Ermənilərin Qərbdəki lobbi qrupları saxta təbliğata yüz milyonlarla vəsait xərcləyirlər
Amerikanın Jewish Journal nəşri həmyerlimiz Dürdanə Ağayevanın Qarabağ ətrafında cərəyan edən hadisələrə həsr olunmuş məqaləsini dərc edib. Məqalənin Caliber.Az-dan qısa ixtisarla tərcüməsini oxuculularımızın diqqətinə çatdırırıq.
“Xocalı soyqırımının canlı şahidi kimi tez-tez deyirdim ki, həmin gecə yaşadığım dəhşətdən daha pisi yalnız dostlarımın, qohumlarımın və həmyerlilərimin o faciəli aqibətinin təkzibi ola bilər. Xoşbəxtlikdən bizim vaxtımızda həmin qanlı faciə hamı tərəfindən etiraf olundu, onu inkar edənlər isə qınaq obyektidir.
30 illik işğal dövründə etnik təmizləmə aparan və Vətənimin 900 kəndini, 7 şəhərini tamamilə məhv edən, ümumilikdə, 10 min kvadrat kilometrdən çox ərazisini xarabalığa çevirən Ermənistan Azərbaycanın Qarabağ bölgəsində silinməz izlər buraxıb. Həmin işğal ərazilərindən qovulan 1 milyondan artıq azərbaycanlı on illərlə məcburi köçkün həyatı yaşamağa məhkum edildi. Onların doğma şəhər və kəndləri isə işğalçı ermənilər tərəfindən, sözün həqiqi mənasında, talan və məhv edildi. 1990-cı illərin əvvəllərindən başlanan erməni hücumları nəticəsində 20 min azərnbaycanlı öldürüldü. Ermənistan dövləti Qarabağa basqın edəndə heç kəsə aman vermədi və heç nəyi salamat qoymadı”.
Bütün bunları ürəkağrısı ilə qələmə alan müəlif erməni vandallarının Qarabağda törətdikləri vəhşiliklərin miqyasından və hazırda bölgədə aparılan bərpa-quruculuq işlərindən yazır:
“2020-ci ildə İkinci Qarabağ müharibəsi nəticəsində Azərbaycan öz suveren ərazisini işğalçılardan təmizlədi və dərhal genişmiqyaslı bərpa-quruculuq işlərinə başladı. Bir zamanlar ölkənin ən abad və gözəl bölgəsi sayılan Qarabağdakı dağıntıların dərəcəsi sadəcə, insanı heyrətə gətirir. Torpaqlar azad olunandan sonra bugünədək Bakı işğalçıların məhv etdiyi neçə-neçə şəhər və kəndin bərpasına 7 milyard ABŞ dollarına yaxın vəsait qoyub. Məcburi köçkünlərin özlərinin ata-baba yurduna qayıtmaq hüququnu təmin etməkdən ötrü bərpa işləri sürətlə həyata keçirilir. 2020-ci ildən sonra mindən çox azərbaycanlı köçkün öz evinə qayıdıb. Proqnozlara görə, 2024-cü ilədək daha 10 min nəfər doğma yurdlarına qayıtmalıdır”.
Ermənistan qoşunlarının 30 il işğal dövründə Qarabağda 1 milyondan çox mina basdırdığını qeyd edən D.Ağayeva üç ilə yaxındır ki, Azərbaycanın həmin minaları təkbaşına, heç bir beynəlxalq yardım olmadan zərərsizləşdirməklə məşğul olduğunu diqqətə çatdırır:
“Müharibə başa çatandan sonra 300-dən çox azərbaycanlı həmin minaların qurbanı olub. Bu vəziyyət azad edilmiş ərazilərin bərpası və məcburi köçkünlərin qayıdışı üçün ciddi problemə çevrilib. Azərbaycan diqqətini bərpa prosesinə cəmlədiyi vaxt Ermənistan son iki il yarımda bölgənin çoxdan gözlədiyi sülhə maneçilik törətməklə məşğuldur. Onlar Qarabağı Ermənistanla birləşdirən Laçın yolundan bölgəyə mina, silah-sursat daşımaq, əsgər gətirmək və digər qanunsuz işləri üçün istifadə ediblər. Sülhə və regionda sabitliyə təhdid yaradan bu qeyri-leqal fəaliyyətə son qoymaqdan ötrü Bakı özünün suveren ərazisində, Ermənistanla şərti sərhədində nəzarət-buraxılış məntəqəsini yaratmağa məcbur oldu. İyunun 15-də Ermənistan tərəfdən Azərbaycan sərhədçilərinə atəş açılandan və bir hərbçimiz yaralanandan sonra 2 minə yaxın mülki erməni sərbəst şəkildə Ermənistana gedib-gəlmək üçün məhz bu sərhəd postundan istifadə ediblər. Elə o vaxtdan sərhəd məntəqəsi humanitar məqsədlər üçün, tibbi yardım üçün açıqdır.
Ötən ilin dekabrından bu günədək Beynəlxalq Qırmızı Xaç Komitəsi 700-dən çox xəstəni məhz Laçın yolu vasitəsilə Ermənistana aparıb. Amma Qarabağ ermənilərinə zəruri yüklərin çatdırılması üçün ən qısa yol Ağdam şəhərindən keçir və Azərbaycanın bu marşrutu təklifi, təəssüf ki, ermənilər tərəfindən rədd edildi, üstəlik, daşınmaya mane olmaqdan ötrü yola beton plitələr düzdülər”.
D.Ağayeva bölgədəki və sərhəddəki son durumu təfsilatı ilə təsvir etdikdən sonra İrəvanın və Xankəndidəki separatçıların Azərbaycanın ünvanına yalan və böhtan dolu iftiralar yağdırdığını, “blokada” dezinformasiyasını dövriyyəyə buraxdığını yazır. O, İrəvanın beynəlxalq hüquqa riayət etmək və Qarabağ ermənilərinə Ağdam yolu ilə yardımın çatdırılmasına şərait yaratmaq əvəzinə, Qərbdəki lobbi qruplarının milyonları hesabına satın aldıqları “siyasətçilərin”, “vəkillərin” vasitəsilə KİV-də şantajçı “blokada” kampaniyası apardığını vurğulayır.
Müəllif məqaləsini nikbin notlarla yekunlaşdırır:
“Mən fəxr edirəm ki, bu qədər problemin içində Vətənim Azərbaycan Qarabağın, etnik ermənilər də daxil olmaqla, hamının təhlükəsiz evi olması üçün mümkün olan hər şeyi edir. Qarabağ bölgəsinin gözəlliyinin bərpasının şahidi kimi hiss edirəm ki, mənim qızım, eləcə də sonrakı nəsillər əcdadlarımızın Vətənində sülh və əmin-amanlıq içində yaşaya biləcəklər. Ümid edirəm ki, suverenliyimizi və təhlükəsizliyimizi pozmaq cəhdləri puç olacaq, zorakılığı və müharibəni təbliğ edənlər kursu dəyişib sülhü seçəcək. Bunu reallığa çevirməyin məqamı yetişib”.
Təqdim etdi:
İ.HƏSƏNQALA,
“Xalq qəzeti”