Özlərini Şərqi Avropada Atillanın yadigarları sayan macarların Azərbaycanla çoxtərəfli əməkdaşlığı yüksələn xətlə inkişaf edir
Azərbaycan Prezidenti İlham Əliyev çıxışlarında dəfələrlə bildirib ki, 44 günlük Vətən müharibəsi Azərbaycana əsl dostlarının kim olduğunu göstərdi. Axı müharibə dinc dövrdən fərqli olaraq həm də sınaq anıdır. O çətin günlərin sınağından üzüağ çıxaraq Azərbaycanın yanında duran ölkələrdən biri də Macarıstandır.
2021-ci il martın 10-da cənab İlham Əliyevin Macarıstanın xarici işlər və ticarət naziri Peter Siyartonu videoformatda qəbul edərkən dediyi sözlər iki ölkə arasındakı səmimi dostluq münasibətlərini dəqiq xarakterizə edir: “Əminəm ki, Macarıstan şirkətlərinin də Azərbaycanın işğaldan azad edilmiş ərazilərində bizimlə birlikdə çalışmaqla bağlı çoxlu imkanları olacaq”.
Avqustun 20-də Budapeştdə Macarıstanın Milli bayramı – Müqəddəs Stefan Günü münasibətilə silsilə tədbirlər keçirildi, yüksək qonaqların şərəfinə ziyafət verildi. Həmin tədbirlərdə Avropa və Asiyanın bir çox ölkələrindən dövlət və hökumət başçıları, siyasətçilər və biznesmenlər iştirak edirdilər.
Bu münasibətlə Budapeştdə işgüzar səfərdə olan Azərbaycan Respublikasının Prezidenti İlham Əliyev və birinci xanım Mehriban Əliyeva Budapeştdə bayram tədbirinə qatılıblar. Həmin gün Prezident İlham Əliyevin Macarıstanın Baş naziri Viktor Orban ilə görüşü olub. Görüşdə Baş nazir ölkəsinə səfərə dəvəti qəbul etdiyinə görə İlham Əliyevə minnətdarlığını bildirib. Dövlətimizin başçısı, öz növbəsində, V.Orbana Macarıstanın Milli bayramı münasibətilə təbriklərini çatdırıb və onu Azərbaycana səfərə dəvət edib.
Görüş əsnasında iki ölkə arasında enerji, o cümlədən, neft-qaz sahəsində əməkdaşlığın uğurla inkişaf etdiyi qeyd olunub, Azərbaycan qazının Macarıstan bazarına çatdırılmasının əhəmiyyəti vurğulanıb. Eləcə də qida sənayesi sahəsində Macarıstanın Azərbaycana sərmayə qoyması, əczaçılıq sahəsində əməkdaşlıqla bağlı əldə olunmuş müsbət dinamika qeyd edilib. Söhbət zamanı, həmçinin Macarıstan aviadaşıyıcısı vasitəsilə Bakı–Budapeşt reyslərinin həyata keçirilməsinin önəminə toxunulub, ümumilikdə, ikitərəfli əlaqələrin inkişafından məmnunluq ifadə olunub.
Macarıstanın Milli bayramı münasibətilə Tatarıstanın başçısı Rustam Minnixanovun, Qətər əmiri Təmim bin Həməd Al Saninin Budapeştə gəlməsi, ümumiyyətlə, bayram tədbirlərinə qatılan ölkələrin coğrafiyası onu göstərir ki, Macarıstan Şərqi Avropada üstün mövqelərə çıxan ölkə statusunu qazanıb.
Əməkdaşlıqda etibarlı, dostluqda sədaqətli
Birmənalı şəkildə deyə bilərik ki, Azərbaycan–Macarıstan münasibətləri dostluq, qardaşlıq prinsiplərinə əsaslanır. Macarıstan Azərbaycanın müstəqilliyini ilk tanıyan dövlətlərdən olub və iki ölkə arasında diplomatik əlaqələr 1992-ci ilin əvvəlindən qurulub.
Həm müharibəyəqədərki, həm də postmüharibə dövründə Azərbaycan Macarıstanla Türk Dövlətləri Təşkilatı (TDT) və digər beynəlxalq platformalarda uğurla əməkdaşlıq edir. 2018-ci ildən TDT-də müşahidəçi statusuna malik, təşkilatla əlaqələrinin inkişafına böyük əhəmiyyət verən rəsmi Budapeşt milli bayrağının məhz türkdilli dövlətlərin bayraqlarının yanında dalğalanmasını istədiyini gizlətmir. Macarıstan paytaxtında qurumun nümayəndəliyi fəaliyyət göstərir.
Bir maraqlı məqamı da xatırlatmağımız yerinə düşər. Baş nazir Viktor Orban 2018-ci ildə verdiyi bəyanatında bildirmişdi ki, macarlar özlərini Hun hökmdarı Atillanın nəslindən hesab edirlər və macar xalqı hun-türk köklərinə əsaslanır. Təsadüfi deyil ki, 2019-cu il oktyabrın 15-də Bakıda Türkdilli Dövlətlərin Əməkdaşlıq Şurasının (o vaxt TDT belə adlanırdı – red.) VII Zirvə görüşünə Macarıstanın Baş Naziri Viktor Orban da qatılmışdı. Baş nazir çıxışında ölkəsinin Türk dövlətləri ilə həmrəy olduğunu açıq şəkildə nümayiş etdirdi.
Macarıstan və Azərbaycan iki dost və tərəfdaş ölkə kimi istər ikitərəfli əməkdaşlıq çərçivəsində, istərsə də təmsil olunduqları beynəlxalq təşkilatlarda daim bir-birinə qarşılıqlı dəstək verirlər. Yeri gəlmişkən, Azərbaycan və Macarıstan arasındakı çoxspektrli sıx əlaqələr Avrasiya qitəsi üçün də böyük əhəmiyyət daşıyır.
Qarabağ münaqişəsində haqqın, ədalətin tərəfdarı kimi çıxış edən Macarıstan Azərbaycanın ərazi bütövlüyünü daim dəstəkləyib. Yuxarıda qeyd etdiyimiz kimi, işğaldan azad olunmuş Qarabağ torpaqlarında aparılan bərpa-quruculuq işlərində yaxından iştirak edən Budapeşt, eyni zamanda, minatəmizləmə fəaliyyətinə dəstək məqsədilə ölkəmizə 25 min avro ianə ayırıb. Onu da qeyd edək ki, iki ölkə arasında əlaqələrin daha da gücləndirilməsi üçün işlər sistemli şəkildə aparılır.
Strateji tərəfdaşlığa keçid
İki ölkə arasında strateji əməkdaşlığa təkanverici amil İlham Əliyevin dövlət başçısı kimi bu ilin yanvar ayında Macarıstana rəsmi səfəri oldu. Həmin səfər qarşılıqlı maraq doğuran bir sıra sahələr üzrə əməkdaşlığı yeni mərhələyə daşımağa xidmət edirdi. Səfər zamanı Azərbaycanın dövlət başçısı və Macarıstanın Baş nazirinin imzaladıqları sənədlər arasında ən mühümü iki ölkə arasında Strateji tərəfdaşlığın möhkəmləndirilməsi barədə Birgə Bəyannamə oldu. İqtisadi sahəni də əhatə edən həmin bəyannamə, eləcə də digər sənədlər əməkdaşlığın daha da genişləndirilməsi üçün baza rolunu oynayır. Budapeşt Bakı ilə enerji sahəsində də əməkdaşlığa böyük önəm verir və Avropanın enerji təhlükəsizliyinin təminatında Azərbaycanın oynadığı rolu yüksək qiymətləndirir. Dost ölkənin Orta dəhliz layihəsini də dəstəkləməsini, ona qoşulmaq niyyətini bildirməsini ayrıca qeyd etmək lazımdır.
Əldə olunmuş razılığa əsasən, Azərbaycan qazı interkonnektorlar vasitəsilə Bolqarıstana, oradan Rumıniyaya, ondan sonra Macarıstana, daha sonra digər Avropa ölkələrinə çatdırılacaq. 2023-cü ilin dördüncü rübündə Macarıstan Azərbaycandan 100 milyon kubmetr qaz almalıdır. Bununla bağlı Macarıstanın MVM CEEnergy şirkəti ilə Azərbaycanın SOCAR neft-qaz şirkəti arasında 2023-cü ilin sonuna qədər Macarıstana ildə 2 milyard kubmetrə qədər mümkün artımla 100 milyon kubmetr qaz tədarük edilməsi barədə saziş imzalanıb. Budapeşt uzun müddətdir ki, Azərbaycanla əməkdaşlığı inkişaf etdirir və enerji daşıyıcıları ilə bağlı imzalanan saziş qaz tədarükünün daha da artırılmasına, onun həcminin bir milyard kubmetrə çatdırılmasına imkan verəcək. Bundan başqa, Macarıstanın daxili rezervuarlarında 50 miyon kubmetr Azərbaycan qazının saxlanmasına dair razılıq əldə edilib.
Bəli, Azərbaycan və Macarıstan TDT-də, eləcə də digər nüfuzlu beynəlxalq təşkilarlarda uğurlu əməkdaşlıq ənənəsinə malikdir. TDT-də müşahidəçi ofisinə malik Budapeşt türkdilli ölkələrlə münasibətlərin inkişafına böyük əhəmiyyət verir. Macarıstanla əməkdaşlıq Azərbaycanın Mərkəzi və Şərqi Avropa ölkələri ilə münasibətlərində xüsusi yer tutur. Son iyirmi ildə Bakı və Budapeşt arasında ikitərəfli əlaqələrin dinamikasına diqqət yetirsək görərik ki, bu əlaqələr yalnız yüksələn xətt üzrə gedir. Macarıstan Azərbaycanın strateji tərəfdaşı, Avropa İttifaqında ən etibarlı müttəfiqlərindən biridir. İki ölkə arasında əməkdaşlıq TDT ilə yanaşı, çoxtərəfli platformalarda, o cümlədən BMT, ATƏT, NATO, Şərq Tərəfdaşlığı kimi təşkilatlarda inkişaf etməkdədir.
Böyük Turan Qurultayının ev sahibi
Bu gün Macarıstanda xeyli sayda azərbaycanlı yaşayır. Dost və qardaş ölkənin universitetlərinə üz tutan gəclərimizin sayı ilbəil artmaqdadır. Onu da qeyd etməliyik ki, təhsil sahəsində əməkdaşlığın səmərəsi hiss olunmaqdadır və müsbət nəticələr var. Hazırda 200 azərbaycanlı gənc Macarıstan hökumətinin dəstəyi ilə (tələbə təqaüdləri) bu ölkədə təhsil alır. Aydın məsələdir ki, bu fakt respublikamızda çağdaş tələblərə cavab verən kadr potensialının yaradılması istiqamətində çox önəmli hadisədir. Buna qarşılıq olaraq Azərbaycan Universitetində Macar dili və mədəniyyəti mərkəzi fəaliyyət göstərir.
Macarlar özlərinin soykökünə sadiq, əcdadları ilə qürur duyan xalqdır. Avropanın ortasında qərar tutmalarına baxmayaraq dillərini yad təsirlərdən hifz etməyi bacarıblar. Macarlar hunların nəslindən, Atillanın nəvələri olduqlarına inanırlar. Deylənlərə görə, böyük Türk ailəsinin Qərbdə məskən salmış bir qolu hesab olunan macarların əcdadları Orta Asiyadan, Güney Uraldan və Qafqazdan gələndir.
İyirminci əsrdə 45 il “sosialist düşərgəsi”ndə qalmalarına rəğmən, heç vaxt keçmişini, soykökünü unutmayan macarların tarixlərinə sayğı və sadiqliklərinin bir örnəyi də Dünya Hun-Türk Qurultayının məhz Macarıstanda keçirilməsidir. 2008-ci ildən etibarən iki ildən bir təşkil olunan, həm də Böyük Turan Qurultayı adlanan tədbir açıq havada düzənlənir. Bu möhtəşəm yarışa dünyanın müxtəlif yerlərindən türkdilli xalqların nümayəndələri təşrif buyurur və özlərinə məxsus milli adət-ənələri nümayiş etdirirlər. Sonda qədim türk tayfalarına məxsus atüstü yarışlarda güclərini sınayırlar. Amma, həmin yarışların axırında qalib-məğlub olmur. Hamı – süvarilər də, piyadalar da yan-yana düzülüb, çiyin-çiyinə dayanıb Atillasayağı hayqırırlar. Böyüməkdə və bütövləşməkdə olan Türk dünyasının səsini Avropaya, eləcə də bütün dünyaya duyurmaqdan ötrü qələbəni bərabər bayram edirlər.
İmran BƏDİRXANLI, “Xalq qəzeti”