Aprelin 11-də Ermənistan silahlı qüvvələrinin bölmələri tərəfindən Gorus rayonunun Dığ kəndi (haylar “Tex” adlandırırlar) ərazisində törədilən təxribatdan sonra vəziyyət sabitləşib. Hazırda hər iki tərəf mövqelərini möhkəmləndirməklə məşğuldur.
“Azadlıq” radiosunun erməni xidmətinin məlumatına görə, hadisədən üç gün sonra azərbaycanlı və erməni hərbçilər mühəndis-istehkam işlərini bərpa ediblər. Yerli icmanın rəhbəri Arqam Ovsepyan bildirib ki, tərəflər toqquşmadan əvvəlki mövqelərində qalırlar.
***
Xatırladaq ki, martın 28-dən 29-na keçən gecə Azərbaycan Ordusu Dığ kəndi yaxınlığında yeni mövqelər tutub. Bu yerdəyişmə 2020-ci ilin 10 noyabr tarixli üçtərəfli Bəyanatda nəzərdə tutulmuş yeni Laçın yolunun istifadəyə verilməsi, yolun Laçın şəhərindən cənuba köçürülməsi ilə əlaqədardır. Əgər əvvəlki Laçın–Xankəndi yolu Dığ kəndindən keçməklə Ermənistanla birləşirdisə, yeni yolun birləşdirilməsi artıq qonşu Kornidzor kəndindən keçir.
Ötən ilin avqustunda Ermənistan yolun öz ərazisindən keçən hissəsinin tikintisini başa çatdırmadığına görə Azərbaycan tərəfi ona 2023-cü il aprelin 1-dək köhnə yolun köhnə hissəsindən istifadəyə müvəqqəti icazə verib. Bu müddət başa çatdıqdan sonra Azərbaycan Ordusu bu yolu, eləcə də Ermənistanla sərhədin Dığ kəndi istiqamətindən keçən hissəsini bağlayıb.
Erməni tərəfi iddia edir ki, sovet dövründən qalma xəritələrə görə, Azərbaycan Ordusunun yeni mövqeləri Ermənistan ərazisindən cəmi bir neçə yüz metr məsafədə yerləşir. Aprelin 11-dəki toqquşmalar da məhz bu mövqelərin koordinatlarının dəqiqləşdirilməsi ilə bağlı mübahisələr fonunda baş verib.
***
Arqam Ovsepyan iddia edir ki, azərbaycanlılar hazırda bütün kənd üzrə on üç post yaradıblar. Onun sözlərinə görə, hazırda tərəflər arasında danışıqlar aparılmır. Bundan əvvəl, artıq xəbər verildiyi kimi, danışıqlara erməni tərəfdən xüsusi təyinatlı ordu korpusunun komandiri, polkovnik Armen Gözəlyan rəhbərlik edirdi. Amma aprelin 11-də hərbi eskalasiya nəticəsində Gözəlyan ağır yaralanıb və hazırda xəstəxanadadır.
“Gözəlyan hər gün kəndə enir, danışıqlar aparırdı...” – deyə Dığ icması üzvlərindən biri “Azadlıq” radiosuna müsahibəsində bildirib. “Bütün işləri ancaq ordu görür. Bəs, sizcə, danışıqları kim aparmalıdır?”, – deyə icma üzvü qeyd edib.
***
Erməni analitiklər isə 11 aprel insidentinin arxasında Rusiyanın dayandığını iddia edirlər. Onların fikrincə, Moskvanın məqsədi Avropa İttifaqının Ermənistandakı sərhəd missiyasını gözdən salmaq olub. Erməni politoloq Andrias Qukasyan hesab edir ki, Dığ kəndi yaxınlığında eskalasiya avropalı müşahidəçilərin missiyasını gözdən salmağa yönəlmiş kampaniyanın bir hissəsidir.
Onun fikrincə, bu kampaniyanın məqsədlərindən biri ictimai rəyə nəzarət etmək və Ermənistanda hakimiyyəti dəyişə biləcək Qərbpərəst siyasi qüvvənin formalaşmasının qarşısını almaqdır.
“Əgər cavab reaksiyası olmazsa, Avropa missiyası nüfuzdan düşəcək, Avropa İttifaqına Ermənistan əhalisinin inamı itəcək. Bu da cəmiyyətin birləşməsi və konsolidasiyası üçün maneələr yaradacaq”, – deyə Qukasyan “Kavkazski uzel”in müxbirinə müsahibəsində vurğulayıb. Qeyd edib ki, Moskvaya Ermənistan–Rusiya münasibətlərinin alternativinə inamsızlıqla yanaşan cəmiyyət lazımdır.
Siyasi şərhçi Naira Ayrumyan da Aİ missiyasına qarşı məqsədyönlü informasiya kampaniyasının aparıldığını bildirib: “Aİ missiyasının diskreditasiyası gedir, onun regiondan çıxarılmasına cəhdlər edilir. Eyni zamanda Qərb anlayır ki, Ermənistanı tərk etsə, həm bütövlükdə Cənubi Qafqazı, həm də Yaxın Şərqi tərk edəcək”.
Göründüyü kimi, Dığ ətrafında hələ ki, nisbi sakitlik hökm sürür. Bu sakitliyin nə qədər davam edəcəyi isə hayların özlərini necə aparacağından asılı olacaq. Dığ kəndi və digər sərhədyanı kəndlərlə bağlı gələcəkdə baş verə biləcək proseslər özlərini “qədim və sivilizasiyalı” xalq hesab edən hayların dinc yanaşı yaşamaq prinsipinə nə qədər hörmətlə yanaşdıqlarının bir göstəricisi də hesab oluna bilər.
Yeganə HACIYEVA,
politoloq
Ermənistan tərəfi Dığ kəndi ətrafında yaranmış məsələyə, həmçinin, bütövlükdə sərhəd məsələsinə Avropa İttifaqının mülki missiyasını alət edir. Biz ilk günlərdən bu elementləri izləməkdəyik. Bizim o əraziləri izləmək üçün texniki vasitələrimiz çox güclü olduğu üçün oranın məhz naviqasiya vasitəsilə Azərbaycan əraziləri olduğu və hayların ora daxil olmasının təxribat xarakteri daşıdığı sübuta yetirildi. Onu da qeyd etmək lazımdır ki, haylar orada missiyanın tərkibindəki fransızlarla əlbir olaraq missiyanı da təxribata alət etmək istəyirdilər. Bunun özü də Azərbaycan tərəfindən diplomatik və digər kanallarla Avropa İttifaqının diqqətinə çatdırıldı. Sonrakı mərhələdə isə Ermənistan bunu orduda Rusiyaya bağlı olanların üzərinə atdı və sair.
Bəs, bu, nəyə gətirib çıxara bilər? Məsələ ondadır ki, Avropa İttifaqı dəqiq tanımadığı regionda onun səlahiyyətlərini və maraqlarını zədələyən proseslərə baş qoşub. Bu proseslər Aİ-nin Cənubi Qafqazda əldə etdiyi imkanlardan məhrum olması üçün şərtlər formalaşdırır. Azərbaycan Aİ-nin birinci missiyasının gəlişinə razılıq vermişdi və onunla əməkdaşlıq edirdi. İkinci missiya ilə bağlı bizim heç bir öhdəlik, məsuliyyət və əməkdaşlığımız yoxdur. Ümumiyyətlə, biz hesab edirik ki, ikinci missiyanın fəaliyyətində Azərbaycanın Aİ ilə münasibətlərini zədələyən məqamlar var. Çünki bu, bizimlə razılaşdırmadan təktərəfli qaydada verilən qərardır. Məsələ ondadır ki, Aİ daxilində bir qüvvə Ermənistan vasitəsilə məhz Aİ-nin enerji təhlükəsizliyində iştirak edən Azərbaycanla münasibətlərini korlamaq yolu tutub. Burada da Fransa başda gedir. Bu, proseslər uzunmüddətli perspektivdə Rusiyanın da maraqlarına cavab verir. Çünki Azərbaycan Aİ-nin enerji bazarına yeni bir oyunçu kimi daxil olub və bu da qiymətlərin sabitləşməsinə, bu bazarda Rusiyanın monopoliyasının zədələnməsinə səbəb olub.
Ümumilikdə, Azərbaycanın məqsədi onun sərhədlərinin təhlükəsizliyinin təmin olunmasıdır. Biz öz sərhədimiz boyu terror dəhlizinin formalaşmasına imkan verməyəcəyik.
Səxavət HƏMİD, “Xalq qəzeti”