Fransanın Xarici işlər naziri Ketrin Kolonna “France Inter” ictimai radio kanalına müsahibəsində Qarabağ bölgəsini Azərbaycan daxilində ermənilərlə məskunlaşmış anklav adlandırıb. O, bir daha Laçın yolunun blokadada olduğunu iddia edərək, yolun açılmasını tələb edib.
Qeyd edək ki, bu, fransız nazirin ilk ermənipərəst açıqlaması deyil. Mayın 20-də onun bu vəzifəyə təyin olunmasının bir ili tamam olacaq. Buna baxmayaraq, cəmi bir il ərzində xanım Kolonna Ermənistanın və dünya ermənilərinin maraqlarına uyğun səsləndirdiyi fikirlərin sayına görə sələflərini çoxdan ötüb keçib. Məsələn, Jan-İv Le Drian ondan əvvəl 5 il ərzində (2017-2022-ci illərdə) Fransa Xarici işlər naziri olub. Ancaq onun beş ildə verdiyi ermənipərəst bəyanatlarının hamısını bir yerə yığsaq, K.Kolonnanın bir ildə səsləndirdiyi qədər olmaz. Bu mənada xanım nazir, necə deyərlər, Paşinyandan daha artıq erməni olmaq istəyinə düşüb.
Onu da bildirək ki, fransalı nazir az müddət öncə – aprelin 27-də ölkəmizdə səfərdə olub. Onun bölgəyə səfəri Ermənistandan yox, Azərbaycandan başlamışdı. Ancaq az sonra səfərin Azərbaycandan başlamasının yalnız görüntü xarakteri daşıdığı məlum olmuşdu. Belə ki, K.Kolonna Bakıda da açıq ermənipərəst bəyanat vermişdi. O, Xarici işlər naziri Ceyhun Bayramovla birgə mətbuat konfransında demişdi: “Biz Azərbaycan tərəfdən birtərəfli qaydada qurulan keçid məntəqəsini (Laçında Ermənistanla şərti sərhəddə Azərbaycanın aprelin 23-də yaratdığı sərhəd nəzarət-buraxılış məntəqəsi nəzərdə tutulur) pisləyirik, bunu bəyan etmişik. Həmçinin, Beynəlxalq Ədalət Məhkəməsinin qərarı yerinə yetirilməlidir”.
Ceyhun Bayramov isə fransız həmkarına anındaca cavab vermişdi: “Xanım nazir çıxışı zamanı dedi ki, Fransa Azərbaycan tərəfindən atılan birtərəfli addımları qəbul etmir. Həmçinin Beynəlxalq Ədalət Məhkəməsinin qərarına istinad da eşitdik. Birincisi, Azərbaycan öz Konstitusiyasına uyğun olaraq, öz ərazisində addım atıb. Bu addımından 2,5 il yarım öncə hər kəsə problemin mahiyyətini deyib. Bu illər ərzində Fransa bir dəfə də olsun Ermənistana çağırış etməyib. Beynəlxalq Ədalət Məhkəməsinin qərarına gəldikdə isə Laçın yolu üç istiqamət üzrə – vətəndaşlar, yüklər və nəqliyyat vasitələri üçün istifadə edilə bilər. Bu üç istiqamət üçün Laçın yolu hər zaman açıqdır”.
***
K.Kolonnanın fikirlərinə Azərbaycan XİN-in cavabı bu dəfə də özünü çox gözlətməyib. Nazirliyin mətbuat katibi Ayxan Hacızadə bildirib ki, fransalı nazirin Azərbaycanın Qarabağ bölgəsini yanlış olaraq “Dağlıq Qarabağ” şəklində Azərbaycanın daxilində “anklav” adlandırması ölkəmizin suverenliyinə və ərazi bütövlüyünə, eləcə də, bu bölgədən kütləvi etnik təmizlənməyə məruz qalmış azərbaycanlıların hüquqlarına hörmətsizlikdir: “Fransalı nazirə bir daha xatırlatmaq istərdik ki, Qarabağ bölgəsi Azərbaycanın beynəlxalq səviyyədə tanınmış suveren ərazisi və tərkib hissəsidir”.
A.Hacızadə qeyd edib ki, bununla yanaşı, Azərbaycanın öz suveren ərazisində yaratdığı və erməni sakinlərin artıq şəffaf şəkildə hər iki istiqamətdə keçməyə başladığı Laçın sərhəd nəzarət-buraxılış məntəqəsinin guya yolu blokadada saxladığı barədə Fransa tərəfinin iddiasının heç bir əsası yoxdur: “Azərbaycan öz sərhədlərinin mühafizəsini və bu sərhədlərdən keçidi ölkə qanunvericiliyinə və beynəlxalq səviyyədə qəbul edilmiş qaydalara uyğun olaraq həyata keçirir. Fransa tərəfi sülhə və sabitliyə xidmət etməyən bu kimi təhrikçi və təxribatçı fikirlərə son qoymalıdır”.
***
Həqiqətən də, fransalı nazirin Azərbaycan daxilindəki 14 iqtisadi rayondan biri olan Qarabağ iqtisadi rayonunu “anklav” adlandırması heç bir ölçüyə sığmır. Əgər hər bir ölkədə kompakt yaşayan milli azlıqlar üçün anklavlar yaradılsaydı, dünya elə anklavlardan ibarət olardı. Elə Fransanın özünü götürək, etnik tərkibi rəngarəngdir. Əhalinin 84 faizi fransızlardan ibarətdir. O cümlədən böyük regional etnik qruplar olan korsikalılar, oksitanlar, bretonlar, elzaslar, lotaringiyalılar, normandlar, flamandlar, katalonlar, basklar da bura daxildir. Fransa əhalisinin 7 faizini digər avropalılar, 7 faizini şimali afrikalılar, qalan 2 faizini isə indoneziyalılar, asiyalılar və Latın Amerikasından olanlar təşkil edir. Anklav yaratmaq münasibdirsə, Fransa bu hüququ öz daxilində kompakt yaşayan etnik azlıqlara münasibətdə tətbiq edə bilər.
Digər tərəfdən, K.Kolonna özü korsikalıdır. Yaxşı olar ki, o illərlə istibdad içində yaşamış Korsikanın, 300 minlik korsunun bugünkü problemlərini qaldırsın. K.Kolonna korsikalıların doğma dili korsunun hüququnun tanınmasına Fransa hökumətinin qarşı çıxmasına bir dəfə də olsun etiraz etməyib. Zənnimizcə, onun bu məsələni qaldırması, daha doğru olardı.
***
Onu da qeyd edək ki, Fransanın “öz gözündə tiri görməyib özgə gözündə tük axtarmaq” siyasətinə Prezident İlham Əliyev də dəfələrlə etirazını bildirib. Cənab İlham Əliyev Vətən müharibəsi dövründə – 2020-ci ilin oktyabrın 4-də “Əl-Ərəbiyə” televiziya kanalına müsahibəsində deyib: “Onlar Azərbaycandan əl çəkməlidirlər, onlar regiondan əl çəkməlidirlər. Biz burada öz torpağımızdayıq. Bizim torpağımız işğal olunub. Əgər Fransa Qarabağ üçün öz müqəddəratını təyinetmə istəyirsə, qoy onlar, demək olar ki, sakinlərinin yarısı ermənilərdən ibarət olan Marsel şəhərini onlara versinlər... qoy onlara müstəqillik versinlər. Qoy Korsikaya müstəqillik versinlər, qoy basklara müstəqillik versinlər. Niyə onlar bizdən Dağlıq Qarabağ üçün müstəqillik tələb edirlər? Onların bunu bizdən tələb etməyə nə haqqı var? Onlar bu ittihamları dayandırmalıdırlar”.
Dövlət başçımız Laçın rayonunun işğaldan azad olunması münasibətilə 2020-ci ilin dekabrın 1-də xalqa müraciəti zamanı Fransanın ermənipərəst mövqeyinə bir daha toxunub: “İndi məsələ həll olunandan sonra görün nələr baş verir? Fransa Senatı qətnamə qəbul edir ki, Qarabağ tanınsın. Sizin onlardan xoşunuz gəlirsə, mən müharibə dövründə demişdim, verin Marsel şəhərini, onun adını dəyişdirin, onlara orada ikinci dövlət yaradın. Amma bizim işimizə heç kim qarışa bilməz”.
Bəli, bizim işimizə heç kim qarışa bilməz. Fransa hakimiyyətinin Parisdə illərdir bitmək bilməyən “sarı jiletlilər”in etiraz aksiyalarına, pensiya yaşının artırılmasına vətəndaşların kəskin müqavimətinə, ərazisindəki etnik azlıqların problemlərinə diqqət yetirməsi daha faydalıdır.
İlyas Hüseynov,
politoloq
– Fransalı nazirin Azərbaycana qarşı həqiqətə uyğun olmayan fikirlər səsləndirməsi ilk dəfə deyil. O, beynəlxalq hüquqa açıq-aşkar hörmətsizlik edir. Nəzərə almaq lazımdır ki, Qarabağda azərbaycanlılara qarşı etnik təmizləmə siyasəti həyata keçirilib. Azərbaycan isə beynəlxalq hüquqa uyğun olaraq, Laçın yolunda təhlükəsizliyin təmin olunması üçün sərhəd nəzarət-buraxılış məntəqəsi yaradıb. Belə olan təqdirdə Fransanın Azərbaycana diplomatik hücumları yolverilməzdir. Eyni zamanda, Parisin bu cür yanlış, təhrikçi və təxribatçı bəyanatları beynəlxalq ictimaiyyəti çaşdırır, onlarda səhv mövqe formalaşdırır. Sonra isə Fransanın böyük təsiri altında olan ölkələr, xüsusilə Benilüks ölkələri (Belçika, Niderland, Lüksemburq) Azərbaycana qarşı bu yanlış siyasəti davam etdirirlər.
Ketrin Kolonnanın açıq ermənipərəst mövqeyi regional sülhə zərbə vurur və təhlükəsizlik mühitini sarsıdır. Nəzərə almaq lazımdır ki, hazırda Bakı ilə İrəvan arasında ABŞ-da effektiv danışıqlar aparılıb. Danışıqlardan sonra bu cür mövqe nümayiş etdirilməsi həm də sülh prosesini kökündən sarsıdır.
Səxavət HƏMİD, “Xalq qəzeti”