Dekabrın 25-də Milli Kitabxanada Azərbaycan ədəbiyyatının görkəmli nümayəndəsi, Xalq yazıçısı, tanınmış ictimai xadim Yusif Səmədoğlunun (Yusif Səməd oğlu Vəkilovun) anadan olmasın 90 illik yubileyi münasibətilə  “Xalq yazıçısı Yusif Səmədoğlu – 90” adlı virtual və eyniadlı ənənəvi kitab sərgisi istifadəçilərə təqdim olunub.

Virtual sərgidə rəsmi sənədlər, fotolar, yazıçının əsərləri, ön söz yazdığı və redaktor olduğu kitablar, həyat və yaradıcılığı haqqında ədəbiyyatlar, dövri mətbuatda çap olunan məqalələr nümayiş olunur.

Virtual sərgi ilə tanış olmaq istəyənlər https://anl.az/el/vsb/Yusif_Semedoglu/index.htm   linkindən istifadə edə bilərlər. 

Ənənəvi sərgidə 60-cı illərin ədəbi mühitinin yetişdirməsi Xalq yazıçısı Yusif Səmədoğlunun romanları, hekayələri, ədəbi irsi barədə maraqlı fikirlər, xatirələr, ön söz yazdığı və redaktor olduğu kitablar, həyatı və bədii yaradıcılığı, Səməd Vurğun və Səmədoğlular və s. haqqında monoqrafiyalar, Azərbaycan və xarıcıı dillərdə ədəbiyyatlar, dövri mətbuat materialları nümayiş olunur.

XX əsr Azərbaycan ədəbiyyatı tarixində özünəməxsus yer tutan, həyata, gerçəkliyə fərqli münasibəti, dünyagörüşü ilə seçilən Xalq yazıçısı Yusif Səməd oğlu Vəkilov 1935-ci il dekabrın 25-də Bakı şəhərində, məşhur Azərbaycan şairi Səməd Vurğunun ailəsində anadan olub.

Xalq yazıçısı Yusif Səmədoğlu XX əsr Azərbaycan nəsrinin yetirdiyi nadir istedada malik böyük simalardandır. Yüksək bədiilik nümunəsi olan dərin ictimai-mənəvi məzmunlu əsərləri, o cümlədən hekayələri, romanları və film ssenariləri ilə ədəbi prosesdə iz qoymuş yazıçının ötən əsrin 60–70-ci illərində milli nəsrin keyfiyyətcə yeni mərhələyə keçməsində xüsusi xidmətləri var.

Xalq yazıçısı Yusif Səmədoğlunun Azərbaycan nəsrinin inkişafında səmərəli xidmətləri qiymətləndirilib. O, Azərbaycan ədəbiyyatınin inkişafında böyük xidmətlərinə görə 1995-ci ildə Azərbaycan Respublikasının ali mükafatı - “Şöhrət” ordeninə layiq görülüb, 1998 – ci ildə "Xalq yazıçısı" fəxri adı ilə təltif olunub.

Xalq yazıçısı Yusif Səmədoğlunun 90 illiyinin qeyd edilməsi haqqında Prezident İlham Əliyevin 4 sentyabr 2025-ci il tarixli sərəncamı dəyərli ziyalımıza dövlət səviyyəsində göstərilən ehtiramın nümunəsidir.