ABŞ-ın Ermənistana yeni təyin olunmuş səfiri Kristina Kvin Laçın–Xankəndi yolunun başlanğıcında olub. Bununla bağlı səfirliyin yaydığı rəsmi məlumatda Laçın–Xankəndi yolu “Laçın dəhlizi” adlandırılır. Həmçinin yolun 3 aya yaxındır nəqliyyatın hərəkəti üçün bağlı olduğu qeyd edilir.

“Səfir Kristina Kvin ABŞ-ın Dövlət katibi Entoni Blinkenin Laçın dəhlizinin dərhal yenidən açılması ilə bağlı ça­ğırışını təkrarlayıb. Sünik qubernatoru Robert Qukasyan səfirə Laçın dəhlizi­nin blokadasının nəticələrini və bunun yüzlərlə erməni ailəsinə təsirini təqdim edib”, – ABŞ-ın Ermənistandakı səfirli­yinin məlumatında deyilir.

Məsələyə Azərbaycan Xarici İşlər Nazirliyinin münasibəti özünü çox göz­lətməyib. Nazirliyin mətbuat xidmətinin rəhbəri Ayxan Hacızadə “Twitter”də Laçın yolunun normal nəqliyyat üçün hər zaman açıq olduğunu qeyd edib. O bildirib ki, Azərbaycan yolda maneə­siz hərəkəti təmin etmək üçün əlindən gələni edir: “Şəffaflıq və təhlükəsizlik üçün sərhəd-keçid məntəqəsinin yara­dılması mütləqdir”.

ABŞ-ın İrəvandakı səfirinin ermə­nipərəst mövqeyi, eləcə də səfirliyin məlumatındakı yanlış məqamlar ona bi­zim də reaksiya verməyimizi zəruri edir.

Birincisi, Azərbaycan ərazisin­də hər hansı “Laçın dəhlizi” yoxdur. Bu, ölkənin iki inzibati-ərazi vahidi­ni – Xankəndi və Laçını birləşdirən Xankəndi-Laçın yoludur. Azərbaycanın Qarabağ iqtisadi rayonunda yaşayan ermənilər bu yol vasitəsilə Ermənistan­la əlaqə saxlaya bilirlər. Buna heç kim etiraz etmir, ancaq bu yolun “dəhliz” adlandırılması, ona hansısa əlahiddə status verilməsi qəbuledilməzdir. Bu fakt da maraqlıdır ki, Zəngəzur dəhli­zini açmaqdan israrla yayınan, “hər cür dəhliz məntiqi istisna olunur” deyən rəsmi İrəvan Laçın-Xankəndi yolunu “dəhliz” adlandırır. Baxmayaraq ki, Ermənistan Azərbaycanın qərb rayon­ları ilə Naxçıvan Muxtar Respublikası arasında quru əlaqəsinin bərpa olun­masına dair 10 noyabr 2020-ci ildə öz üzərinə yazılı öhdəlik götürüb. Ancaq bu öhdəlik indiyədək yerinə yetirilmə­miş qalır.

İkincisi, Laçın-Xankəndi yolunun bağlı olduğunu iddia etmək açıq-aşkar yalan danışmaqdır. Fakt budur ki, yol humanitar yüklərin daşınması, insan­ların gediş-gəlişi üçün hər iki tərəfdən açıqdır. Azərbaycan, sadəcə olaraq, bu yolla hərbi təyinatlı yüklərin daşın­masına qarşıdır. Rəsmi Bakı Qara­bağdakı erməni silahlı birləşmələrinin tör-töküntülərinin ərazimizi tərk etmə­sini, şəxsi heyətin rotasiyasının həyata keçirilməməsini, habelə silah-sursatın daşınmasının qarşısının alınmasını istəyir. Artıq 91 gündür Laçın-Xankəndi yolunda keçirilən dinc ekoloji aksiyanın məqsədi də budur.

Üçüncüsü, ABŞ Dövlət katibi En­toni Blinkenin Laçın yolunun dərhal açılmasına dair hansısa məchul çağı­rışından sitat gətirməkdənsə, K.Kvinin dünyanın superdövlətinin səfiri kimi Azərbaycanla Ermənistan arasında sülhün əldə olunmasına dair çağırış­lar etməsi daha yaxşı olardı. Səfirin bu mövqeyi regionda ABŞ-la çoxtərəfli əməkdaşlıq əlaqələri quran, rəsmi Va­şinqtonun müttəfiqi Azərbaycanın önə­mini hər fürsətdə vurğulayan Dövlət Departamenti və Ağ evin mövqeyi ilə ziddiyyət təşkil edir. Maraqlıdır, səfirin söylədiyi bu fikirlər nəyə əsaslanır? Axı bu mövqe rəsmi Vaşinqtonun mövqe­yi ilə üst-üstə düşmür. Bəlkə də da­ban-dabana ziddir.

Dördüncüsü, xanım səfirə xatırlat­maq istərdik ki, dipmissiyanın açıqla­masında “Sünik” adlandırılan ərazinin tarixi adı Zəngəzurdur. O Zəngəzur ki, onu bolşeviklər 1920-ci ildə Azər­baycandan qopararaq, Ermənistana birləşdiriblər. Bu gün Zəngəzur ABŞ-ın əsas rəqiblərindən olan İranın var­lığını getdikcə artırdığı bölgədir. Elə bunu xatırlatmaq kifayətdir ki, İran ötən ilin oktyabrında Zəngəzurun inzibati mərkəzi olan Qafanda baş konsulluq açıb. ABŞ səfirinin bu kimi məsələlərə daha dərindən diqqət yetirməsi, zən­nimizcə, onun öz ölkəsinin maraqları baxımından daha faydalı olardı.

S.HƏMİD, “Xalq qəzeti”