Azərbaycan paytaxtı növbəti dəfə qlobal miqyaslı tədbirə evsahibliyi etdi. Martın 9-da Prezident İlham Əliyevin himayəsi altında və Nizami Gəncəvi Beynəlxalq Mərkəzinin təşkilatçılığı ilə başlanan “Dünya bu gün: Çağırışlar və ümidlər” mövzusunda X Qlobal Bakı Forumu öz işini uğurla yekunlaşdırdı.
İştirakçılarının təmsilçilik səviyyəsi və intellektual potensialına görə, Qlobal Bakı Forumu artıq beynəlxalq müzakirə platforması kimi tanınır və qəbul edilir. Forumda dünyanı narahat edən ən müxtəlif məsələlər müzakirə olundu, onların həlli ilə bağlı beynəlxalq ictimaiyyətə çağırışlar ünvanlandı. Budəfəki forum da bu baxımdan istisna olmadı. Forumun sonuncu günü bir sıra maraqlı müzakirələrlə yadda qaldı.
***
Bosniya və Herseqovinanın sabiq baş naziri Zlatko Laqumciyanın moderatorluğu ilə keçirilən “Avropa İttifaqı kontekstində Qərbi Balkan regionu” mövzusuna həsr olunan tədbirdə əvvəlcə mövzu ilə bağlı videoçarx nümayiş olunub.
Qərbi Balkan regionunun Avropa İttifaqı (Aİ) kontekstində rolunu qeyd edən Zlatko Laqumciya tərəflər arasında əlaqələrin daha da gücləndirilməsinin vacibliyini vurğulayıb və inteqrasiyanın önəmini qeyd edib. Bildirib ki, bu mövzu bizi narahat edən məsələlərdəndir və onun məhz Qlobal Bakı Forumunda müzakirə edilməsini qərara aldıq.
Cənub-Şərqi Avropanın dəyişdiyini bildirən moderator Balkan regionunun Qərbi Avropa tərəfindən dəstəkləndiyini qeyd edib və Balkan ölkələrinin tezliklə Aİ-yə inteqrasiya ediləcəyinə ümid bəslədiyini bildirib.
Çexiyanın sabiq baş naziri Yan Fişer çıxışında Bakıda olmaqdan və Qlobal Forumda iştirak etməkdən çox məmnun olduğunu bildirib. Qeyd edib ki, forumda dünyamızı maraqlandıran və narahat edən məsələlər müzakirə olunur.
Yan Fişer bildirib ki, zaman sürətlə keçir və biz vaxtdan səmərəli istifadə etməliyik. O, daha sonra Qərbi Balkan ölkələrinin Avropaya inteqrasiyasından danışıb: “Adama elə gəlir ki, bu proses gedir və ümid edirəm, biz bunu tezliklə görəcəyik. Üç əsas məsələyə diqqəti yönəltmək istəyirəm. Bunlar cari vəziyyət, Avropa İttifaqı ilə Qərbi Balkan ölkələri arasındakı indiyədək olan inkişaf və ümumi siyasi icmanın yaradılması məsələsidir”.
Rusiya–Ukrayna müharibəsindən danışan Yan Fişer bunun ağır fəsadlarını qeyd edib və sülhün, sabitliyin təmin olunmasının vacib olduğunu bildirib. Onun sözlərinə görə, Aİ-nin dünya səhnəsində böyük oyunçu olması üçün bir çox amillər lazımdır.
Aİ və Qərbi Balkan ölkələri arasında əməkdaşlıq əlaqələri var, amma bu əlaqələri genişləndirmək lazımdır. Qərbi Balkan ölkələrinin idxalının üçdə iki hissəsinin Avropa İttifaqının payına düşdüyünü diqqətə çatdıran natiq əməkdaşlığın inkişafında bazar iqtisadiyyatının rolunu vurğulayıb: “Biz əməkdaşlığın inkişafı və inteqrasiya üçün lazımi mexanizmlər hazırlamalı və siyasi iradə nümayiş etdirməliyik. Bu məsələnin geosiyasi əhəmiyyəti var. Ümid edirəm ki, Qərbi Balkan ölkələrinin nümayəndələri tezliklə Avropa İttifaqının rəsmiləri ilə bir masada əyləşə biləcəklər”.
Eyni panel müzakirəsində çıxış edən Xorvatiyanın sabiq (2015-2020) prezidenti Kolinda Qrabar-Kitaroviç Qərbi Balkan regionu, Aİ və NATO-nun gələcəyinin ikitərəfli münasibətlərdə yaranan problemlərin həllindən asılı olduğunu bildirib. Qeyd edib ki, Qərbi Balkan regionu Aİ-nin bir parçasıdır.
Sabiq prezident vurğulayıb ki, Aİ qlobal miqyasda ölkələri sülh yolu ilə birləşdirməlidir: “Hazırda Ukraynada gedən müharibə Avropa İttifaqında təhlükəsizliyi və sabitliyi çox həssas bir məsələyə çevirib, digər ölkələrin Aİ-yə qoşulmaq istəklərinə təhlükə yaradıb. İnsanlar prosesləri dəstəkləməli, seçkilər yolu ilə gələcəklərini müəyyən etməlidirlər. Xorvatiyaya qonşu ölkələrdə lazım olan meyarların uyğunlaşdırılması prosesində dövlətlər arasında birgə əməkdaşlıq vacibdir”.
Bolqarıstanın sabiq prezidenti Petar Stoyanov çıxışında bildirib ki, Qərbi Balkan regionunun Aİ-yə inteqrasiyası məsələsi artıq uzun müddətdir gündəlikdədir. O, Aİ ilə Ukrayna arasında üzvlüklə bağlı prosesə də toxunub. Sabiq prezident deyib ki, Avropa Komissiyası Ukraynanın üzvlük prosesini təqdir edir, ciddi irəliləyişin olduğunu vurğulayır, ancaq Avropa Komissiyasının prezidenti üzvlük kriteriyalarını unudur.
“Ukrayna müharibə edən bir ölkənin üzvlüyünün müzakirə olunmasına dair Aİ tarixində ilk hal olacaq. Qərbi Balkanlarda həm siyasətçilər, həm də cəmiyyətlər buna hazır olduqlarını bildirsələr də irəliləyiş yoxdur”, – deyə Petar Stoyanov vurğulayıb.
O əlavə edib ki, Qərbi Balkan regionunda regional əlaqələrin dərinləşməsi bu ölkələrin Aİ-yə inteqrasiyasına təkan verə bilər: “Ancaq biz etiraf etməliyik ki, Aİ-nin inteqrasiya səyləri son onillikdə heç bir nəticə verməyib. Ukrayna müharibəsi göstərdi ki, Avropa necə həssasdır, eyni zamanda, göstərdi ki, genişlənmə prosesi üçün texniki kriteriyalar bəzən gözardı edilə bilir”.
Rumıniyanın sabiq prezidenti Emil Konstantinesku Qlobal Bakı Forumunun əhəmiyyətini qeyd edərək, onun beynəlxalq problemlərin müzakirəsi üçün mühüm platforma olduğunu deyib. Aİ və Qərbi Balkan regionu arasında mövcud münasibətlərdən danışan sabiq prezident dəyərlərdən bəhs edərkən bildirib: “Ən böyük münaqişələr 1990-cı illərdə Bosniya və Herseqovinada baş verib. Bizim vəzifəmiz təcrübədən faydalanmaqdır. Tarix və zaman dəyişir, təbii olaraq, dövlətlərin, ölkələrin baxışları da dəyişir. İnteqrasiya olmadan Avropada sabitlikdən danışmaq mümkün deyil. Açar söz həmrəylikdir. Biz birlik göstərməli və ortaq məxrəcə gəlməliyik”.
X Qlobal Bakı Forumu aktual məsələlərin müzakirə edildiyi platformadır. Bunu jurnalistlərə açıqlamasında Monteneqronun sabiq müdafiə naziri Militsa Peyanoviç-Durişiç deyib.
O bildirib ki, sessiyalardan birinin Qərbi Balkan regionu mövzusuna həsr olunmasından razı qalıb. “Bu, vacib mövzudur, çünki bu regionda bir çox çağırışlar var. Biz region ölkələrinin Avropaya inteqrasiyasından danışdıq. Bu məsələnin geosiyasi və geostrateji aspekti var”, – deyə sabiq nazir bildirib.
***
Forumun sonuncu günü keçirilən müzakirələrdən biri də Yaxın Şərqdəki vəziyyətlə bağlı olub. “Yaxın Şərq və ətrafında sülh, stabillik və inkişaf axtarışında” mövzusunda panel müzakirədə çıxış edən Səudiyyə Ərəbistanının Kral Faysal İslam Araşdırmalar Mərkəzinin sədri Şahzadə Turki al-Faysal al-Səud qlobal ictimaiyyətin Yaxın Şərqdəki böhranlara da bərabər diqqət yetirməli olduğunu vurğulayıb. O deyib ki, bu gün dünya Ukraynadakı vəziyyətə fokuslanıb, çünki böhran indi baş verir, ancaq Yaxın Şərqdə böhran uzun müddətdir davam edir: “Bu böhranlar bərabər diqqət tələb edir”.
Çıxış edən Ərəb Dövlətləri Liqasının keçmiş sədri, Misirin sabiq xarici işlər naziri Əmr Musa deyib ki, regiondakı bütün münaqişələrin bitməsi onların da marağındadır: “Biz Yaxın Şərqi nüvə silahından və digər dağıdıcı silahlardan azad region kimi görmək istəyirik. Əgər bir ölkə nüvə silahına sahib olmağa çalışırsa, ona təzyiq göstərmək və artıq nüvə silahına sahib olan ölkəyə təzyiq göstərməmək mənə məntiqsiz gəlir”.
Əmr Musa vurğulayıb ki, sülh, tərəflərin bir birinin hüquqlarını tanımasına əsaslanır: “Ancaq insanlar qətlə yetirilir, evlərindən çıxarılırsa sülhə necə nail olmaq olar?!”
İslam Əməkdaşlıq Təşkilatının sabiq baş katibi Ekmeleddin İhsanoğlu deyib ki, Yaxın Şərq xalqları eyni dəyərləri bölüşdüyü kimi, həm də çətinlikləri, problemləri, pessimizmi bölüşür: “Bu region iqtisadi böhranlardan, qeyri-sabitlikdən, toqquşmalardan əziyyət çəkir”.
Onun sözlərinə görə, əgər bu regionun xalqları hazırkı böhrandan çıxmaq yolları barədə düşünməsə, bunun üçün birlikdə çalışmasa nəticə də olmayacaq: “Regiondakı qonşuların sülh içində yaşaması o demək deyil ki, bu qonşu ölkələr bir-birini sevir, bu, o deməkdir ki onlar sadəcə bir-birinə tolerantlıq göstərə, sülh içində birgə yaşaya bilirlər”.
Beləliklə, yetərincə önəmli və planetin sakinlərini düşündürən qaynar məsələlərə toxunulan X Qlobal Bakı Forumu başa çatdı. Forumu yüksək səviyyədə təşkil etməklə Bakı növbəti dəfə dünyanı narahat edən bir sıra problemlərin həllində bundan sonra da önəmli rol oynayacağını ortaya qoydu. Qlobal Bakı Forumunun budəfəki Zirvə görüşündə səslənən çağırışlar, edilən müraciətlər onu deməyə əsas verir ki, Azərbaycan beynəlxalq miqyaslı bir çox problemlərin həll edilməsində də söz sahibidir. X Qlobal Bakı Forumu bunu növbəti dəfə təsdiqləmiş oldu.
H.SƏXAVƏT, “Xalq qəzeti”