Meşəli qatilini “millətin fədaisi” obrazında təqdim etmək üçün dəridən-qabıqdan çıxırlar 

Qanunsuz erməni silahlı birləşmələrinin üzvlərinin 1991-ci ilin dekabrın 22-də Xocalı rayonunun Meşəli kəndində törətdikləri qətliamda iştirak etməkdə ittiham olunan Vaqif Xaçatryanın iyulun 29-da Dövlət Sərhəd Xidmətinin hərbi qulluqçuları tərəfindən saxlanılması Ermənistanda və Qarabağ iqtisadi rayonunda yaşayan ermənilər arasında yeni isterika dalğasının yaranmasına səbəb olub.

Ermənistanın dövlət qurumları, o cümlədən xarici işlər nazirliyi, fəaliy­yətdə olan və keçmiş ombudsmanı, parlamentdəki fraksiyaların başçıları, deputatlar, siyasi partiya sədrləri və ic­timaiyyət nümayəndələri olaya münasi­bət bildiriblər. Onlar ənənəvi iftira, böh­tan atmaq yolunu tutaraq Azərbaycanı “adam oğurluğunda” (?) ittiham ediblər. Sosial şəbəkələrin erməni seqmenti Azərbaycana nifrəti körükləyən payla­şımlarla dolub-daşır. Onların bir ittihamı da Azərbaycanın, guya, beynəlxalq hu­manitar hüququ pozmasıdır.

Qarabağdakı haylar saxlanılma ha­disəsinin baş verdiyi gün – iyulun 29-da günortadan sonra Beynəlxalq Qırmızı Xaç Komitəsinin Xankəndidəki ofisinin qarşısında Xaçatryanın geri qaytarıl­ması tələbi ilə aksiya keçiriblər. Özünü separatçıların “dövlət naziri” adlandı­ran Qurgen Nersisyan, “ombudsman” Qeqam Stepanyan, “daxili işlər naziri” Karen Sarkisyan BQXK-nın Qarabağ­dakı ofisinin rəhbəri Karlos Moratsani ilə görüşərək insidentlə bağlı müzakirələr aparıblar. Moratsani etirazçılara, Xaçatr­yanın qohumlarına vəziyyəti anladığını bildirib. Onun sözlərinə görə, həll yolları­nın tapılması istiqamətində işlər aparılır.

Aksiyada çıxış edən Qurgen Ner­sisyan maraqlı etiraf edib. Deyib ki, ya­ranmış vəziyyət heç bir beynəlxalq təş­kilatın “Artsax xalqı”nın təhlükəsizliyini təmin etmək iqtidarında olmadığını bir daha sübut edir.

Aksiyada Xaçatryanın qızı və qar­daşı da iştirak ediblər. Onlar BQXK-dan saxlanılan şəxsi geri qaytarmağı tələb ediblər. Bundan sonra iştirakçılar Rusiya sülhməramlı kontingentinin qərargahına doğru yola düşüblər.

Haylar dünən BQXK-nın İrəvanda­kı ofisi qarşısında da aksiya keçiriblər. Həmçinin günün sonuna yaxın Xankəndi ofisinin qarşısında yenidən toplaşıblar. Bundan əlavə, Los-Ancelesdəki erməni diasporunun nümayəndələri BQXK-nın ofisi qarşısında aksiya təşkil ediblər.

Vaqifə görə Ermənistanda haray-hə­şir salanların başında isə onun digər qızı dayanır. Dünən İrəvandakı aksi­yadan sonra Vera Xaçatryan jurnalist­lərə müsahibəsində bildirib ki, o, Laçın (ermənilər bu gözəl diyarımızı Kaşatağ yarlığı ilə tələffüz edirlər-S.H.) rayonun­dandır. Lakin üç ildir ki, məcburi köçkün kimi (?) Cermukda yaşayır: “Mən Həkəri körpüsünün bu tərəfində təkəm, bacım, qardaşlarım, anam, bütün qohumlarım “Artsax”da yaşayırlar. Bu gün mənim ümidim sizsiniz, sizlərin hər biridir. Xahiş edirəm məni tək qoymayın, mənə ana, ata, bacı, qardaş olun. Bu, təkcə mənim dərdim deyil, Vaqif Xaçatryan bütün er­məni xalqını təcəssüm etdirir”.

Vera iddia edib ki, guya, Azərbaycan tərəfi reallığa uyğun olmayan məlumat­lar təqdim edir: “Atam iyulun 29-da İrə­vana aparılmalı idi, çünki onun ürəyində təcili əməliyyat lazımdır. Onu bacım mü­şayiət edirdi. Həkəri körpüsündə azər­baycanlılar atamın pasportunu götürüb bir daha qaytarmayıblar. Atam, əslində, qaçırılıb. Qohumlarından heç biri onunla əlaqə yarada bilməyib”. O, atasının iş­ğalçı müharibənin fəal iştirakçısı, qon­darma “dqr”in ilk “müdafiə naziri” Sam­vel Babayanın sürücüsü olması barədə məlumatları da təkzib edib: “Bu yaxın­larda dedilər ki, o, Samvel Babayanın sürücüsüdür. Hörmətli vətəndaşlar, bu məlumat yalandır”.

Qeyd edək ki, iyulun 29-da BQXK əməkdaşları V.Xaçatryana baş çəkib­lər. Azərbaycan Xarici İşlər Nazirliyinin yaydığı məlumatda qeyd edilib ki, həmin şəxsin Ermənistana müalicə məqsədi ilə getdiyini nəzərə alaraq, onun Bakı şəhə­rində tibb müəssisəsinə yerləşdirilməsi, ona zəruri tibbi yardımın göstərilməsi təmin edilib. BQXK-nın nümayəndələri­nin ona baş çəkməsinə müvafiq şərait yaradılıb. XİN bildirib ki, Azərbaycan tərəfindən atılan bütün bu addımlar bey­nəlxalq hüquq və ölkə qanunvericiliyi çərçivəsində həyata keçirilib. Bu açıqla­ma öz-özlüyündə Veranın yalan danış­dığını sübut edir.

***

Ermənilərin Xaçatryan şousu üzə­rindən Azərbaycana nifrət niqti yağdır­malarına İnsan Hüquqları üzrə Müvək­kil (Ombudsman) Səbinə Əliyeva da münasibət bildirib. Ombudsman sosial şəbəkə hesabında etdiyi paylaşımda Ermənistanın Azərbaycana qarşı nifrət siyasətini və dözümsüzlüyü davam et­dirdiyini vurğulayıb.

Onun sözlərinə görə, son günlər sosial şəbəkələrdə erməni istifadə­çilər tərəfindən azərbaycanlılara qarşı təhqirləri əks etdirən mesajlar bir daha göstərir ki, Ermənistanın siyasi rəhbər­liyi Azərbaycana qarşı çoxdankı nifrət siyasətini davam etdirir: “Əvvəlki açıq­lamalarımızda da qeyd etdiyimiz kimi, Qarabağda yaşayan erməni əsilli Azər­baycan vətəndaşlarının hüquqlarının tə­min edilməsi məsələsi Azərbaycan döv­lətinin yurisdiksiyasındadır. Ermənistan ombudsmanının vətəndaşlarımızın hüquqlarının müdafiəsi ilə bağlı əsassız iddiaları tamamilə yersizdir və başqa ölkənin suverenliyinə müdaxilədir. Bütün bunlara baxmayaraq, Ermənistan siyasi rəhbərliyinin dəstəyi ilə mediada ha­disələrin qərəzli şəkildə şişirdilməsi və insanlar arasında nifaq salması region­da davamlı sülh prosesinə mane olur və eyni zamanda mövcud vəziyyətin daha da gərginləşməsinə xidmət edir”.

Qarabağ erməniləri dünən “bloka­da” şousundan növbəti etüdlər nümayiş etdirməyi də unutmayıblar. Bu şouda həssas təbəqə olan uşaqlardan gen-bol istifadə edən hayların lentə aldıqları vi­deoda uşaqlar “blokada”nın nə olduğun­dan danışırlar. Onlardan biri qeyd edib ki, almanı çox sevir, amma yollar bağlı olduğundan (?) onlarda nə alma, nə də şəkər tozu var.

Bu mövzuda dünən Milli Məclisin deputatı Fazil Mustafanın “Facebook” hesabında etdiyi paylaşm diqqəti çəkib. O qeyd edib ki, Ermənistandan gələn TIR-lardakı ərzaq Qarabağda yaşayan ermənilərin kütləvi zəhərlənməsi üçün nəzərdə tutulub: “Bu fakt baş verdik­dən sonra ermənilər növbəti təxribatı gerçəkləşdirib Ümumdünya Səhiyyə Təşkilatını bölgəyə çağıracaqlar. Böyük ehtimalla bu maşınlara yığılanların ha­mısı vaxtı keçmiş ərzaq məhsullarıdır. Məsələ ilk növbədə suverenliyimizlə bağlıdır. Digər tərəfdən isə Azərbaycan dövləti heç vaxt razı ola bilməz ki, onun ərazisində məskunlaşan insanların, hətta erməni millətinə mənsub olsalar belə, sağlamlıqları təhlükəyə düşsün. O düşüncədəyəm ki, Zəngilandan Ermə­nistan sərhədinə bizim TIR-lar düzülmə­lidir. “Naxçıvana humanitar yardım üçün yol verin!” tələbini aktuallaşdırmalıyıq”.

Fazil Mustafa qeyd edib ki, Nax­çıvanda da blokadanın götürülməsi, Zəngəzur dəhlizinin açılması ilə bağlı mitinqlər keçirilməli və Azərbaycanda akkreditasiya olunmuş səfırlər, bey­nəlxalq təşkilatların nümayəndələri ora dəvət olunmalıdırlar. Millət vəkili qeyd edib ki, vaxtında atılmayan addımlar, diqqətsiz qalan faydalı təkliflər haqlı mövqelərimizi zəiflədə bilər.

***

Vaqif Xaçatryanın həbsi azərbay­canlılara qarşı deportasiya, insanlıq əleyhinə cinayətlər və müharibə cinayət­ləri törədən heç kimin cəzasız qalma­yacağı, etdiyi əməllərə görə hər kəsin bir gün cavab verəcəyi həqiqətini üzə çıxardı. Belə canilərdən biri də yuxarıda adını çəkdiyimiz Samvel Babayandır. O, erməni bloger Albert İsakovun “Youtube” kanalına müsahibəsində V.Xaçatrya­nın Azərbaycan sərhədçiləri tərəfindən saxlanmasına münasibət bildirib. S.Ba­bayan deyib: “Açığını desəm, bütün bu hadisələr baş verməmişdən qabaq mən bu məsələni qaldırmışdım. Demiş­dim ki, Azərbaycan 300-dən çox ada­mı həbs olunması üçün axtarışa verib. Mən qarşılıqlı etimada nail olmaq üçün azərbaycanlılarla danışıq aparmaq, dia­loqa başlamaq lazım olduğunu deyəndə bunu nəzərdə tuturdum. Ancaq bir sıra axmaqlar dərhal dedilər ki, mən özümü düşünürəm, özüm haqqında danışıram. Onlar məsələyə ciddi yanaşmadılar. İndi isə səhvə yol verdiklərini anlayırlar. Ona görə də biz hər dəfə oxşar sürprizlərlə üzləşəcəyik. Bizim partiyanın hazırla­yıb Arayik Arutyunyana təqdim etdiyi 45 bənddən ibarət layihədə Azərbaycan­dan amnistiyanın alınması da var idi. Ancaq onlar (qondarma rejim rəhbər­liyini nəzərdə tutur-S.H.) bunu ciddiyə almadılar və iyulun 29-da ilk hadisə baş tutdu”.

Blogerin “Azərbaycanın axtarışa ver­diyi şəxslərin siyahısında kimlər var?”, – sualına cavab olaraq S.Babayan “mən o siyahıda varam, başqalarını bilmirəm” deyib.

Beləliklə, aydın olur ki, Qarabağda azərbaycanlılara qarşı cinayət törətmiş şəxslərin necə deyərlər, kürkünə birə düşüb. Hayların Xaçatryan olayını si­yasiləşdirərək Bakıya təzyiq göstərmək cəhdləri fayda vermir. Ancaq dünya bir daha üstündən 30, 40, 50 il keçsə belə, hərbi cinayətkarların ədalət mühakimə­sindən qaça bilməyəcəklərinə şahidlik edir. Eyni zamanda, bu cür hallara haqq qazandırmaq, cinayət törətmiş şəxsi tə­mizə çıxarmaq cəhdləri də cinayət törət­məyə bərabər hərəkətdir.

Fuad ABBASOV,
siyasi şərhçi

– Altmış səkkiz yaşlı Vaqif Xa­çatryanın saxlanılması çox ciddi hadisədir. Bu hadisə digər hərbi canilərlə bağlı bir presedent ya­radacaq. Hazırda digər hərbi ca­nilərin canına vəlvələ düşüb. İstər Xankəndidə, istər İrəvanda, istər­sə də dünyanın digər yerlərində yaşayan qatillərin hesab vermək zamanı gəlib çatıb. Onlar Samvel Babayanın açıqlamasından son­ra başa düşüblər ki, Azərbaycan 300-dən çox şəxsi beynəlxalq ax­tarışa verib. Bunlar dünyanın han­sı ölkəsinin sərhədini keçməsin­dən asılı olmayaraq saxlanılaraq Azərbaycana təhvil verilməlidir. Biz bilirik ki, Qarabağda hələ də bu canilər yaşamaqdadırlar.

Azərbaycan Prezidenti mayın 28-də Laçına qayıdan əhali ilə gö­rüş zamanı bildirdi ki, “parlament” buraxılmalıdır, özünü “prezident” adlandıran ünsür təslim olmalıdır, bütün “nazirlər”, “deputatlar” və di­gərləri öz vəzifələrini artıq kənara qoymalıdırlar. Ancaq o təqdirdə onlara güzəşt oluna bilər. Ancaq o təqdirdə hər hansı amnistiyadan söhbət gedə bilər. Onlar Azərbay­canın danışıq aparmaqla bağlı iki təklifini qəbul etməyiblər. Bundan sonra hərbi cinayət törətmiş şəxs­lər sərhədi keçərkən saxlanılıb hüquq-mühafizə orqanlarına təh­vil verilməlidirlər. Bu, gözəl pre­sedentdir. İnşallah, Azərbaycanın cəzaçəkmə müəssisələrini bizə qarşı ağlasığmaz cinayətlər törət­miş canilərlə doldurmuş olarıq.

Səxavət HƏMİD, “Xalq qəzeti”