Deyəsən, Qarabağ separatçıları son güllələrini bir-birinə atacaqlar
Azərbaycanın Qarabağ iqtisadi rayonunun Rusiya sülhməramlı kontingentinin müvəqqəti məsuliyyəti altında olan hissəsində yaşayan ermənilərin separatçı rejiminin tör-töküntüsünün başçısı Arayik Arutyunyanla sabiq “dövlət naziri” Ruben Vardanyan arasındakı qarşıdurma açıq müstəviyə keçib. R.Vardanyanın bugünlərdə yaydığı videomüraciət belə deməyə əsas verir. On bir dəqiqəlik müraciət “YouTube” videohostinqinə “Sən nə rəhbər, nə də baş komandan ola bildin” sərlövhəsi ilə yerləşdirilib.
Vardanyan həmin videoda Arutyunyanı kəskin tənqid edib. Qeyd edib ki, Arutyunyanın dediyi heç bir sözün dəyəri qalmayıb: “Mən səmimi sözlərimi bu vəziyyətə görə məsuliyyət daşıyan şəxsə ünvanlamaq istəyirəm. Bu, hazırkı “prezident” Arayik Arutyunyandır. Altı ay əvvəl vəzifədən gedəndə (qondarma rejimin “dövlət naziri” vəzifəsini nəzərdə tutur – S.H.) dedim ki, əgər “prezident” həqiqətən mübarizə aparmağa, “Artsax”da və ondan kənarda – Ermənistanda və diasporda olan soydaşlarımızın lideri və baş komandanı olmağa hazırdırsa, biz hamımız onun yanında olmalıyıq. Hər şeyi etməliyik ki, o, həqiqətən, bizi irəli aparsın və biz bütün çətinliklərin öhdəsindən gələk.
Bu gün Akobavəngdən (ləğv olunmuş Ağdərə rayonunun Kolatağ kəndi yaxınlığında yerləşən V-VII əsrlərə aid alban abidəsi–S.H.) çiyinlərində böyük yük, böyük məsuliyyət, məğlubiyyət hissi daşıyan Arayik Arutyunyana demək istəyirəm ki, siz nə lider, nə də baş komandan ola bildiniz. Çox təəssüf!”
O, əlavə edib ki, bir-birinə inam anlayışının Arutyunyan üçün heç bir əhəmiyyəti yoxdur: “Siz yalnız pul və vəzifə ilə hamını idarə etməyin mümkünlüyünə inanırsınız. Arayik, siz yanılırsız. Siz sözünüzün üstündə dura bilməməklə, sözünüzü heçə çevirməklə səhv etmisiniz. Həftənin əvvəlində dediniz ki, istefaya gedəcəksiniz və artıq qərar verdiyiniz üçün sizi yolunuzdan döndərməyə çalışmağa ehtiyac yoxdur. Birinci şəxsin sözünə artıq inamın olmaması ağırdır. Digər şəxslərə dediniz ki, sizə təzyiq var və vəzifədən getmək istəmirsiniz. Siz hər dəfə fərqli insanlara fərqli şeylər deyirsiniz və bu, qəbuledilməzdir. Siz bizim bir yumruqda birləşməyimizi istəmirsiniz və bu, adamı ağrıdır. Siz prinsipləri, dəyərləri, ideologiyanı, insan münasibətlərini ikinci dərəcəli hesab edirsiniz. Bu, kədərlidir, mənim sizə yazığım gəlir – sizin həyatınız dəhşətlidir”.
R.Vardanyan A.Arutyunyanın ötən həftə Qarabağ erməniləri ilə münasibətlərdə son qırmızı xətləri keçdiyinə əmin olduğunu bildirib. Daha sonra isə onu “dövlət qurumları”nı məhv etməkdə suçlayıb: “Siz “dövlət qurumları”nı məhv edirsiniz. Son 30 ildə müxtəlif insanların – istər yaxşı, istər pis – qurduğu “dövləti” məhv edirsiniz. Sizin buna haqqınız yoxdur. Siz etdiklərinizə görə qarabağlılara cavab verməli olacaqsınız. Mən onların yanında dayanacağam. Əgər onlar bu sualı vermirlərsə, bu, onların qərarıdır. Amma mən bir şeyə əminəm. Siz bir az sadəlövh, bəzən bir az hiyləgər, uşaqlarının Qarabağda böyüməsi üçün hər cür çətinliyə hazır olan “xalqımızın” ümid və inamını qırırsınız. İnsanlarda ən vacib olanı – bir-birinə olan inamı, milli və bəşəri dəyərləri məhv edirsiniz. Bu, qəbuledilməzdir, çünki bu, bizim hamımıza, bizim nəsillərimizə vura biləcəyiniz ən böyük zərbədir”.
***
“Qolos Armenii” ictimai-siyasi qəzetinin dünənki sayında dərc olunmuş “Arayik Arutyunyanın istefası çox şeyi dəyişəcək” sərlövhəli məqalə də diqqəti cəlb edir. Məqalədə bildirilir ki, BMT Təhlükəsizlik Şurasının iclası ermənilər üçün uğursuz olub: “Rejim lideri (Paşinyan rejimi nəzərdə tutulur – S.H.) “blokada”nın götürülməsi zərurəti ilə bağlı bütün bəyanatları öz aktivinə yazıb. Avqustun 16-dan sonra Paşinyanın xüsusi tapşırıqlar üzrə səfiri Edmon Marukyan bəyanat verməyə tələsib ki, BMT Təhlükəsizlik Şurasına müraciət heç də Ermənistanın sülh sazişi üzrə danışıqlardan çıxması demək deyil. Marukyan müqavilənin mətni üzrə işlərin sentyabr ayında davam etdiriləcəyinə ümid bəsləyib. Azərbaycan mediası sülhməramlıların Rusiya pasportu olan yerli sakinləri Qarabağdan evakuasiya etdiyi barədə məlumat yayır. Atəşkəs pozuntularının artması fonunda erməni mənbələrinin də təsdiqlədiyi bu məlumat təşviş doğurmaya bilməz”.
Politoloq Armen Badalyan vurğulayıb ki, İrəvanda və Xankəndidə çoxları ümidlərini Təhlükəsizlik Şurasının iclası ilə vəziyyətin yaxşılaşacağına bağlamışdı: “Ancaq Təhlükəsizlik Şurasının iclası bir daha sübut etdi ki, Rusiyanın Ukraynada xüsusi əməliyyatı başlayandan sonra bütün məsələlər silahın gücü hesabına həllini tapır”. Onun sözlərinə görə, guya, yeni dünya nizamında BMT və digər nüfuzlu beynəlxalq təşkilatlar öz maraqlarından çıxış edərək qərarlar qəbul edirlər, heç kimə sirr deyil ki, bəzi hallarda bu təşkilatların sözləri əməldən xeyli fərqlənir. Badalyan Qarabağdakı vəziyyətin həllini birbaşa hakimiyyətin dəyişməsi ilə əlaqələndirib.
Onun sözlərinə görə, Qarabağda “parlamentin sədri”nin dəyişdirilməsi heç də təsadüfi deyildi. Lakin prosesə 50 faiz Paşinyanın, 50 faiz də Rusiya sülhməramlılarının təsiri altında olan A.Arutyunyanın istefasını tələb etməklə son qoyulmalıdır. Badalyanın fikrincə, nə qədər ki, Qarabağda ikili hakimiyyət var, vəziyyətdən çıxış yolu olmayacaq: “Xatırladım ki, general Vitali Balasanyanı, guya, Qarabağdan tankları çıxarmaqda ittiham edən “Təhlükəsizlik Şurası”nın keçmiş katibi, general Samvel Babayan birbaşa danışıqların qəti tərəfdarıdır”.
Badalyan hesab edir ki, Qarabağ probleminin yekun həlli bilavasitə Rusiyanın Ukraynadakı xüsusi əməliyyatının nəticəsindən asılıdır. Qərb mediasının 2024-cü ildə Ukrayna Silahlı Qüvvələrinin növbəti əks-hücumunu proqnozlaşdırmasına baxmayaraq, Badalyan xüsusi əməliyyatın 2024-cü ildə başa çatacağı ilə bağlı proqnozlar səsləndirib. Onun sözlərinə görə, bundan 3-4 həftə sonra Moskva Qarabağ problemi ilə məşğul olacaq.
Təhlilçi Edqar Elbakyan, əksinə, hesab edir ki, bu cür bəyanatlar miflərlə həmsərhəddir. Çünki onun fikrincə, Rusiya Federasiyasının xüsusi əməliyyatın nəticəsinin necə olmasından asılı olmayaraq, Cənubi Qafqazda müasir strategiyası yoxdur. Elbakyan hesab edir ki, Qarabağdakı vəziyyətə təsir etməyin yeganə yolu Ermənistanda hakimiyyət dəyişikliyidir.
***
Bu arada “Sputnik Ermənistan” agentliyinin dünən yaydığı məlumat da xüsusi maraq doğurur. Qeyd olunur ki, Rusiya sülhməramlıları avqustun 21-də 60 nəfərə yaxın şəxsi Qarabağdan çıxarıblar. Bunlar Rusiya vətəndaşları, həmçinin Ermənistan və digər ölkələrin ali məktəblərinə daxil olmuş tələbələrdir. Vətəndaşların daşınması iyunun 14-dən bəri ilk dəfə həyata keçirilir. Rusiya vətəndaşları bütün bu müddət ərzində Qarabağı tərk etmək üçün gözləyiblər. Sülhməramlı kontingentlə əldə olunan razılaşmalara əsasən, yaxın vaxtlarda Rusiya vətəndaşlarının və tələbələrinin çıxarılması davam etdiriləcək.
Erməni mənbələri çıxarılan şəxsləri sadəcə, Rusiya vətəndaşları və tələbələr kimi təqdim etsələr də, əslində, dünən Xankəndi–Gorus istiqamətində “Laçın” sərhəd-buraxılış məntəqəsindən sərbəst keçidi təmin edilən 60-a yaxın erməni əsilli şəxs adi insanlar deyillər. Onların əksəriyyəti Rusiya vətəndaşlığını qəbul etmiş, RF pasportu daşıyan, əsasən, Azərbaycan ərazisində separatizmi alovlandırmağa çalışan, ona dəstək verən şəxslərdir.
Göründüyü kimi, həm Vardanyan–Arutyunyan qarşıdurmasının açıq müstəviyə keçməsi, həm erməni politoloqların hansısa möcüzəyə ümid etmələri, həm də Qarabağdan Rusiya vətəndaşlarının çıxarılması proseslərin geridönməz şəkil aldığını göstərir. Artıq ermənilər Azərbaycan cəmiyyətinə reinteqrasiyadan başqa çıxış yollarının qalmadığını aydın dərk edirlər. Azərbaycan dövlətinin addım-addım öz hədəflərinə çatmaq istiqamətində yürütdüyü siyasət öz bəhrəsini verməkdədir.
Fikrət SADIXOV,
politoloq
– Azərbaycan Qarabağdakı ermənilərə təhlükəsiz həyat təklif edir, bunu istəməyənlərə qapı açıqdır, çıxıb gedə bilərlər. Ölkəmizin mövqeyi beynəlxalq praktikaya uyğundur. Hər bir dövlət ərazisində yaşayan azlıqlara öz maraqlarını qoruyaraq, ərazi bütövlüyünü üstün tutaraq, hüquqlar verir, onların təhlükəsizliyini təmin edir. Biz də bunu edirik və bundan sonra da etməyə hazırıq. Ermənilər Laçın yolunu vaxtilə tamamilə başqa məqsəd üçün istifadə ediblər. Oradan silah-sursat, terrorçular, qeyri-humanitar yardımlar daşınırdı. Təbii ki, biz buna razı ola bilməzdik. Ona görə də dinc şəkildə torpaqlarımızda yaşamaq istəməyənlərə qapı açıqdır, ərazimizi tərk edə bilərlər, bu məsələdə heç bir maneə yoxdur.
Azərbaycan Qarabağda yerləşən 10 min nəfərlik qeyri-qanuni silahlı dəstənin çıxarılmasına nail olmalıdır. Bizi daha çox narahat edən məsələ onların Qarabağdakı varlığıdır. Bizim onları ərazimizdən çıxarmaqdan başqa yolumuz yoxdur və mütləq çıxaracağıq. Oradakı separatçılar hələ ki regionda maraqları olan havadarlarına arxalanırlar. Amma zaman göstərir ki, biz bir çox məsələlərlə hesablaşmırıq, bizim üçün əsas məsələ öz maraqlarımızdır və bu maraqlar çərçivəsində hərəkət edəcəyik. Əgər bu xəttə gəlib çatmışıqsa, sonadək getməliyik. Hələlik diplomatik müstəvidə ciddi şəkildə xəbərdarlıq edirik. Dünya birliyi, beynəlxalq təşkilatlar, Ermənistan və Qarabağda yaşayan etnik ermənilər bunu bilsinlər ki, Qarabağın erməni sakinləri Azərbaycan qanunları ilə yaşamalıdırlar.
Səxavət HƏMİD, “Xalq qəzeti”