Fransada Prezident Emmanuel Makronun irəli sürdüyü pensiya islahatına qarşı etiraz aksiyalarının yeni dalğası baş tutub. Dünən ölkənin bir sıra şəhərlərində sayca 12-ci etiraz nümayişi keçirilib. Məlumatı “Euronews” verib. 

Məlumata görə, ölkədə nəqliyyat, məktəblər və tullantıların yığılması sahələrində çalışanlar tətilləri davam et­diriblər. Şəhərlərarası və şəhərdaxili də­mir yolu nəqliyyatının hərəkətində prob­lemlər yaranıb. 

Nümayişlər ölkənin 270 şəhər və qəsəbəsində keçirilib. Etiraz aksiyala­rında 600 minə yaxın insan iştirak edib. Aksiyaya “sarı jiletlər”in də qatıldığı bildi­rilir. 12-ci etiraz nümayişi ilə bağlı 11 500 polis və jandarm səfərbər olunub ki, on­lardan 4200-ü Parisdə asayişi qorumaqla məşğul olub. Parisdə nümayişçilər Opera meydanından Bastiliya meydanına doğru irəliləyiblər. Aksiya polislə toqquşmasız ötüşməyib. Saxlanılanlar var. 

Amma ölkədə Makronun pensiya isla­hatları heç də iqtisadçıların hamısı tərə­findən dəstəklənmir. Dünən Fransanın sabiq iqtisadiyyat və maliyyə naziri, Bey­nəlxalq Valyuta Fondunun (FMİ) sabiq prezidenti Dominik Stross-Kan Makronun pensiya sistemində islahat planında bu­raxdığı səhvləri tənqid edib. Onun fikrin­cə, planda dörd səhvə yol verilib və əgər bu səhvlər düzəlməsə, beşinci səhv daha ciddi nəticələrə gətirib çıxaracaq.

Stross-Kan özünün “Twitter” hesa­bında paylaşdığı “Beşinci səhv” adlı ya­zısında Fransanın acınacaqlı vəziyyətdə olduğunu bildirib. Onun sözlərinə görə, bu gün pensiya sisteminin maliyyələşdi­rilməsində islahatlar zəruridir, amma bu gün pensiya yaşı deyil, pensiya sistemi konsepsiyası dəyişdirilməlidir. 

Sabiq BVF rəhbəri yazır: “Prezident Makron dörd səhvə yol verib. Fransa pensiya müddətinə əsaslanan sistem qurmaq üçün pensiya yaşına əsasla­nan sistemi tərk etməlidir. Stross-Kanın fikrincə, Makronun pensiya islahatı çox pis vaxtda – fransızların bir çox başqa çətinliklərlə üzləşdiyi dönəmdə irəli sü­rülüb. Deməli, vaxt düzgün seçilməyib: “İllərdən bəri buraxılan ardıcıl səhvlərin ölkəni çıxılmaz vəziyyətə salması təəc­cüb doğurmur”.

İqtisadçı pensiya islahatının vacib olduğunu etiraf edir, amma onu da bildi­rir ki, bu addım belə təcili atılmamalı idi. Başqa sıxıntılardan, xüsusilə də alıcılıq qabiliyyətinin aşağı düşməsindən, infl­yasiyadan əziyyət çəkən fransızlara bu islahat daha bir ağır zərbə olub.

Sabiq BVF prezidenti ölkədə son za­manlar yaranmış sosial duruma diqqət çəkərək bəyan edib ki, keçirilmiş sorğu­lar fransızların gündə bir dəfə yeməyi (üç dəfə deyil, iki dəfə yemək yeyirlər) təxirə salmaq məcburiyyətində qaldıqlarını göstərir. Onun fikrincə, hazırda düzəldil­məli təcili vəziyyət budur: “Əlbəttə, qa­nunlar küçədə deyil, parlamentdə qəbul edilməlidir. Amma küçəni dinləmək, anla­maq da siyasi məsuliyyətin bir hissəsidir. Artıq birdən-birə kəsilən sosial dialoqun tellərini təzələmək üçün təşəbbüs göstər­mək Prezidentin üzərinə düşür”.

“Xalq qəzeti”