“Biz öz doğma torpağımızdayıq və bu gün ermənilərin yaşadıqları Qarabağ bölgəsi bizim əzəli, hüquqi torpağımızdır. Sadəcə olaraq, biz hesab edirik ki, onlar özləri başa düşəcəklər, özləri gəlib Azərbaycan Bayrağı altında yaşamağa addım atacaqlar. Biz bunu gözləyirik. Ona görə hər hansı bir başqa addım atmırıq və hesab edirəm ki, iki il yarım ərzində baş vermiş hadisələr artıq onları da oyatmalıdır, bu yuxudan, bu xülyadan ayıltmalıdır”. Bu fikirləri Prezident İlham Əliyev bu il mayın 28-də Laçında öz dogma yurd-yuvasına qayıtmış əhali ilə görüşündə bildirdi.
Dövlətimizin başçısının mövqeyinə görə, eyni zamanda Azərbaycan–Ermənistan sülh danışıqlarının gündəmdə olduğu hazırkı dövrə nəzərən, Qarabağdakı separatçı rejimin “dövlət naziri” oyuncaq postunu tutan Qurgen Nersisyanın Ermənistanın İctimai televiziyasına müsahibəsi maraq doğurmaya bilməz. Əlbəttə, marağı şərtləndirən Qarabağ ermənilərinin mövcud duruma obyektiv və rasional yanaşmasını görmək istəyidir. Yəni, gözləntimiz budur ki, rejimdəkilər də oyansınlar. Bəri başdan deyək ki, oyandıqlarına dair hansısa nişanə yoxdur. Deməli, gözləntimiz özünü doğrultmur.
Beləliklə, Nersisyan bildirir ki, qondarma hakimiyyət “Artsax-Azərbaycan təmaslarına qarşı deyil”. Tamamilə qəbuledilməz mahiyyət daşıyan yalnız bu ifadə ilə əlaqədar üç məqamı vurğulamaq yerinə düşər. Birincisi, separatçıların əslində Qarabağ ermənilərini buxovda saxlamaları. Təxminən belə: biz etiraz etmirik, kim istəyirsə, gedib Azərbaycanla danışıq aparsın. Nersisyan belə demək mümkünsə, diplomatik destruktivliyə baş vurur. İkincisi, onun deyimində Qarabağ ermənilərini ayrıca tərəf kimi göstərmək cəhdi aşkardır. Üçüncüsü, Nersisyan Bakı ilə deyil, Azərbaycanla dialoq məntiqini qabardır ki, bu da onun Qarabağı nəinki ayrıca tərəf, hətta ayrıca dövlət quruluşu kimi görmək niyyətindən irəli gələn nüansdır.
Nersisyan bildirir ki, “Artsax xalqı”nın hüquqlarından danışarkən, xalqın öz müqəddəratını təyinetmə hüququnu nəzərdə tutmayan insanlar, hakimiyyət orqanları və ya beynəlxalq aktorlarla razılaşmır. Buradan da belə çıxır ki, o, bir qədər əvvəl haqqında söz açdığı təması “Artsax dövləti”nin Azərbaycanla əlaqəsi kimi görürmüş. Ortada belə səfeh yanaşma var. Görünür, problem “dövlət naziri” oyuncaq postundadır. Nersisyan özündən əvvəl bu “vəzifə”ni tutmuş Ruben Vardanyandan heç nə ilə fərqlənmir. Halbuki, o, iş başına keçməzdən əvvəl belə fikirlər dolaşırdı ki, Qarabağ ermənilərini, necə deyərlər, qəflət yuxusundan oyatmağa gəlib. Ancaq məlum olur ki, Qurgen özü dərin yuxudadır. Bu gedişlə onu oyatmaq üçün Azərbaycan əsgərinin çəkməsinə ehtiyac duyulacaqdır. Digər oyatma üsulları fayda verənə oxşamır.
Nersisyanın həyasızlığına bax ki, az əvvəl haqqında söz açdığımız dialoqdan danışarkən, şərt də qoymağı yaddan çıxarmır. Bildirir ki, danışıqlar zamanı tərəflər hüquqlarını beynəlxalq normalara uyğun həyata keçirmək imkanı verən beynəlxalq mexanizmlərlə təmin edilməli və qorunmalıdırlar, zəmanətlər isə inandırıcı və etibarlı olmalıdır.
Göründüyü kimi, Nersisyan da erməni avantürizminin psixi xəstəlik daşıyıcılarının təmsilçilərindən biridir. Deməli, beynəlxalq ictimaiyyət yığışıb Qarabağ erməniləri üçün ayrıca mexanizm tapmalıdır?! Bəlkə, dünya işini-gücünü atıb dövlətin öz tərkibindəki qeyri millətdən olan əhali ilə münasibətinə dair xüsusi layihə işləsin?! Hər halda, mövcud istiqamətdə yanaşmalar və öhdəliklər var. Həmin öhdəliklər Azərbaycana şamil olunduğu kimi, ABŞ-a da aiddir, digərlərinə də. Amma görünür, Nersisyan separatçı xislətinə uyğun şəkildə özündən Amerika kəşf etmək xülyasına düşüb. Düşsün, görək, nə vaxtadək düşəcək…
Əslində, Nersisyanın “Qarabağ ermənilərinin müqəddəratı” məsələsini dilə gətirib fikir bildirməsi absurddur. Belə çıxır ki, onun nəzərində tutduğu Azərbaycanla dialoqun mövzusu məhz müqəddəratın təyini olmalıdır. Hər halda, separatçıların həyasızlıq fantaziyaları bitib-tükənmək bilmir və Nersisyan da bu baxımdan enerji sərf edənlərdəndir. Qarabağ erməniləri müqəddarat istəyəcək, Azərbaycan da onlarla danışıq aparacaq?! Yaxud Qarabağ erməniləri müqəddarat illüziyasına qapılacaq, Bakı isə onlara yardım göstərəcək ki, bu illüziya üçün dizlərindən təpər tapsınlar?!
Q.Nersisyan onu da bildirir ki, müasir beynəlxalq münasibətlərdə 120 min insanın aclığı, işgəncəyə məruz qalması, sonra da onlara ac qalmaq və əziyyət çəkməmək üçün danışıqlara getməli olduğunun bildirilməsi, vəhşilik və terrorizm kimi qiymətləndirilməlidir. Əlbəttə, “dövlət naziri” haqqında danışdığı və təfərrüatlarını şişirtdiyi durumu yaradan tərəfin özünün də təmsil olunduğu qurama hakimiyyətin olduğunu bildirə bilməz. Problem bundadır ki, istər Nersisyan, istərsə də başqa avantüristlər məsələnin qoyuluşundakı müxtəlifliyi bütün dünyanın qəbul etdiyinin fərqində olmayacaq qədər iflic durumdadırlar. Mövcud anlamda onun Qarabağ ermənilərinin blokadada yaşamalarına, Azərbaycanın onlara güc tətbiq etdiyinə dair fikirləri yalnız manipulyasiyadır. Erməni əhalinin qaz və enerji təchizatından, lazımi tibbi yardım almaq imkanından məhrum duruma düşməsi ilə bağlı səsləndirdikləri də, həmçinin.
Ancaq Nersisyan bir məqamda haqlıdır. O bildirir ki, Qarabağ ermənilərinin hüquqlarının müdafiəsi indiki kimi görünürsə, o zaman etibarlı və inandırıcı təhlükəsizlik təminatları yoxdur. Həqiqətən də, “dövlət naziri”nin dediyi kimi, bu gün bölgənin erməni əhalisi təhlükəsizlik mühitinə malik deyil. Çünki Qurgenin də tərkibində yer aldığı separatçı rejim mövcuddur.
Əlbəttə, Q.Nersisyanın fikirlərinə önəm verməyib üzərindən keçmək olardı. Nəhayət, o da digər separatçıların vaxtilə işlətdikləri fikirləri bir qədər fərqli formada dilə gətirməkdən başqa nə isə etmir. Məsələ bundadır ki, o, bu ampluasında faktiki olaraq, Azərbaycan–Ermənistan danışıqlarının hazırkı axarını təhdid edən ünsürdür.
Digər tərəfdən, Azərbaycanın Qarabağ erməniləri ilə bağlı baxışı kifayət qədər aydındır. O da aydındır ki, Bakı öz baxışına zidd heç bir təmayülü qəbul etməyəcəkdir. İndiki halda ölkəmizin Prezident İlham Əliyevin şəxsində Qarabağ ermənilərinə, eləcə də separatçı rejimin təmsilçilərinə verə biləcəyi bir şey var ki, o da şansdır. Dövlətimizin başçısı Laçında yerli əhali ilə görüşündə bundan da söz açmışdı. Cənab İlham Əliyevin nə söylədiyini yada salmaqla, Nersisyan də daxil olmaqla, Qarabağdakı bütün separatçıların aqibətlərini düşünək: “Ona görə ki, biz haqlıyıq və ona görə ki, biz mövqeyimizdən kənara bir addım belə atmırıq. Ona görə bu gün nə müstəqillikdən, nə muxtariyyətdən, nə başqa bir şeydən heç kim artıq söhbət açmır. Sadəcə olaraq, bizə gələn son mesajlar belədir ki, bəs orada dırnaqarası rəhbərliyin aqibəti necə olacaq? Onlara amnistiya düşürmü, düşmürmü? Mən isə deyirəm ki, buna baxmaq lazımdır. Birincisi, biz oraya heyət göndərmişdik. Mənim nümayəndəm gedib onlarla birinci görüş keçirib və ondan sonra onları dəvət etmişik Bakıya ki, gəlin danışaq. Onlar bundan imtina etdilər. Bundan sonra ikinci dəfə biz onları dəvət etmişik Bakıya. Yəni, Qarabağda yaşayan erməni azlığının nümayəndələrini. Ondan da imtina etdilər. Daha üçüncü dəvət olmayacaq. Ya özləri boyunlarını büküb gələcəklər, ya da ki, indi hadisələr başqa cür inkişaf edəcək. Ona görə onlara ancaq o halda amnistiya düşə bilər ki, özləri könüllü olaraq bütün saxta vəzifələrini kənara qoyub Azərbaycan vətəndaşlığı üçün müraciət etsinlər. Ona da biz hələ baxacağıq. Mənim sözüm qətidir, bunu hər kəs bilir, həm Azərbaycanda, həm dünyada, o cümlədən, Ermənistanda. Nəyi deyiriksə, onu da edirik. Bir dənə də olsun sözümüz, necə deyərlər, havada qalmayıb, bu söz də havada qalmayacaq. Əgər mən deyirəmsə ki, amnistiyaya baxmaq olar, bu fürsəti də qaçırmasınlar. Onlar bir çox fürsətləri qaçırıblar, bir çox fürsətləri və hər dəfə, necə deyərlər, gərək onların başından vuraydıq ki, özlərinə gəlsinlər”.
Ə.CAHANGİROĞLU, “Xalq qəzeti”