Türkiyə Cümhuriyyətinin Afyon Kocatəpə Universitetinin rektoru, professor Mehmet Karakaşın rəhbər­lik etdiyi nümayəndə heyəti Lənkəran Dövlət Universitetində (LDU) qonaq olub. 

LDU-nun rektoru, professor Natiq İbrahimov görüş zamanı türkiyəli həm­karlarına rəhbərlik etdiyi ali təhsil oca­ğında son illərin yenilikləri, genişlənən beynəlxalq əlaqələr barədə ətraflı məlumat verib. Tərəflər müasir dünyada ali təhsilin məqsəd və vəzifələri, problemləri, pers­pektivləri, qarşıda duran vəzifələr barədə geniş fikir mübadiləsi ediblər. 

Lənkəran Dövlət Universiteti ilə Afyon Kocatəpə Universiteti arasında İkili əmək­daşlıq və “Erasmus+” müqaviləsi imzala­nıb. Müqavilələrdə qarşılıqlı əlaqələrin gücləndirilməsi, birgə elmi konfransların təşkili, tələbə-müəllim mübadiləsi, ikili diplom layihəsinin həyata keçirilməsi üçün müvafiq işlərin görülməsi, “Erasmus+” proqramı çərçivəsində tələbə-müəllim heyətinin hərəkətliliyinin artırılması və s. məsələlər əksini tapıb.

Türkiyəli qonaqlar universitetin təd­ris korpusları, laboratoriyaları, Turizm tədris bazası, fənn kabinələri, tələbə ya­taqxanalarına baş çəkiblər. LDU ilə ta­nışlıq türkiyəli qonaqlarda xoş təəssürat yaradıb.

Xatırladaq ki, LDU-nun Beynəlxalq şöbəsi Dil Mərkəzinin rəhbəri Ülviyyə Mirzəyeva ötən ay Afyon Kocatəpə Uni­versitetində keçirilən 10-cu Beynəlxalq Həftə Təlimi üçün Kadrlar Mübadiləsində iştirak edib və təmsilçisi olduğu ali təh­sil ocağı haqqında təqdimatla çıxış edib. Həmçinin, layihə çərçivəsində bağlanmış müqavilə əsasında LDU-nun baytarlıq tə­babəti ixtisasının 4-cü kurs tələbələrinin bir qrupu yaz semesterində Afyon Ko­catəpə Universitetində təhsillərini davam etdiriblər.

Ə.ƏLİYEV
XQ