Xəbər verildiyi kimi, iyulun 21-də “4-cü Sənaye İnqilabı dövründə Yeni Media” mövzusunda Şuşa Qlobal Media Forumunda tədbir iştirakçılarının çoxsaylı suallarını cavablandıran Azərbaycan Prezidentinin arqumentləri, səsləndirdiyi proqnozlar və xatırlatdığı faktlar artıq dünyanın əksər ölkələrinin mətbuat vasitələrində özünə kifayət qədər yer tapmışdır. Eyni zamanda, beynəlxalq aləmdə hamı növbəti dəfə gördü ki, Azərbaycan danışıqlar prosesinə sadiqdir və rəsmi Bakı sülhə nail olmaq üçün güc tətbiq etmək istəyindən uzaqdır. Təbii ki, bu forum Azərbaycanın həmin xoşməramlı mövqeyinin dünya ictimaiyyətinə bir daha çatdırılması baxımından xüsusi önəm kəsb etdi.
Mən bu faktları nəzərdən keçirərkən rəsmi Bakının 2008-ci ildə keçirdiyi möhtəşəm beynəlxalq tədbirlərdən birini xatırladım. Belə ki, həmin il paytaxtımızda baş tutmuş Avropa dövlətlərinin mədəniyyət nazirləri ilə İslam ölkələrinin mədəniyyət nazirlərinin görüşü sonradan sivilizasiyalararası dialoqa xüsusi töhfələr vermiş “Bakı prosesi”nin təməlini qoymuşdu. İndi artıq əminliklə demək olar ki, Azərbaycan beynəlxalq aləmə “Şuşa prosesi”ni də təqdim edir. Elə tədbirin türkiyəli iştirakçıları da bu istəklərini dilə gətirdilər.
Dövlət başçımızın “həm ölkəmiz üçün, həm də Qarabağ bölgəsi üçün möhtəşəm əhəmiyyət kəsb edən tədbir” adlandırdığı Qlobal Media Forumunun Azərbaycanın mədəniyyət paytaxtında, işğalçı ordu üzərindəki tarixi Qələbəmizin və sülhün rəmzi olan Şuşada keçirilməsi də qürurverici idi. Cənab Prezidentin xatırlatdığı kimi, Şuşa azad olunduqdan sonra İkinci Qarabağ müharibəsi başa çatmışdı.
Forumun gedişində Azərbaycan vətəndaşının daha çox eşitmək istədiyi fikirlərin səsləndirilməsinə şahidlik etdik. Məsələn, ABŞ-dan olan jurnalist Ceyms Flunun dövlət başçımıza ünvanladığı “Siz ölkənizlə bağlı ən əsas təhlükələri nədə görürsünüz?” – sualının cavabını bəlkə də təkcə on milyonluq əhalimiz deyil, əlli milyonluq dünya azərbaycanlıları da gözləyirdilər. Cənab Prezidentin cavabının ilk cümləsi də elə bütün soydaşlarımızın ürəyincə idi: “Torpaqlarımızı azad edəndən sonra biz ölkəmizə qarşı potensial təhlükə görmürük. Birincisi, daxildə hər hansı bir təhlükə yoxdur, ölkə sabitdir, cəmiyyətdə həmrəyliyin səviyyəsi heç vaxt olmadığı qədər yüksəkdir, ölkənin iqtisadi inkişafı olduqca təsirlidir... keçmişdə bizə olan təhlükə məhz Ermənistan və onun işğalı ilə bağlı idi. Həmin təhlükə 30 il ərzində məhz buradan qaynaqlanırdı və artıq biz bu təhlükənin öhdəsindən gəlmişik. Ancaq, əlbəttə, biz ayıq olmalıyıq, biz keçmişimizi unutmamalıyıq”.
Ancaq hamının diqqətini özünə çəkən başqa bir nüansa da şahidlik etdik. Azərbaycan Prezidenti xatırlatdı ki, İkinci Qarabağ müharibəsinin nəticələrinə baxmayaraq, bu gün Ermənistan cəmiyyətinin, hətta hökumətinin tərkibində müəyyən insanlar var ki, hələ də revanşist ideyalarla yaşayır və onlar bunu gizlətmirlər: “Ona görə biz hər hansı bir ssenariyə hazır olmalıyıq. Bu məqsədlə biz İkinci Qarabağ müharibəsi bitən kimi, möhtəşəm zəfərimizi nümayiş etdirən kimi dərhal yenidən müdafiə sahəsində dərin islahatlar həyata keçirməyə başlamışıq. Mən artıq bunu ictimai şəkildə bəyan etmişəm. Bu gün ordumuz üç il əvvəlki ordudan daha güclüdür. Buna, əlbəttə ki, ehtiyac var. O da bizim tariximizdən qaynaqlanır və biz görürük ki, bu gün beynəlxalq hüquq normaları kobud şəkildə pozulur”.
Dövlət başçımızın bütün bunları xatırladandan sonra dediyi fikirlər isə artıq Şuşa ərazisindən və forum çərçivəsindən çıxaraq bədxahlarımızın yaşadığı bütün ünvanlara göndərilirdi: “Ancaq hazırda xaricdən qaynaqlanan təhlükə səviyyəsi o qədər də yüksək deyil. Yəqin, bu, ona görədir ki, biz həmin təhlükənin öhdəsindən gələ bilirik”.
Azərbaycan oxucusu üçün diqqət çəkən məqamlardan biri də Birləşmiş Krallıqdan olan Cordan Morqanın müxtəlif beynəlxalq proseslər fonunda Azərbaycan və bütün region üçün hansı perspektivlərin olduğu barədə verdiyi sualın cavabı idi. Dövlət başçımız dedi ki, əslində, Cənubi Qafqazın inkişaf perspektivləri, əsasən, Azərbaycanla Ermənistan arasında münasibətlərin yaxşılaşmasından asılıdır. Hazırda bir sıra beynəlxalq təşkilatlar bizə qarşılıqlı qəbul olunacaq həlli tapmaqda yardım etməyə çalışırlar. Əlbəttə, bu günə kimi bütün beynəlxalq təşkilatlar başa düşürlər ki, bu həllər beynəlxalq hüquqa əsaslanmalıdır. İkinci Qarabağ müharibəsi başa çatandan təxminən, üç il keçib, biz getdikcə daha çox sayda birbaşa bəyanatlar eşidirik ki, Qarabağ Azərbaycanın ərazisidir. İşğal dövründə belə bəyanatlar olsaydı, çox güman ki, İkinci Qarabağ müharibəsi başlamazdı”.
Dövlət başçımız bir daha dünya ictimaiyyətinin nəzərinə çatdırdı ki, biz Cənubi Qafqaza sülh gətirilməsi üçün lazım olan bütün addımları atırıq. Hətta, qalib tərəf olsaq da, diktə ilə danışmır, qarşı tərəfə həqiqi sülhə çatmaq üçün lazım olan təkliflərimizi göndərmişik. İşğal dövründə beynəlxalq aktorlar bizə deyirdilər ki, xalqların öz müqəddəratını təyinetmə və ərazi bütövlüyünü inteqrasiya etməlisiniz. Ancaq biz deyirdik ki, beynəlxalq hüququn fundamental prinsipləri var, ərazi bütövlüyü və xalqların öz müqəddəratını təyin etməsi bu prinsiplərdir: “Lakin öz müqəddəratının təyin olunması ərazi bütövlüyü prinsipini kölgədə qoymur və nəzərə alsaq ki, Ermənistan artıq müstəqil dövlət kimi mövcuddur”.
Forum iştirakçıları Prezident İlham Əliyevin regiondakı son vəziyyət haqqında dediklərini elə həmin gün – iyulun 21-də öz ölkələrinin mətbuat orqanlarına göndərmişdilər. Azərbaycan Prezidenti son vəziyyət barədə danışarkən dedi ki, hazırda üç beynəlxalq tərəf var ki, bu prosesə dəstək olurlar – ABŞ, Rusiya və Avropa İttifaqı: “Azərbaycan üç istiqamət üzrə tam səmimiyyətlə bu prosesə qatılıb və nəticəyönümlü yanaşma ortaya qoyur. Lakin indiyədək bir nəticə yoxdur. Çünki düşünürəm ki, Ermənistan son addımını atmalıdır. Onlar artıq müharibədən sonra bir sıra addımlar atıblar və mən deməzdim ki, bu addımlar könüllü olaraq atılıb. Son iki il yarım ərzində bir neçə məqam oldu və onlar birbaşa Ermənistana nümayiş etdirdi ki, bizim ərazi bütövlüyümüzü tanımasalar, biz onların ərazi bütövlüyünü tanımayacağıq. Bunun nə məna daşıdığı onlara kifayət qədər aydındır”.
Bəli, işğalçı ölkədə artıq qəbul ediblər ki, Qarabağ Azərbaycandır. İndi qalır bu məntiqin sənədlə, imza ilə rəsmiləşdirilməsi. Prezident xəbərdarlıq etdi ki, Ermənistan Azərbaycana qarşı ərazi iddialarından imtina etsə, sülh sazişinin ilin sonunadək imzalanması kifayət qədər mümkündür: “Lakin bu olmasa… sülh olmayacaq. Bu, bölgə üçün heç də yaxşı ssenari deyil, sabitliklə, təhlükəsizliklə nəticələnməyəcək”.
Prezident əmindir ki, ABŞ, Avropa İttifaqı və Rusiya kimi vasitəçilərin üçündən birinin fəaliyyətində təkamülü, irəliləyişi görəcəyik. Bütün hallarda biz sülhə hərb yolu ilə nail olmaq istəmirik. Ermənistanın davranışları isə yeni hərbi eskalasiyalara zəmin yaradır. Təbii ki, haqqa qayıtmasalar, özləri peşman olacaqlar.
İttifaq MİRZƏBƏYLİ, “Xalq qəzeti”