Ankaranın Azov liderlərini Kiyevə ekstradisiya etməsi Rusiya ilə Türkiyə arasında münasibətlərə necə təsir edə bilər? Ərdoğanın son bəyanatları və hərəkətləri Ankaranın Ukrayna münaqişəsində mövqeyinin dəyişdiyini və bu məsələdə Qərbə daha fəal dəstək verməyə hazır olduğunu göstərirmi? Hazırda bu kimi suallar bütövlükdə dünyanı düşündürməkdədir. Ancaq məsələyə, ilk növbədə, Rusiyanın ictimai rəyinin münasibəti önəm daşımaqdadır. Bu mənada Rusiya Elmlər Akademiyasının İctimai Elmlər üzrə Elmi İnformasiya İnstitutunun Yaxın Şərq və postsovet ölkələri şöbəsinin müdiri, Rusiya Xarici İşlər Nazirliyi Diplomatiya Akademiyasının professoru Vladimir Avatkovun mövqeyi maraqlıdır.
Avatkov mövzu ilə bağlı yerli medianın suallarını cavablandırarkən deyib ki, Ankaranın Azov liderlərini Kiyevə ekstradisiya etməsi dövlətlərarası qarşılıqlı fəaliyyət nöqteyi-nəzərindən o qədər də məqbul deyil. Xüsusən də Rusiya və Türkiyə liderləri bu illər ərzində normal qarşılıqlı əlaqəni inkişaf etdiriblər. “Bizə elə gəlirdi ki, bir-birimizi başa düşməyi, qayğılarımızı eşitməyi öyrənmişik. Liderlər səviyyəsində olan bu yaxşı münasibətlər əvvəllər mövcud olan bir çox böyük problemləri həll etməyə imkan verdi”, – deyən Avatkov məyusluğunu gizlətməyib.
Siyasi icmalçı onu da bildirib ki, Rusiya–Türkiyə münasibətlərinin toqquşduğu bir sıra regionlarda çətinliklər istisna edilmirdi. Lakin liderlərin – Türkiyə Prezidenti Rəcəb Tayyib Ərdoğanın və Rusiya Prezidenti Vladimir Putinin şəxsi münasibətləri köklü problemlərin qarşısını almağa imkan verirdi. Mövcud vəziyyətə gəlincə, Avatkovun fikrincə, Türkiyə Rusiya ilə olan razılaşmaları pozub: “Bir şey vacibdir. Uzun müddət sonra ilk dəfə olaraq Türkiyə tərəfinin məhz razılaşmaları pozduğunu açıq elan etdik”.
Siyasi şərhçi hesab edir ki, Türkiyə Prezidenti Ərdoğan və Ukrayna Prezidenti Volodimir Zelenski “milçəkdən fil” düzəltməyə çalışırlar: “Zelenski Türkiyəyə səfərindən nə əldə etdi? Beş nəfəri (Azov liderləri nəzərdə tutulur – red.) aldı. Silah almadı, pul almadı. Beş nəfərdən başqa heç nə almadı. Kiyev yaxınlığında zavodun (bayraktarların və digər türk pilotsuz təyyarələrinin istehsalı üçün - red.) yaradılması ilə bağlı paraflanan müqavilələrin özü belə yeni deyil, köhnə sazişlərdir. Rusiya isə çox açıq şəkildə bəyan edib və bunu dəfələrlə vurğulayıb ki, bu, zərbələr üçün qanuni hədəflər olacaq”.
Məsələnin başqa tərəfi də var ki, Avatkov bunu qərbli həmkarlarının Ankaraya təzyiq göstərməsi, ondan ABŞ-ın məntiqi ilə getməsini tələb etməsi kimi dəyərləndirməkdədir. “Türkiyə müqavimət göstərir və əks iddialar irəli sürür. Xüsusən də İsveçin NATO-ya daxil olması müqabilində Avropa Birliyinə qatılmasını tələb edir. Əslində, burada Ukrayna Türkiyə üçün Qərblə dialoq baxımından yaxşı kartdır. Qərb eşitmək istədiyini eşidir. Türkiyə Ukrayna məsələsində Qərbin tərəfində olduğunu deyir. Amma demək ayrı, etmək ayrı. Bunlar mənim ayıracağım şeylərdir”, – deyən politoloq fikrinə aydınlıq gətirib.
Ərdoğanın müharibədən sonra Türkiyənin Ukraynanın NATO-ya üzvlüyünə qarşı olmadığını deməsi Ankaranın Ukrayna münaqişəsində mövqeyinin dəyişdiyini göstərmir ki? Bu məsələdə Türkiyənin Qərbə daha fəal dəstək vermək niyyəti varmı? Avatkovun fikrincə, məsələnin qoyuluşu belə deyil: “Mən indicə bu haqda dedim ki, elan edilənlə görülən iki fərqli şeydir. İndi Türkiyə Qərblə bağlı bir oyun oynayır. Sadiqliyini nümayiş etdirməyə çalışır. Dmitri Sergeyeviç Peskovun (Rusiya Prezidentinin mətbuat katibi nəzərdə tutulur – red.) dediyi də odur ki, biz Qərbin Türkiyəyə təzyiq göstərdiyini başa düşürük. Bu təzyiqin nəticəsidir. Ancaq bunlar sözlərdir. Məsələ nəyin necə olacağıdır. Bunu yalnız zaman göstərəcək. Mövcud istiqamətdə tələskənliyə ehtiyac yoxdur. Sözlər bir şeydir, əməllər tamam başqadır”.
Əlbəttə, Qərbin Türkiyə ilə bağlı hansı mövqe tutacağı da maraq doğurmaqdadır. Əslində burada çox böyük, özü də açıq qalan sual var. Qərb Qarabağ münaqişəsinin həllini öz himayəsi altında fəal şəkildə davam etdirir. Məqsədlərindən birinin Rusiyanı Cənubi Qafqaz regionundan sıxışdırıb çıxarmaq olduğunu bildirir. Prosesin həyata keçirilməsində mühüm rol Türkiyəyə həvalə olunub. Rusiyanın ekspert cameəsini Ankaranın bu məsələdə Qərbə yardım etməyə hazır olması maraqlandırır. Üstəlik, nəzərə alaq ki, Azərbaycan amili Türkiyə üçün “qırmızı xətt”dir və bunu dəfələrlə bəyan edib.
Avatkov Rusiyanın Cənubi Qafqaz regionundan sıxışdırılması üçün heç bir perspektiv görmədiyini deyir. “Şübhəsiz ki, bir tərəfdən Türkiyənin, digər tərəfdən isə Fransa və Böyük Britaniyanın regionda mövcudluğunun artması ilə bağlı mənfi tendensiyalar var. Regionda və qlobal siyasi proseslərdə yeni qüvvələr balansı formalaşır. Buna görə də indi kiminsə Rusiyanı sıxışdırıb çıxarmasından danışmağa dəyməz. Əksinə, Moskvanın regionda imkanları artır. Bizim artıq Gürcüstana uçuşlarımız var. Region ölkələri ilə iqtisadi və siyasi əlaqələrimizi inkişaf etdiririk. Amma onların çətinlikləri olub, var və məncə, olacaq”, – deyən politoloqun sözlərindəki ən vacib məqam isə budur: Qərb, o cümlədən ABŞ Türkiyə vasitəsilə Azərbaycana, Fransa vasitəsilə Ermənistana qarşı fəaliyyət göstərərək, regionu Rusiyadan qoparmağa hər cür cəhd göstərir.
Ə.RÜSTƏMOV, “Xalq qəzeti”