Milli Məclisdə TÜRKPA-nın Ətraf mühit, təbii ehtiyatlar və sağlamlığın qorunması komissiyasının 8-ci iclası keçirilib. Milli Məclisin komitə sədri, TÜRKPA-nın Ətraf mühit, təbii ehtiyatlar və sağlamlığın qorunması komissiyasının sədri Əhliman Əmiraslanovun təklifi ilə qardaş Türkiyədə baş verən güclü zəlzələ səbəbindən dünyasını dəyişmiş insanların xatirəsi bir dəqiqəlik sükutla yad edilib. Sonra parlament sədrinin birinci müavini Əli Hüseynli TÜRKPA-nın ölkələrimiz arasında dostluğun və qardaşlığın dərinləşməsinə xidmət etdiyini deyərək, üzv qarşısında duran qanunvericiliklərin yaxınlaşdırılması, ətraf mühit və sağlamlığın qorunması kimi aktual məsələlərə toxunub, TÜRKPA-nın bugünkü komissiya iclasının ölkələrimiz arasında bu istiqamətdə əməkdaşlığa öz töhfəsini verəcəyinə inamını bildirib.
Komissiyanın sədri Ə.Əmiraslanov TÜRKPA-nın Ətraf mühit, təbii ehtiyatlar və sağlamlığın qorunması komissiyasının “TÜRKPA üzv dövlətlərində biomüxtəlifliyin qorunması” mövzusuna həsr edilmiş 8-ci iclasının mövzusu və iclasın gündəliyində yer alan “Reproduktiv sağlamlığın qorunması haqqında” model qanun layihəsi haqqında məlumat verib.
Komissiyanın sədr müavini Recep Şeker və TÜRKPA-nın baş katibi Mehmet Süreyya E iclasın mövzusu ilə bağlı fikirlərini bölüşüblər.
Təqdimatdan sonra AMEA-nın vitse-prezidenti, Azərbaycanın Molekulyar Biologiya və Biotexnologiyalar İnstitutunun baş direktoru İradə Hüseynova, Genetik Ehtiyatlar İnstitutunun baş direktoru Zeynal Əkpərov, Türkiyə Böyük Millət Məclisinin üzvü Ömer Fethi Gürer, Botanika İnstitutunun baş direktoru Səyyarə İbadullayeva, AMEA-nın Fiziologiya İnstitutunun direktoru Ulduz Həşimova, Qazaxıstan Respublikası Parlamenti Senatının üzvü Nurlan Bekenov, Qırğız Respublikası Joqorku Keneşinin üzvləri Tazabek İkramov və Marlen Mamataliyev məsələ ilə bağlı çıxışları dinlənildikdən sonra komissiyanın hesabat layihəsi təsdiq olunub və assambleyanın plenar iclasında məsələ üzrə məruzəçi TÜRKPA-nın Ətraf mühit, təbii ehtiyatlar və sağlamlığın qorunması komissiyasının sədr müavini Recep Şeker seçilib.
“TÜRKPA üzv dövlətlərində biomüxtəlifliyin qorunması”na dair komissiyanın tövsiyə qərarının layihəsini təqdimatından sonra Milli Məclis Aparatının Sosial qanunvericilik şöbəsinin müdiri Adil Vəliyev “Reproduktiv sağlamlığın qorunması haqqında” model qanun layihəsini təqdim edib.
Sonra parlamentarilər komissiyanın 9-cu iclasının mövzusunu müəyyən ediblər. Bildirilib ki, komissiyanın növbəti iclası Qazaxıstanda keçiriləcək.
Əliqismət BƏDƏLOV,
“Xalq qəzeti”