Azərbaycanın Qarabağ bölgəsində yaşayan erməni sakinlərilə təmaslar üzrə məsul şəxs Milli Məclisin deputatı Ramin Məmmədovun martın 1-də Rusiya sülhməramlı kontingentinin qərargahında ölkəmizin Qarabağ bölgəsində yaşayan erməni sakinlərin təmsilçiləri ilə keçirdiyi görüş onu göstərir ki, Azərbaycan tədricən öz istəklərinə nail olur.

Mövcud vəziyyət belədir ki, Azərbay­can Laçın yolunda nəzarəti gücləndirir. Aksiya başlanandan bəri yoldan ancaq humanitar təyinatlı maşınlar və məhsul­lar keçirilir. Azərbaycanın sivil siyasəti və ekofəalların etirazına tab gətirə bilməyən separatçı Ruben Vardanyan artıq oyun­caq postu – “dövlət naziri” vəzifəsi ilə vi­dalaşıb. Prosesə əngəl törədən qüvvələr müqavimətin mənasız olduğunu başa düşüblər. Azərbaycanın tələbləri masa üzərindədir, rəsmi Bakı öz məqsədlə­ri uğrunda inamla irəliləyir. Yox, əgər müqavimət davam edərsə, Azərbaycan adekvat tədbirlər görə bilər.

Etiraz edən Azərbaycan gənclərinin istəklərindən biri də Laçın yolunda nə­zarət-keçid məntəqəsinin yaradılmasıdır. 

Qeyd edək ki, Azərbaycanın Qara­bağ iqtisadi rayonunda faydalı qazıntı yataqlarının qanunsuz istismarına qarşı Laçın–Xankəndi yolunda keçirilən etiraz aksiyası 82 gündür davam edir. Təhlükə­sizlik qaydalarına yüksək səviyyədə əməl olunan aksiya yerində indiyədək heç bir insident baş verməyib. Onlar etirazlarını yüksək əhval-ruhiyyə ilə davam etdirirlər. Aksiya iştirakçılarının tələbləri ilk gündən dəyişməz olaraq qalır. Ekofəallar və gənc könüllülər dəyişməz şüarları ilə Azərbay­can cəmiyyətinin haqlı narazılığını dilə gətirir, ekoloji terrora son qoyulmasını, faydalı qazıntı yataqlarının qanunsuz is­tismarının dayandırılmasını tələb edirlər. Aksiya iştirakçılarının təhlükəsizliyini əra­ziyə cəlb edilmiş Azərbaycan Daxili İşlər Nazirliyinin Daxili Qoşunlarının hərbçiləri və polislər yüksək səviyyədə təmin edir­lər.

Rusiya sülhməramlılarına və Bey­nəlxalq Qırmızı Xaç Komitəsinə məx­sus avtomobillər hər zaman olduğu kimi dinc aksiya keçirilən ərazidən maneəsiz hərəkət edirlər. Dünən də digər günlərdə olduğu kimi, humanitar təyinatlı avtomo­billərin keçidinə şərait yaradılıb. Belə ki, 100-ə yaxın avtomobil aksiya ərazisin­dən maneəsiz keçib. Onların sırasın­da Rusiya sülhməramlılarına məxsus Xankəndidən Laçın istiqamətinə doğru hərəkət edən səkkiz yanacaqdaşıyan av­tomobil də olub.

Xatırladaq ki, dekabrın 12-dən eti­barən azərbaycanlı ekofəallar, ictimaiy­yət nümayəndələri sülhməramlıların pos­tu yaxınlığında etiraz aksiyası keçirirlər. Aksiyada etiraz edənlərin əsas tələbləri Rusiya sülhməramlılarının komandanı Andrey Volkovun gəlməsi, azərbaycan­lı mütəxəssislərin montorinq aparılması üçün lazımi şərait yaradılması, ermə­nilərin Azərbaycan torpaqlarında ekoloji terrora son qoyulması, Ermənistanla sər­həddə Laçın istiqamətində ayrıca sərhəd və gömrük nəzarəti postlarının təşkili, Azərbaycan ərazisinə qanunsuz silah daşınmasının qarşısının alınmasıdır.

Fərhad MEHDİYEV,
beynəlxalq hüquq üzrə ekspert:

Laçın yolu Azərbaycan ərazisidir. Bu, birmənalı şəkildə deməyə əsas verir ki, həmin yolla bağlı şərtləri Azərbaycan diktə etməlidir. Bu, son imzalanmış sənədlərdə də öz əksini tapıb. 

Aksiyanı qeyri-hökumət təşkilatları, könüllülər keçirirlər. Eti­razlar dinc vətəndaşlarımızın haqq səsinin dünya ictimaiyyətinə çatdı­rılmasıdır. Laçın yolu Azərbaycan ərazisinin tərkib hissəsi olduğundan vətəndaşlarımızın dinc etirazı onla­rın konstitusiyon hüququdur. Heç bir dövlət və təşkilat bu hüququ Azər­baycan vətəndaşlarının əlindən ala bilməz. Ekofəallar öz etirazlarında ta­mamilə haqlıdırlar. Onlar təbii sərvət­lərimizin talanmasına son qoyulma­sını, ekologiyanın çirkləndirilməsinin qarşısının alınmasını, monitorinqlərin keçirilməsini tələb edirlər. Yol açıqdır, humanitar təyinatlı yüklərin daşınma­sına mane yoxdur. 

Bu qənaətdəyəm ki, Laçın yolu üzərində Azərbaycanın nəzarət-bu­raxılış məntəqəsi mütləq qurulma­lıdır. 10 noyabr Bəyanatında Azər­baycan humanitar yüklərin təhlükəsiz şəkildə keçidinə dair öhdəlik götürüb. Buna zəmanətin səmərəliliyi sərhəd­də Azərbaycanın nəzarət-buraxılış məntəqəsi qurmasına əsas verir. 

Müharibədən əvvəl Qarabağda yaşamış ermənilərin orada Azər­baycan qanunları altında yaşamaq hüququ var. Azərbaycan hökuməti buna etiraz etmir.

Rizvan FİKRƏTOĞLU, “Xalq qəzeti”