlardan uzaq obyektiv mövqe tuturdumu? Nə Avropa Şurası bir şeyə yarayırdı, nə də onun Parlament Assambleyası.
İndi iddialarına baxın. Guya, Azərbaycan imkan verməyibmiş ki, təşkilat 7 fevral Prezident seçkilərində müşahidəçi qismində təmsil olunsun. Xüsusi dəvət gözləyirmişlər! Yaxşı, tutaq ki, AŞPA dəvət gözləyirmiş, bəs ermənipərəst buqələmun qütbün digər təmsilçisi Avropa Parlamenti necə? Bu qurum özü açıqlayıb ki, Azərbaycanda keçiriləcək Prezident seçkilərinə müşahidəçi göndərməyəcək. Başqa nə etsin? Göndərdikləri şəxslər gəlib görəcəklər ki, xalq iqtidarı dəstəkləyir. Axı onlara bu ssenari lazım deyil. Elə AŞPA-ya da həmçinin. Bu eyni bezin qıraqları olan təşkilatlara xaos, anarxiya, hərcmərcilik səhnələri gərəkdir. Belə bir vəziyyət olmayandan sonra Azərbaycanda nə işləri var?! Ölkəmizə seçki xüsusunda hədyan yağdırmaq, böhtan atmaq üçün əsas yoxdursa, şübhəsiz, demokratik seçki görmək də lazım deyil!
Torpaqlarımızın işğalından söz düşmüşkən, Azərbaycan vaxtilə AŞ ailəsinə ona görə qoşulmuşdu ki, erməni təcavüzünün aradan qaldırılması üçün yeni beynəlxalq platforma qazansın. Söhbət haqq və ədalət platformasından gedir. Avropa Şurasından, böyük ölçüdə nə haqq gördük, nə də ədalət. Qeyd etdiyimiz kimi, gördüyümüz növbətçi, heç bir əhəmiyyəti olmayan bəyanatlar oldu. Lakmus kağızına oxşar bəyanatlar...
AŞ erməni işğalının davam etməsi üçün manipulyativ yol tutdu. Həqiqətləri öz adı ilə çağırmayaraq, elan etdiyi təməl insan hüquq və azadlıqları prinsiplərinə tüpürdü. Susqunluğu ilə işğalı leqallaşdırmağa, onun beyinlərdə möhkəmlənməsinə çalışdı. Çünki məqsədləri bir idi –nəyin bahasına olursa-olsun erməni avantürizmini qorumaq.
İndi planları pozulub! Qəzəbləniblər! Azərbaycanda, guya siyasi məhbus var imiş. Görəsən, “insansevərlər” dinc azərbaycanlılar illərlə məhbusluqdan da ağır məcburi köçkün həyatı sürəndə, məhrumiyyətlərlə üzləşib ömürlərini çadır şəhərciklərində, vaqonlarda yurd həsrəti ilə için-için yanıb başa vuranda harada idilər? Yəqin, erməni konyakından içib ağızlarını köpükləndirirdilər! İndi nə edirlər! Heç şübhəsiz, erməni lobbi və diaspor təşkilatları içdiklərini zəhərə döndərir! Yəqin, bu səbəbdən Azərbaycana məhdudiyyət qoyulmasına çalışırlar...
Sən demə, xətirlərinə dəyib Laçın yoluna burunlarını soxmalarına imkan verməmişik. Hə, erməni təəssübkeşliyini lap yaxından həyata keçirmələrinin qarşısını almışıq. Bəlkə, yaramazlıqlarına fürsət tanımalı idik?..
Ümumən, AŞPA-dakılar işğal dövründə nə vaxtsa Ermənistanın qurumdakı səs hüququnu məhdudlaşdırmağı düşünüblərmi? Sual ritorikdir. Düşünmələri heç cür mümkün deyildi. Axı bunlar yalnız Azərbaycanı “görüblər”. Qərəzlərini ancaq ölkəmizin üzərinə töküblər.
Təsəvvür edin, ruspərəst xunta rejimi illərlə Ermənistanda insan hüquq və azadlıqlarına həqarət nümayiş etdirdi, AŞPA-dakılardan səs çıxmadı. Görəsən, niyə? Səbəb çox sadədir - ermənipərəstlik heç bir siyasi mövqedən asılı olmayan xəstəlikdir!
İndi istədikləri Ermənistandır. Rusiyaya qarşı duran, Moskvaya dönük çıxan ölkədir. Əlbəttə, belə bir Ermənistan naminə Azərbaycanın səs hüququnu məhdudlaşdırmaq da olar, hətta ölkəmizin qurumdan çıxarılmasını tələb etmək də!
Nəzərə alaq ki, nanəcib prinsipsizlərin insan hüquqları anlayışı nağıldan başqa bir şey deyil. Buyurub xislətlərini nümayiş etdirsinlər. Onsuz da erməni sevdası naminə hər cür yolverilməz davranışa baş vuracaqlarına zərrə qədər şübhə yoxdur...
Bəli, ərazi bütövlüyünü və suverenliyini tam bərpa edən Azərbaycana AŞPA-da yarımçıq, məhdud səslə təmsilçilik, əsla, lazım deyil. Bunu qurumun düşünməli beyinləri boş başlarına nə qədər tez yeritsələr, bir o qədər yaxşıdır. Onlar onu da düşünsünlər ki, Azərbaycana AŞ-də təmsilçilik heç lazım da deyil. Ölkəmiz təşkilata üzv dövlətlərlə ikitərəfli əlaqələrə malikdir və bu əlaqələr yalnız Azərbaycan deyil, elə həmin dövlətlərin özləri üçün də gələcək naminə etibarlı təminatdır.
Bir halda ki, Azərbaycan 2001-ci ildə AŞ-yə üzv olduqdan sonra, qurum ermənipərəst, islamofob qüvvələrin anti-Azərbaycan ritorikasının alətinə çevrilib, bizə lazımdırmı ki, bunun nəticəsi kimi İnsan Haqları üzrə Avropa Məhkəməsinin qərəzli, siyasi motivli qərarları ilə üzləşək? Ümumən, bizə bu məhkəmənin yurisdiksiyasında qalmaq nəyə lazımdır? Əlbəttə, lazım deyil!
Təbii, Azərbaycan Avropa ailəsindən ayrılmaq istəməz. Sözlərimiz elə anlaşılmamalıdır ki, biz özümüzü dünyadan təcrid etmək istəyirik. Belə deyil! Ortada aşkar mənzərə var. Mənzərə isə odur ki, Avropa təsisatları özlərinin eniş dövrünü yaşayırlar, batırlar. Prinsipsizlikləri səbəbindən etimadlarını itirirlər. Dünyadan uzaqlaşan onlardır. Bu təsisatlar süni nəfəs aparatına qoşulmuş xəstələrə bənzəyirlər. Başqa bənzətmələr də tapmaq mümkündür. Ancaq buna vaxt sərf etməyə lüzum görmürük.
Lüzum görmür və şans yaradırıq. AŞ-dəkilər əməlləri barədə yaxşı-yaxşı, soyuq başla düşünsünlər və nəticə çıxarsınlar. Ən əsası isə bir suala gecikmədən cavab tapsınlar – ambisioz Ermənistana, erməni avantürizminə görə Azərbaycandan üz döndərməyə dəyərmi?
XQ-nin analitik qrupu