Mayın 26-da Azərbaycan–Ermənistan dövlət sərhədinin Zəngilan rayonu ərazisindən keçən hissəsində Ermənistan silahlı qüvvələrinin təxribat-diversiya qrupu tərəfindən Azərbaycan Respublikasının dövlət sərhədinin pozulması cəhdinin qarşısı alınıb, iki erməni diversantı əsir götürülüb. Xatırladaq ki, post-müharibə dönəmində Ermənistan tərəfi dəfələrlə ölkəmizə qarşı oxşar təxribatlar törətməyə cəhd edib, Azərbaycan tərəfi irili-xırdalı onlarla diversiya qrupunu uğurla zərərsizləşdirib. Onlardan ən böyüyü 2020-ci ilin noyabrında neytrallaşdırlıb. Nəticədə, 62 diversant əsir götürülüb.
Erməni diversantlar cinayət məsuliyyətinə cəlb edilsələr də, onlara qarşı hər hansı zorakılıq, işgəncə tətbiq olunmayıb. Prezident İlham Əliyev 2021-ci ilin 7 yanvar tarixində 2020-ci ilin yekunlarına həsr edilən müşavirədəki çıxışında bu barədə deyib: “Biz azad edilmiş ərazilərdə diversiya ilə məşğul olanları əsir götürdük. Məhv etmədik. Dedim ki, əsir götürün, daha müharibə başa çatıb, daha qan tökmək lazım deyil. Bu, yenə də bizim humanist mahiyyətimizi göstərir...”
10 aprel 2023-cü ildə Naxçıvan Muxtar Respublikasının Şahbuz rayonu istiqamətində dumanlı hava şəraiti ilə əlaqədar olaraq istiqaməti itirən, Ermənistan tərəfinə keçən və əsir götürülən 2004-cü il təvəllüdlü Aqşin Bəbirova və 2003-cü il təvəllüdlü Hüseyn Axundova qarşı amansız işgəncələr tətbiq edilib. Bakının erməni diversantlara humanist mövqeyi müqabilində İrəvanın azərbaycanlı hərbi əsirlərlə qeyri-insani rəftarı, Ermənistanın həm beynəlxalq qanunvericilikdən, həm də elementar insani his-slərdən nə qədər uzaq olduğunu göstərir.
Diversant hərbi əsir sayıla bilərmi?
Ermənistan Azərbaycan hərbçilərinin əsir götürdükləri diversantları hərbi əsir kimi təqdim etməkdə, onların azad olunması üçün beynəlxalq qanunvericiliyin imkanlarından yararlanmaq istəyindədir. Sual yaranır: Diversantlar hərbi əsir sayıla bilərmi? Onların hərbi əsirlərlə bağlı beynəlxalq konvensiyalarda nəzərdə tutulan hüquqlardan istifadə haqqı mövcuddurmu? Qeyd edək ki, beynəlxalq qanunvericilik hərbi əməliyyatlar dayandırılandan sonra təxribat törətməyə çalışan və əsir götürülən şəxsləri hərbi əsir saymır. Müharibə qurbanlarının müdafiəsi haqqında 1949-cu il tarixli Cenevrə konvensiyalarında da diversantlar hərbi əsir deyil, cinayətkar kimi xarakterizə edilir. Bu isə o deməkdir ki, onlar birincilərə məxsus hüquqlardan istifadə edə bilməzlər. Bu gerçəklik zaman-zaman Azərbaycanın rəsmi dövlət qurumları, eləcə də ölkə başçısı tərəfindən də diqqətə çatdırılıb. Prezident İlham Əliyev 7 yanvar 2021-ci il tarixli çıxışında 2020-ci ilin noyabrında saxlanılan erməni diversantlarla bağlı açıqlamasında bunu bir daha diqqətə çatdıraraq demişdir: “...Onları əsir götürmüşük. Amma onlar hərbi əsir sayıla bilməz, çünki müharibə qurtarıb. Onlar terrorçudur, diversantdır. Onlar Xocavənd rayonuna Ermənistandan, Ermənistanın Şirak vilayətindən noyabrın 26-dan sonra gəlmişlər. Bunu hər kəs bilsin. Nə üçün gəlmişlər? Kim onları göndərib? Müharibə noyabrın 10-da qurtarıb, bəyanat imzalanıb. Kim göndərir onları oraya? Əgər Ermənistan rəhbərliyi qanunsuz silahlı birləşmələrə nəzarət edə bilmirsə, bu, onların problemidir. Ona görə burada heç kim bizi ittiham edə bilməz”.
Hərbi əsirlərimizi erməni diversantlarla dəyişmək ehtimalı
Mayın 26-da Azərbaycanın iki erməni diversantı əsir tutması bu şəxslərin əsirlikdəki iki hərbçimiz – Aqşin Bəbirov və Hüseyn Axundovla dəyişdirilməsi ehtimalını aktuallaşdırır. Ehtimalın reallığa nə qədər yaxın olduğu haqqında konkret fikir söyləmək mümkünsüzdür. Amma o da məlumdur ki, Azərbaycan həmişə hər bir vətəndaşına sahib çıxıb və bu mənada, erməni əsirlyindəki hərbçilərimizin azadlığı üçün bütün imkanlarını səfərbər etməkdədir.
Xatırladaq ki, Azərbaycan müharibə vaxtı ələ keçirdiyi əsirləri, habelə post-müharibə dönəmində saxladığı diversantların bir qismini təmənnasız olaraq, öz xoş niyyət və humanizminin praktiki təzahürü olaraq bir çox hallarda qarşı tərəfə təhvil verib. Əlbəttə, bu zaman onların ölkəmizə qarşı konkret cinayət əməlində, əsasən də qətllərdə əlinin olub-olmadığı araşdırılıb. Xalqımıza qarşı qətllərdə iştirak etməyənlərin İrəvana qaytarılmasına razılıq verilib. Bu baxımdan, mayın 26-da əsir götürülən iki erməni diversantla bağlı da oxşar araşdırma aparılmaqdadır.
Seymur ƏLİYEV