Avropa İttifaqının Cənubi Qafqaz üzrə xüsusi nümayəndəsi Toivo Klaar Azərbaycana gəlib. O, səfərdən öncə “Twitter”də səfərinin məqsədlərini bir neçə cümlə ilə belə izah edib: “Yenidən Bakıda. Münxendəki görüşlərdən sonra sülh prosesini inkişaf etdirmək üçün Azərbaycan rəhbərliyi ilə substantiv danışıqları səbirsizliklə gözləyirəm. Bu gün baş verən hadisə (Xəlfəli–Turşsu yolunda erməni separatçıların törətdiyi qanlı insident-müəl.) sabitliyə və ədalətli sülhə nail olmaq üçün danışıqlarda irəliləyişin vacibliyini vurğulayır”.
Azərbaycan Prezidenti İlham Əliyevmartın 6-da Avropa İttifaqının Cənubi Qafqaz üzrə xüsusi nümayəndəsi Toivo Klaarı qəbul edib. Dövlətimizin başçısı Avropa İttifaqı Şurasının Prezidenti Şarl Mişellə Münxen Təhlükəsizlik Konfransı çərçivəsində keçirdiyi görüşü məmnunluqla xatırlayıb və ölkəmizin Brüssel sülh gündəliyinə sadiq olduğunu vurğulayıb.
Toivo Klaar da öz növbəsində Münxendə Prezident İlham Əliyevlə Avropa İttifaqı Şurasının Prezidentinin səmərəli görüşünü qeyd edib və Avropa İttifaqının da Azərbaycanla Ermənistan arasında münasibətlərin normallaşdırılması prosesinə bundan sonra da öz töhfəsini verəcəyini deyib.
Görüşlə bağlı yayılan məlumatda cənab İlham Əliyevlə Toivo Klaarın Azərbaycanla Ermənistan arasında sülh müqaviləsi üzrə danışıqlar prosesi barədə fikir mübadiləsi apardıqları qeyd olunur.
Avropa İttifaqı son vaxtlar sülh gündəliyi prosesində aktivlik nümayiş etdirir. Eyni zamanda ABŞ Dövlət Departamentinin Cənubi Qafqaz danışıqları üzrə yeni baş məsləhətçisi Luis Bono da Azərbaycanda səfərdədir. Güman etmək olar ki, Aİ və ABŞ-ınxüsusi nümayəndələri ilə Bakıda aparılan danışıqların əsas mövzusu sülh müqaviləsinin mətni və ya Bakı ilə Qarabağ erməniləri arasında dialoqun mətni deyil, ilk növbədə qeyd olunan danışıqların aparılması şərtləri ilə bağlı olub. Martın 5-də Xankəndi–Xəlfəli–Turşsu yolunda baş verən hadisə nəticəsiz qala bilməz. Sözsüz ki, Aİ və ABŞ nümayəndələri bu barədə məlumatlandırılıblar.
Ermənistanla Azərbaycan arasında sülh müqaviləsi üzrə danışıqlara, eləcə də Bakı ilə Qarabağ erməniləri arasında dialoqa əsas maneə Ermənistan silahlı qüvvələrinin qalıqlarının Qarabağda olması və ümumiyyətlə, regionun hərbiləşdirilməsidir.
Ermənistan silahlı qüvvələrinin tör-töküntüləri Qarabağdan çıxarılmadan nə sülh müqaviləsi prosesi, nə də Bakı ilə Qarabağ erməniləri arasında dialoq nəticə verə bilməz. Bu proseslərin hər ikisi kövrəkdir və son iki ildə eskalasiyanın artan diplomatik fəallıqla necə növbələşdiyinə dair çoxlu nümunələr var.
Demək, danışıqların aparılması və nəticənin əldə olunması üçün nəzarət-buraxılış məntəqəsinin yaradılması və sərhədə tam nəzarəti Azərbaycanın öz üzərinə götürməsi zərurətə çevrilib. Bunsuz Ermənistanla danışıqların, Qarabağ erməniləri ilə dialoqun mənasının olmadığını hamı, elə Brüssel və Vaşinqton da yaxşı baş düşür.
Əgər Avropa İttifaqı və ABŞ regionda davamlı və möhkəm sülhün bərqərar olmasında maraqlıdırlarsa, ilk növbədə sülh danışıqlarının sağlam zəmin üzərində qurulmasına çalışmalıdırlar.
H.SƏXAVƏT,
“Xalq qəzeti”