Qarabağ ermənilərinin nicatı Ağdam–Əsgəran yolundadır
Avropa İttifaqının xarici işlər və təhlükəsizlik siyasəti üzrə ali nümayəndəsi Jozep Borrel haqlı idi. Azərbaycan hakimiyyətinin Ağdam vasitəsilə Qarabağa humanitar yüklərin çatdırılmasına hazır olduğunu diqqətə çatdırmış Borrel düz deyirdi ki, Ağdam yoluna Laçın dəhlizinin alternativi kimi baxmaq olmaz.
Əlbəttə, avropalı ali nümayəndənin məsələyə hansı prizmadan baxdığını mübahisələndirmək niyyətindən uzağıq. Yəni, demək istəmirik ki, Aİ-nin rəsmi nümayəndəsi belə fikir bildirməklə, Azərbaycanın təklif etdiyi variantın məqbulluğuna dair subliminal mesaj vermişdi. Nə də cənab Borrelin xam xəyala düşdüyündən, Laçın yolunun açılmasının qaçılmazlığını nəzərdə tutduğundan söz açmaq fikrindəyik.
Əsas məsələ, ümumən, artan ermənipərəstlik dalğası fonunda Azərbaycanın mövqeyinin hansısa formada gündəmə gətirilməsidir. Hesab edirik ki, dünya həmin dalğadan xilas olduqca tərdricən Bakının baxışlarına köklənəcək. Bunun bir qədər zamana ehtiyacı var. Zamana və dirənişə. Qətiyyətlə demək olar ki, ötən həftə həmin zamanı udmaq üçün göstərdiyimiz dirəniş baxımından əlamətdar oldu.
Bəli, Azərbaycan dirənir. Ölkəmiz prinsiplərində qətiyyətli və ardıcıldır. Prinsip isə budur ki, qanuni ərazilərimizə yiyələnməliyik. Əzmimiz qarşısında dayanacaq güc yoxdur. Bu isə o deməkdir ki, erməni təbliğat maşınının təsiri ilə anti-Azərbaycan mövqe tutan tərəflər tədricən arxa plana keçəcəklər. Zamanla hay-küy, mənasız pafos öz yerini soyuq reallıqlara və faktlara verəcəkdir. Hələlik isə böyük şairimiz Xəil Rza Ulutürkün təbirincə desək, “davam edir 37.”
Əslində, şairin fikirlərini əbəs yerə xatırlamadıq. Ermənistan hakimiyyəti, onun havadarları, ermənipərəst dairələr 30-cu illərin repressiyası havasına kökləniblər. Azərbaycanı dünyaya Qarabağ ermənilərinə qarşı repressiya aləti qismində təqdim edirlər. Etnik təmizləmə, soyqırımı və sair iddialar da öz yerində. Erməni təbliğat maşını hazırda bütün hüquq normalarına tüpürməklə məşğuldur. Beynəlxalq ictimaiyyətin bəzi qütbləri isə bunu ana südü kimi qəbul edirlər.
Məsələn, Avropa Şurasının baş katibi Mariya Peyçinoviç-Buriç. Bu xanım bəyanat yayaraq Laçın dəhlizi boyunca sərbəst hərəkətin bərpasına çağırıb. Niyə? Nə üçün? Avropa Şurası Azərbaycanı quruma hansı ərazilərdə qəbul edib? Yenə həmin ərazidir də. Bu ərazinin Ermənistanla sərhədi olmamalı idi? Azərbaycan öz sərhədinə nəzarəti həyata keçirib, qanunlarını tətbiq etməli deyildi? O zaman biz nə üçün Avropaya şengen vizası ilə gedirik?..
Digər yandan, Azərbaycan başqa qonşuları ilə də quru sərhədlərini açmayıb. Oktyabradək ölkəmizdə xüsusi karantin rejimi qüvvədədir. Nə üçün Ermənistan istisna olmalıdır? Amma ölkəmiz bu istisnanı etdi. Bir çox şeyləri nəzərə aldı. Sərhəddə normal-gediş gəliş oldu. Erməni təbliğat maşını isə həmin müddətdə də blokada məntiqini sürdürdü. Mariya Peyçinoviç-Buriçin dostları isə ermənilərə züy tutmaqla məşğul oldular. Nəticədə, Azərbaycanın adı yenə pis çıxdı. Madam ki, hər bir halda ölkəmizə qarşı qarayaxma davam edəcək, o zaman nə üçün sərhədi açaq? Onsuz da ermənipərəstlər öz oyunlarından çəkinmirlər.
Başqa bir yandan, Avropa Şurasının baş katibi nə üçün təmsil olunduğu qurumun erməni işğalını pisləyən bəyanatlarını yada salmır? İşğal ölkəmizin 86,6 min kvadratkilomertlik ərazisinə qarşı həyata keçirilmişdi. O əraziyə ki, onunla Azərbaycan quruma daxil olmuşdu. Laçın dəhlizi də həmin ərazidədir. Görəsən, xanım Peyçinoviç-Buriç bunu bilmirmi? Bilməmiş olmaz. Elə isə nə üçün obyektiv ola bilmir? Məsələn, o, deyə bilər ki, Azərbaycan vətəndaşları olan Qarabağ ermənilərini özü təmin etməlidir. Ancaq bölgədəki separatçı rejim Ağdam-Əsgəran yolunu kəsərək buna maneçilik törətməkdədir. Yox, deməz axı. Bəs, ermənipərəstlik damarını kim işə salsın? Kim erməni mənafeləri üçün çalışsın?
Xanım Buriç bildirir ki, Qarabağdakı ağır humanitar və insan haqları vəziyyətindən son dərəcə narahatdır. O zaman vaxtilə Xankəndidə, Ağdərədə yaşamış, indi ora gedə bilməyən azərbaycanlıların da insan hüquqlarından məhrum olduğundan narahatlığını ifadə etməlidir. Edirmi? Xeyr! Demək ki, gedib işi ilə məşğul olmalıdır. Yox bir, narahat imiş!
Avropa Şurasının baş katibi öz aləmində, guya, balans yaratmağı da yaddan çıxarmır. O deyir ki, hər iki tərəfi Laçın dəhlizindən azad və təhlükəsiz keçidi sürətlə təmin etmək məqsədilə həqiqi dialoqa çağırır. Bəli, yaxşı çağırışdır. O anlamda ki, həmin keçiddən azərbaycanlılar da keçsinlər. Keçsinlər və gedib vaxtilə qovulduqları dədə-baba torpaqlarında məskunlaşsınlar. Doğulub boya-başa çatdıqları Qərbi Zəngəzuru, İrəvanı, Göyçəni və sair yerləri görsünlər. Belə olduqda, xanım Buriçin də üzərində əsdiyi insan hüquqları özünün təntənə anını yaşayar. Ancaq təəssüf ki, dünya bu təntənəni görmək istəmir, erməni avantürizminin yenidən təcəllisi üçün çalışır. İnsan haqlarını tapdama da məhz mövcud kontekstdə baş verir.
Ötən həftə insan haqlarına saymazdan gələn, ermənipərəst mövqe tutan daha bir beynəlxalq kəsim Almaniya Bundestaqının deputatları oldu. Onların bir qrupu bəyanat yayaraq Azərbaycandan Laçın dəhlizinin açılmasını tələb edib. Bu “nemeslərin” fikirlərini ifadə edən isə Bundestaqın İnsan Haqları Komissiyasının sədri Renata Alt idi. O, Almaniya hökumətinin Cənubi Qafqaz, Moldova və Mərkəzi Asiya ilə cəmiyyətlərarası əməkdaşlıq üzrə koordinatoru, Bundestaqın deputatı, Bundestaqın ATƏT-in Parlament Assambleyasındakı nümayəndə heyətinin rəhbəri Robin Vaqener, Bundestaqın deputatı, Xarici Əlaqələr Komitəsinin üzvü Merle Şpelerberq və başqaları daş atıb başlarını tutdular ki, bəs insan həyatı geosiyasi faktor ola biməz. Əslində, bu fikir son dərəcə yerindədir. Bəli, insan həyatının geosiyasi amilə çevrilməsi yolverilməzdir. Ancaq indiki durumda bunu edən Ermənistan hakimiyyətidir.
İnsanların həyatları üzərində oyun quranlar, eyni zamanda, Ermənistanın havadarları, ölkəyə dəstək olan qütblər, həmçinin bu vaqnerlər, renata altlar, robin vaqnerlərdir. Onlar rəsmi İrəvanla birləşib Qarabağın erməni əhalisinin durumunu ağırlaşdırmaq yolu tuturlar. Bu qəddarlar hazırda dünya erməniliyinin, ekstremist erməni millətçiliyinin “Azərbaycanın hakimiyyəti altında olmayan Qarabağ”, bu alınmadıqda isə “ermənilərsiz Qarabağ” formulunu gerçəkləşdirməyə çalışırlar.
Birinci halda Qarabağda separatçılıq saxlanılır, ikinci halda isə erməni avantürizmi niskilə çevrilir. Bu gün baş verənlər, o cümlədən Ermənistanın Azərbaycanla şərti sərhəddə, Həkəri körpüsü üzərindəki buraxılış məntəqəsi zonasında düzənlənmiş “tır şousu” birinci planın tərkib hissəsidir, bu istiqamətdəki müqavimətin son akkordlarıdır. Amma diqqət edək ki, ikinci “planın” da anonsu indidən verilməkdədir. Söhbət Azərbaycanı Qarabağda etnik təmizləmə aparmaqda, soyqırımı törətməkdə günahlandırmaqdan gedir.
Dediyimiz kimi, birinci “plan” alınmasa, ikinciyə keçiləcək. Erməni millətçiliyi bu işdə “peşəkardır”. Vaxtilə xalqlar arasında ədavəti qızışdırmaq üçün Sumqayıt ermənilərini qətlə yetirənlərin nəsillərinin indi eyni əməlləri Qarabağda reallaşdırmaq istəyəcəklərinə şübhə yoxdur. Bu azğınlar belə qəddarlıq edib Azərbaycanı ittiham edəcək təbiətdədirlər. 44 günlük müharibənin sonlarına yaxın da oxşar qeyri-insani davranışı gerçəkləşdirmək fikrinə düşmüşdülər. Xankəndidə və digər əraziləridəki sıravi erməniləri qırmaq, Azərbaycanı soyrıqımında günahlandırmaq istəmişdilər. Bu mənfur ssenarini reallaşdırmaq üçün bölgəyə xaricdən jurnalist ordusu da gətirmişdilər. Media təmsilçiləri “soyqırımı barədə” dünyaya məlumat ötürməli, hadisə yerindən canlı yayımlar etməli idi.
İndi də Azərbaycana ittiham üzərində irəli sürülən soyqırımı, etnik təmizləmə kimi fikirlər, əslində, Bakının şantaj etməkdən başqa bir şey deyil. Demək istəyirlər ki, sadə erməni əhalini məhv edib günahı Azərbaycanın üstünə atmaq “potensialındadırlar”. Qarabağdakı erməni silahlıları ona görə ərazini tərk etməyiblər. Aydındır ki, onlar Azərbaycanla döyüşəcək gücdə deyillər. Gücləri yalnız əliyalın insanlara çatar.
Bəli, belə görünür, buriçlər, vaqenerlər, renata altlar, robin vaqnerlər və digərləri məhz buna görə çalışırlar. Ermənistan hakimiyyəti belələrinin sırasını geniş tutmağa can atır. Mövcud istiqamətdə müəyyən şəxslərin dilindən saxta bəyanatlar səsləndirilir, interpretasiyalara yol verilir. Birincisi, heç bir halda Laçın yolu açılmayacaqdır. Həm də ona görə ki, dəhliz məntiqi qəbuledilməzdir. Ermənistan bununla bağlı Beynəlxalq Ədalət Məhkəməsinin qərarına istinad edirsə, nəzərə almalıyıq ki, həmin məhkəmə bir müddət əvvəl Ermənistanın Həkəri körpüsündə sərhəd nəzarət-buraxılış məntəqəsinin ləğvi ilə bağlı iddiasını rədd edib. Belə olan halda dəhliz məntiqinin heç bir əhəmiyyəti qalmır. Rəsmi İrəvan, eləcə də digər ermənipərəstlər hay-küy qaldırarkən, mövcud məqamı da nəzərə almalıdırlar.
İkincisi, Azərbaycan çeşidli təzyiqlər qarşısında özünün haqlı mövqeyindən geri çəkilən deyil. Əgər Qarabağda humanitar böhran və ya humanitar fəlakət yaşanırsa, ölkəmiz bu durumun aradan qaldırılmasına kömək göstərməyə hazırdır. Yəni Qarabağ ermənilərinin nicatı “Laçın dəhlizi”ndə yox, Ağdam-Əsgəran yolundadır.
Ə.CAHANGİROĞLU, “Xalq qəzeti”