Avropa İttifaqının (Aİ) Ermənistandakı Mülki monitorinq missiyasının rəhbəri Markus Ritter erməni “Youtube” kanalına müsahibə verib. Missiyanın mövcud durumu, fəaliyyəti və gələcək planları barədə məlumat verən Ritter Azərbaycan–Ermənistan əlaqələrinin inkişafı üçün mümkün yollar haqqında da fikir bildirib.
“Silahlı şəxslərin təhlükəsizliyi” nağılı
Markus Ritterin müsahibəsində bir neçə məqam xüsusilə diqqət çəkir. Bunlardan biri onun bir neçə dəfə missiyanın “müstəsna mülki xarakter” daşımasını dilə gətirməsidir. Onun bu ifadəni dəfələrlə təkrarlaması, bu cümləyə məxsusi olaraq diqqət çəkməyə çalışması onu göstərir ki, Ritter missiyanın mülki xarakter daşımadığı ilə bağlı media və ictimai rəydə səslənən fikirlərdən narahatdır. Görünür Markus da başa düşür ki, insanlar yarısı silahlı şəxslərdən ibarət olan 103 nəfərlik missiyanı “mülki missiya” adlandırmaqda çətinlik çəkir, bunun həqiqətən də qeyri-hərbi məqsəd daşıdığına inana bilmirlər. Məhz buna görə də Markus missiyanın statusu ilə bağlı bu ifadəni dönə-dönə səsləndirməklə ictimai rəyi istədiyi səmtə yönləndirməyə cəhd edir. Halbuki, hər iki nəfərdən birinin silah daşıdığı, tərkibinin əsasən keçmiş hərbçilərdən təşkil edildiyi bu missiyanı “mülki missiya” kimi qələmə vermək doğrudan da, çətindir. Və bu çətinliyi ortadan qaldırmaq üçün yalnız onun sözlərinə istinad etmək kifayət deyil.
“Müharibədən zərər görən” erməni kəndləri
Ritter müsahibəsində məqsədlərinin “müharibədən zərər görmüş kəndlərdə” patrul xidməti həyata keçirmək, orada yaşayan insanların sağlamlığı, əhval-ruhiyyəsi və s. ilə bağlı qeydləri Brüsselə təqdim etməkdən ibarət olduğunu bildirib. Missiya rəhbəri bu yerdə “müharibədən zərər görmüş kəndlər” ifadəsini işlətməklə yenə yalana əl atıb. Xatırladaq ki, missiya Azərbaycan–Ermənistan sərhədində reallaşsa da, Ritter və komandası Ermənistan ərazisindədir və sərhəddəki vəziyyətlə yanaşı, erməni kəndlərində yaşayan sakinlərlə bağlı araşdırma aparır. 44 günlük Vətən müharibəsi isə ancaq Azərbaycan ərazisində gedib. Bu isə o deməkdir ki, müharibə Ermənistanın heç bir yaşayış məntəqəsini əhatə etməyib. Belə olan halda erməni kəndlərinin müharibədən zərər görməsi mümkün deyil. Deməli, erməni kəndlilərini “müharibə qurbanı” kimi təqdim etməyə, erməni dəyirmanına su tökməyə ehtiyac yoxdur.
Markus Ritterin Azərbaycanla sərhəddəki erməni kəndlərini “qurbanlıq qoyun” kimi təqdim etmək cəhdi Aİ-nin Ermənistandakı missiyasının obyektivlikdən uzaq olduğunu, qərəzli mahiyyət daşıdığını göstərir. Bu fakt bir daha onu göstərir ki, Fransanın moderatorluğu ilə gerçəkləşən bu missiya məlum bəyanat və açıqlamalarla beynəlxalq ictimaiyyəti aldatmaq, onlarda əsl reallıqlar haqqında fərqli təəssürat formalaşdırmaqla məşğuldur.
Sərhədimizi pusanların “nəzakət jesti”
M.Ritter müsahibəsində missiyanın ermənipərəst mahiyyətini ört-basdır etmək üçün Ermənistanla olduğu kimi, rəsmi Bakı ilə də təmaslara malik olduqlarını bildirib. O, qeyd edib ki, sərhəddə keçirilən patrul xidməti ilə bağlı Azərbaycan tərəfi məlumatlandırılır, onlara qabaqcadan lazımi bilgi verilir. Ritter vurğulayıb ki, bu məlumatlandırma “təhlükəli vəziyyətlərin qarşısını almaq və inam yaratmaq” üçündür.
Xatırladaq ki, Aİ Ermənistanın Azərbaycanla sərhəd ərazilərinə uzunmüddətli missiya göndərəndə bu barədə rəsmi Bakını məlumatlandırmayıb. Bununla bağlı Bakıdan hər hansı razılıq tələb olunmayıb. Yəni missiya Azərbaycan sərhədində Bakının razılığı və icazəsi olmadan məskunlaşıb. Hansı ki, Aİ-nin məlum missiyasının Azərbaycana etdiyi ilk ən böyük nəzakətsizlik elə, bu, olub. İndi belə olan halda missiyanın patrul fəaliyyəti ilə bağlı Bakını məlumatlandırması, bunu Azərbaycana hörmət və ehtiram əlaməti kimi təqdim etməsi gülünc səslənir.
Təhlükəsizliyə gəlincə, rəsmi Bakının məlumatlandırılması, sadəcə olaraq, missiya üzvlərinin təhlükəsizliyinin təmininə hesablanıb. Markus Ritter də yaxşı başa düşür ki, sərhəddə hər hansı aktivlik sərgiləmək üçün hökmən Azərbaycan tərəfinin razılığı alınmalıdır. Belə bir razılıq olmadan hansısa monitorinq aparmaq mümkün deyil. Bu baxımdan, missiya patrul fəaliyyəti ilə bağlı Azərbaycanı məlumatlandırmağa məcburdur və bunu rəsmi Bakıya “nəzakət jesti” kimi təqdim etməyə ehtiyac yoxdur.
Ümumiyyətlə, Markusun müsahibədəki hər bir cümləsindən onun keçirdiyi yalan və həqiqət arasında çırpıntısını hiss etmək mümkündür. Açıq-aydın hiss olunur ki, missiya rəhbəri səsləndirdiyi fikirlərə ictimai inamın olmadığını, bu fikirlərin hətta himayəsində dayandıqları ermənilər tərəfindən belə birmənalı qarşılanmadığını bilir, bunu sövq-təbii hiss edir. O, rəhbərlik etdiyi missiyanın əsl status və mahiyyətinin rəsmi statusundan əhəmiyyətli dərəcədə fərqləndiyinin hamıya məlum olduğunu, bu gerçəkliyi təmtəraqlı cümlələr, gözəl ifadələrlə pərdələməyin mümkünsüzlüyünü anlayır.
Missiyanın uğur qazanmasının yeganə yolu onun rəsmi Bakı ilə normal münasibətlər qurması, Azərbaycana qarşı səmimi, qərəzsiz mövqe sərgiləməsidir. Belə olarsa, Markus Ritter də yalan danışmaq, buna görə əzab çəkmək və ictimaiyyəti missiyanın gərəkliliyinə inadırmaq üçün and-aman etmək məcburiyyətində qalmaz.
Seymur ƏLİYEV