Özünü bütün dünyaya İslam hamisi kimi tanıdan İran uzun illərdir ki, dindən siyasi ambisiyalarını reallaşdırmaq üçün istifadə etməkdə, dini siyasi maraqlarının alətinə çevirməkdədir. İranın İslam dinindən siyasi məqsədlərlə istifadə etməsi rəsmi Tehranın həm daxili, həm də xarici siyasətində öz əksini tapmaqdadır.

Haqqa tutulan divan 

Tehran rejiminin dini siyasi hədəf­lərə çatmaq vasitəsinə çevirməsinin ən bariz nümunəsi İranda haqqı deyən, ölkədəki ədalətsiz, anti-demokratik idarəetmə sisteminə etiraz edən, sosi­al ədalətsizlikdən şikayətlənən insanla­ra tutulan divandır. Halbuki, xalqın öz arzu-istəyini, eləcə də etirazını ifadə etməsi demokratiya ilə yanaşı, həm də İslam dininin ona verdiyi başlıca hüquqlardan biridir. 

İslam dini ədalətsizliyə qarşı müba­rizə aparmağı hər bir müsəlmanın əsas vəzifələrindən biri hesab edir, haqsızlı­ğın mütilik və susqunluqla qarşılanma­sını qınayır. 

İranın özünü İslam dövləti elan etdi­yini nəzər alsaq, o zaman rəsmi Tehran bu cür etirazları anlayışla qarşılamalı, insanların haqq səsini dinləməli, on­ları narahat edən problemlərin həllinə çalışmalıdır. Lakin fars-molla rejimi İs­lam dininin ruhuna və mahiyyətinə zidd olaraq, etirazçılara divan tutmaqda, onları təxribatda ittiham edərək ölümə məhkum etməkdədir. Təkcə bir faktı qeyd edək ki, 2022-ci ildə İranda edam edilən insanların sayı 500 nəfərdən çox olub və onların böyük əksəriyyəti sırf siyasi amillərlə bağlı öldürülüb. Bu, rəsmi Tehranın hətta öz vətəndaşları­na qarşı belə, amansızcasına davran­dığını, İslam dininin tələbləri əsasında hərəkət edən insanları qətlə yetirdiyini göstərir.

Fars-molla rejiminin türk soyqırımı

Tehran rejiminin idarəetmə siste­mində diqqətçəkən məqamlardan biri də fars-molla rejiminin edam cəzasın­dan azərbaycanlı siyasi fəallara, milli düşüncə mənsublarına qarşı cəza və soyqırımı vasitəsi kimi istifadə etmə­sidir. Bugünə qədər hüquqları pozu­lan on milyonlarla soydaşımıza ədalət tələb edən, Azərbaycan xalqının dilinə, mədəniyyətinə, adət-ənənəsinə, mil­li kimliyinə, tarixi şüuruna qəsd edən rəsmi Tehrana etirazını bildirən min­lərlə soydaşımız fars-molla rejiminin qurbanı olub. Onların bir qismini zin­dan həyatına məhkum edən İran, digər hissəsini edam vasitəsilə fiziki olaraq neytrallaşdırıb. Bir çox azərbaycanlı fəal isə rəsmi Tehran tərəfindən təşkil edilən sui-qəsdlərə qurban gedib. İran bu üsulla öz hakimiyyətinə, fars-molla rejiminə təhlükə hesab etdiyi azərbay­canlıları məhv edir, digər fəallar arasın­da qorxu, vahimə mühiti formalaşdır­mağa çalışır. Ən dəhşətlisi isə budur ki, İran rejimi bütün bu cinayətlərin hamı­sını din pərdəsi altında həyata keçirir. 

İslam dini, yoxsa “işğal dini”

Rəsmi Tehranın insanlığa qarşı ci­nayətləri ilə yanaşı, həm də müqəddəs dinimizə qarşı yol verdiyi cinayətlərdən biri də İslam dinini “işğal dininə” çevir­məsidir. Sülh dini olan İslamdan təca­vüzkar məqsədləri üçün istifadə edən İran din faktoru vasitəsilə həm İrandakı soydaşlarımızı, həm də Azərbaycan­dakı vətəndaşlarımızı öz yalanlarına inandırmağa, onların beynini ələ keçir­məyə cəhd edir. Məhz bu məqsədlə də Azərbaycandan İrana dini təhsil almaq üçün gedən gənclərimizə dindən daha çox, Tehranın maraqları təbliğ edilir. 

İran rejiminin siyasi-mənəvi əxlaq­sızlığı o həddə çatıb ki, bu ölkənin xü­susi xidmət orqanları dini təhsil almaq üçün İrana üz tutan vətəndaşlarımızı əməkdaşlığa cəlb etməyə çalışır. Molla rejimi İslam dini ilə bağlı təhsil və dün­yagörüşünü genişləndirmək istəyən gənclərimizi inandırmağa çalışır ki, guya, dünyada “əsl İslam” yalnız İran­da mövcuddur və buna görə də hər bir müsəlman İrana dəstək verməli, Tehra­nın tapşırıqlarının icraçısı olmalıdır. 

İran dövləti öz əlaltıları vasitəsilə Azərbaycan daxilində də geniş iş apa­rır, yeni casus şəbəkələri formalaşdır­mağa, dövlətimizin və cəmiyyətimizin “dərinliyinə” nüfuz etməyə çalışır. 

Son aylar ərzində Dövlət Təhlükə­sizliyi Xidməti tərəfindən İrana çalışan iki böyük casus şəbəkəsinin ifşa edil­məsi faktı Tehranın Azərbaycanla bağlı təxribatçılıq planlarının hansı ölçüdə olduğunu əks etdirir. 

Bir sözlə, bu gün İran dini maarif­ləndirmə adı altında vətəndaşlarımı­zın zehnini, ağıl və düşüncəsini ələ keçirməyə, ölkəmizi daxilən – elə öz vətəndaşlarımızın əli ilə işğal etməyə çalışır. Bir tərəfdən dövriyyəyə tonlarla narkotik maddə buraxan “İslam döv­ləti”nin, digər tərəfdən özünü “İslamın yeganə dayağı” kimi təqdim etməsi də bu məqsəddən irəli gəlir.

Qafqaz Müsəlmanları İdarəsinə açılan “atəş” 

Vətən müharibəsindən sonra molla rejiminin Azərbaycanla bağlı siyasə­tində diqqətçəkən digər bir məqam Qafqaz Müsəlmanları İdarəsini (QMİ) hədəfə götürməsidir. Müharibədən sonra terrorçu Ermənistana iqtisadi-si­yasi yardımlarını artıran, sözün həqiqi mənasında, Ermənistanın hamisi kimi çıxış edən İranın Qafqaz Müsəlmanla­rı İdarəsi tərəfindən ifşası Tehran reji­mini özündən çıxarıb. Buna görə də müxtəlif dini liderlərin dili ilə QMİ-yə qarşı hücuma keçən İran, bu qurumu gözdən salmağa, onun nüfuzuna zər­bə endirməyə çalışır. Halbuki Qafqaz Müsəlmanları İdarəsinin erməni hava­darı olan Tehran rejiminə tutduğu bü­tün iradlar haqlı və yerində olub. 

Vurğulayaq ki, Qafqaz Müsəlman­ları İdarəsinin sədri Allahşükür Pa­şazadə İranın ermənilərə dəstəyinin, Azərbaycana düşmən münasibətinin İslam tarixi baxımından da böyük yan­lış olduğunu vurğulayaraq deyib: “Biz onlara qardaş deyirik. Çünki biz İranı belə tanıyırdıq. Gördük ki, bu qardaşın başqa qardaşı da var imiş. Biz ögey qardaş imişik. Mən elə bilirəm ki, onlar səhvlərini başa düşərlər. Onlar başa düşərlər ki, bu, İslam tarixində də bö­yük səhvdir. Ümid edirəm ki, səhvlərini başa düşüb qayıdacaqlar”.

Göründüyü kimi, Qafqaz Müsəl­manları İdarəsinin sədri Allahşükür Pa­şazadə İrana öz əməllərini xatırladaraq onu səhvlərini anlamağa, yanlış yoldan geri dönməyə çağırır. Fars-molla reji­mi isə bu çağırışa böhtan və iftiralarla qarşılıq verir ki, bu da Tehran hakimiy­yətinin, hər şeydən öncə İslam dininə olan riyakar münasibətini əks etdirir. Ancaq rəsmi Tehran bilməlidir ki, Azər­baycana münasibətdə necə bir mövqe sərgiləməsindən asılı olmayaraq artıq bütün dünya İranın İslam dinindən sırf siyasi məqsədlər üçün istifadə etdiyini bilir və onun səmimiyyətinə inanmır. Odur ki, İranın İslam pərdəsi altında Azərbaycana, onun ayrı-ayrı qurum və şəxslərinə açdığı “atəşin” heç bir səmərəsi olmayacaq.

Seymur ƏLİYEV, “Xalq qəzeti”