Ulu öndər Heydər Əliyevin ordu, hərbçilər haqqında söylədiyi məşhur ifadələrindən biri belə idi ki, silahlı qüvvələrin vəzifəsi təkcə ölkə sərhədlərini, dövlətin maraqlarını qorumaqdan ibarət deyil. Ümummilli liderimiz əlavə edirdi ki, ordumuz həm də sadə bir vətəndaşın, əkin-biçinlə məşğul olan kəndlilərin, sərhəd bölgəsində yaşayan sakinlərimizin təhlükəsizliyini də təmin edir və edəcəkdir. 

Xatırladaq ki, 44 günlük İkinci Qara­bağ müharibəsinin nəticələrindən sonra Azərbaycan əsgərinin üzərinə düşən vəzifələr kifayət qədər artmışdır. Çünki Böyük Qayıdışın ilkin mərhələlərinin re­allaşdırılmasından ciddi şəkildə narahat olan, daha doğrusu, “ermənilik” xəstə­liyindən əziyyət çəkən İrəvan rəsmiləri Azərbaycanın ünvanına çoxsaylı təh­didlər səsləndiriblər. Son iki il yarımda şərti sərhədlərimizin qorunmasında işti­rak edən əsgərlərimiz də, dinc sakinlər də dəfələrlə silahlı təxribatlara məruz qalıblar. Bu faktı ona görə xatırladıram ki, “qarşı tərəf törətdiyi bütün təxribatla­ra görə layiqli cavabını almışdır” – ifa­dəsini də yada salım.

Təbii ki, düşmən bundan sonra daha kəsərli və konkret cavablar görə­cək. Çünki Azərbaycanın hərbi gücü nəinki ötən əsrin 90-cı illərindəki ordu­muzdan, hətta, 2020-ci ildə düşməni diz çökdürən silahlı qüvvələrimizdən də qat-qat artıqdır. Dövlət başçımız iyunun 23-də Müdafiə Nazirliyinin Ko­mando hərbi hissələrinin birində yara­dılan şəraitlə tanış olandan və hərbi hissəyə Döyüş Bayrağını təqdim edən­dən sonra əsgərlər qarşısındakı çıxı­şında dedi ki, bundan sonra da ordu­muzun daha da gücləndirilməsi üçün bütün lazımi tədbirlər görüləcək: “Azər­baycanın düşmənləri bunu bilir, görür, bilməlidir və görməlidir. Məhz buna görə bizə qarşı edilən istənilən təxri­bat cavabsız qalmır, hər bir təxribata layiqli cavab verilir, istər hərbi cavab, istər siyasi cavab. Bu gün Azərbaycan o ölkələrdəndir ki, öz müqəddəratını özü müəyyən edir, heç kimdən asılı deyil və olmayacaq, öz sözünü açıq deyir və müstəqil siyasət aparır. Yəni, bizim ölkəmiz, sözün əsl mənasında, müstəqil ölkədir, çünki müstəqil siyasət aparmaq iqtidarındadır və bizə bu gücü verən, ilk növbədə, bizim hərbi poten­sialımızdır”.

Bu məqamda bir məsələni xüsusilə vurğulamaq istəyirik. Belə ki, ötən ilin dekabrından bəri dünyanın az qala bütün mətbuat vasitələrinin gündəliyin­dən düşməyən “Laçın yolu” problemini Azərbaycan dövləti məhz silahlı qüvvələrimizin gücü ilə həll etdi. Dövlət başçımız hərbçilər qarşısındakı son çıxışında xatırlatdı ki, Azərbaycan – Ermənistan şərti sərhəd istiqamətində baş vermiş hadisələr, ermənilərin ya­şadıqları Qarabağ bölgəmizdə hərbi əməliyyatlar və iki ay əvvəl Ermənistan – Azərbaycan sərhədində, Laçın is­tiqamətində sərhəd-buraxılış məntəqə­sinin yaradılması bizim çox güclü si­yasi iradəmizin göstəricisidir. Yəni, biz bütün addımlarımızı vahid proqram əsasında atmışıq: “Əgər son iki il yarım ərzində baş vermiş hadisələr təhlil olu­narsa, hər kəs görə bilər ki, hər bir ad­dımımızın arxasında güclü siyasi iradə dayanmışdır, güc dayanmışdır, məntiq dayanmışdır, beynəlxalq hüquq dayan­mışdır və hər növbəti addım əvvəlki addımın məntiqi davamı idi”.

Bu məqamda yada salınmalı fakt­lardan biri də Azərbaycanın beynəlxalq aləmdə nüfuzlu söz sahibi olmasıdır. Bədxahlarımız və düşmənlərimiz Pre­zident İlham Əliyevin siyasətçi rey­tinqini, diplomat nüfuzunu və Qoşul­mama Hərəkatının sədri olaraq çəkisini öz qarşılarında sipər kimi görürlər. Ha­mıya gün kimi aydındır ki, Ermənistan ordusu darmadağın ediləndən, İrəvan rəhbərliyi təslim aktına qol çəkəndən sonra da işğalçı dövlətə Avropadan, Amerikadan, Rusiyadan, İrandan çox­lu vədlər verildi və yardım adıyla si­lah-sursat göndərildi. 

Fransa Prezidenti Emmanuel Makron isə Ermənistanın maraqlarını müdafiə etmək üçün nəinki dövlət baş­çısına, hətta, sıravi siyasətçiyə də ya­raşmayan riyakarlıqlarla özünü rüsvay etdi. Ancaq onun nüfuzuna ən sarsıdıcı zərbəni fikrimcə, Azərbaycan Ordusu vurdu. Belə ki, bilavasitə Makronun təşəbbüsü ilə Ermənistana “təqaüdə çıxmış” fransız polislərdən ibarət “mü­şahidə missiyası” göndərilmişdi. Guya, həmin missiya gəlib Laçındakı sərhəd nəzarət buraxılış məntəqəsinin ləğvinə nail olacaqdı. Gəldilər, bir neçə təxri­batın plan-proqramını verdilər və hət­ta, erməniləri həmin məntəqəyə silahlı hücum etmələrinə də ruhlandırdılar. Nəticədə isə Azərbaycanın mövqeləri daha da möhkəmləndi və cavablarımız həmişəkindən kəsərli oldu. Çünki lide­rimiz iradəli, siyasətimiz qətiyyətli, or­dumuz qüdrətli, əsgərimiz peşəkardır. 

Xatırladaq ki, Prezident İlham Əli­yev bu il mayın 28-də Laçın şəhərinə qayıdan əhali ilə görüşdə, evlərin açar­larını onlara təqdim edəndən sonrakı çıxışında demişdi ki, İkinci Qarabağ müharibəsinin başa çatmasından sonra həm Azərbaycan – Ermənistan sərhədində, həm Rusiya sülhməramlı qüvvələrinin nəzarətində olan ərazilər­də, həm sərhəd-buraxılış məntəqəsini qoymaqla biz yeni reallıq yaratdıq və Ermənistanı məcbur etdik ki, dediyi­mizi onlar da təkrarlasın: “Mən bunu İkinci Qarabağ müharibəsi başa ça­tandan sonra demişdim, Azərbaycanla Ermənistan arasında sülh müqaviləsi o halda mümkündür ki, onlar deyəcəklər: Qarabağ Azərbaycandır! Onlar cəmi 3-4 il bundan əvvəl “Qarabağ Ermənis­tandır” deyirdilər və hesab edirdilər ki, bizim torpaqlarımızı əbədi işğal altında saxlaya bilərlər. Hesab edirdilər ki, biz azərbaycanlılar bu vəziyyətlə barışa­cağıq. Mən isə deyirdim ki, yox, barış­mayacağıq”. 

Bəli, Azərbaycan Ordusu ermə­nilərə də, onların havadarlarına da çox həqiqətləri qandırdı. Həyat bir daha onu göstərdi ki, Azərbaycan rəhbərli­yi nə deyirsə, onu da edir. May ayının ortalarında Ermənistan rəhbərliyi tərə­findən verilən açıqlama faktiki olaraq bizim dövlət başçımızın bir neçə il bundan əvvəl dediyi “Qarabağ Azər­baycandır!” sözlərimin təkrarı idi. Bu, təkcə siyasətimizin və diplomatiyamı­zın uğuru deyil, həm də Azərbaycan əsgərinin diktəsidir. 

O ki qaldı Ermənistan və İranın cid­di-cəhdlə mane olmağa çalışdığı Zən­gəzur dəhlizinə, birmənalı şəkildə deyə bilərik ki, həmin layihə məhz Azərbay­canın istədiyi şəkildə icra olunacaq. Çünki bu gün dünya ölkələri çox böyük iqtisadi problemlərlə üz-üzədir. Hamı bu sınaqlardan çıxış yolunun axtarışın­dadır. Ən uğurlu yol isə bütün ölkələrin iqtisadi imkanlarının birləşdirilməsinə kömək edəcək nəqliyyat-logistika mərkəzlərinin yaradılmasıdır. Şanxay– London ticarət yolunu Orta dəhliz va­sitəsilə birləşdirən Zəngəzur dəhlizi də məhz həmin zərurətdən bütün güc mərkəzlərinin diqqət mərkəzindədir. Bu yolun açılmasını Vaşinqton da, Moskva da, Brüssel də, Pekin də – Tehran istisna olmaqla, hamı istəyir. Həmin layihədən ən çox bəhrələnənlərdən biri isə İrəvan ola bilər. Tehran İrəvanı bu möhtəşəm layihədən kənarda saxlayır. 

Bütün bunları nəzərə alan Azər­baycan Prezidenti deyir ki, Zəngəzur dəhlizi Ermənistan istəsə də, istəməsə də açılacaq. Daha maraqlı məqam isə odur ki, dövlət başçımız bu fikirləri səs­ləndirəndə əvvəlki illərdə baş vermiş faktları da yada salır: “Mən demişdim ki, bizə tarix versinlər torpaqlarımız­dan nə vaxt çıxır, o an biz dayanmağa hazırıq. Bu gün də eyni sözü deyirəm. Amma deyirəm ki, bizə tarix versinlər, Zəngəzur dəhlizi nə vaxt açılacaq və belə olan halda, heç bir problem olma­yacaq. Ona görə hesab edirəm ki, həm Ermənistan rəhbərliyi, həm Ermənis­tan ictimaiyyəti, əhalisi bunu başa düş­məlidir. Biz istədiyimizə nail olmuşuq, oluruq və olacağıq. Yaxşı olar ki, bu məsələ konstruktiv şəkildə danışıqlar yolu ilə, qarşılıqlı anlaşma yolu ilə həll olunsun”.

Yolun açıq olsun, Azərbaycan Or­dusu! Bayrağımızı ölkənin hər yerində ucaldan Azərbaycan əsgəri, sənin bü­tün dünyanın diqqət mərkəzində olan Zəngəzur dəhlizinə nəzarət etdiyin günləri də gözləyirik! 

İttifaq MİRZƏBƏYLİ, “Xalq qəzeti”