Mədəniyyət Nazirliyinin təşkilatçılığı ilə 23-26 aprel tarixlərində Azərbaycanda ilk dəfə keçirilən Qırğız Mədəniyyəti Günləri sona çatdı.
Aprelin 26-da Azərbaycan Dövlət Akademik Musiqili Teatrında Qırğız Mədəniyyəti Günlərinin təntənəli bağlanış mərasimi keçirildi.
Tədbirdə mədəniyyət naziri Adil Kərimli, Qırğızıstanın mədəniyyət, informasiya, idman və gənclər siyasəti naziri Altınbek Maksutov, iki ölkənin mədəniyyət və incəsənət xadimləri, ictimaiyyət nümayəndələri və digər qonaqlar iştirak etdilər.

Əvvəlcə qonaqlar Akademik Musiqili Teatrın foyesində təqdim edilən Qırğızıstanın dekorativ-tətbiqi və təsviri sənət ustalarının əsərlərindən ibarət sərgi, geyim kolleksiyası və milli mətbəx nümunələri ilə tanış oldular.

Qırğızıstanın mədəniyyət, informasiya, idman və gənclər siyasəti naziri Altınbek Maksutov çıxış edərək dedi ki, Azərbaycan və qırğız xalqlarının dostluq və qardaşlığının əsasında həm də mədəni münasibətlər, ümumi dəyərlər dayanır: “Biz əminik ki, mədəni əməkdaşlığımız daha da genişlənəcək. Qırğız xalqı Azərbaycanın Nizami Gəncəvi, Üzeyir Hacıbəyli, Qara Qarayev, Rəşid Behbudov, Müslüm Maqomayev, Polad Bülbüloğlu və başqa ədəbiyyat və mədəniyyət xadimlərinə çox böyük hörmət bəsləyir. Xalqlarımızı daha yaxınlaşdıracaq, mədəni əməkdaşlığımızı dərinləşdirəcək yeni layihələr həyata keçirəcəyik”.

Altınbek Maksutov çıxışının sonunda qırğız nümayəndə heyətinə göstərilən qonaqpərvərliyə və mədəniyyət günlərinin səviyyədə təşkilinə görə Mədəniyyət Nazirliyinə təşəkkür edib. O həmçinin ölkəmizin incəsənət ustalarını Qırğızıstanda keçiriləcək Azərbaycan Mədəniyyəti Günlərində görmək istədiyini də dilə gətirdi.

Altınbek Maksutov Azərbaycan Dövlət Tərcümə Mərkəzi Dünya ədəbiyyatı şöbəsinin müdiri, yazıçı, kinossenarist, tərcüməçi Nəriman Əbdülrəhmanlıya Qırğızıstanın “Mədəniyyət əlaçısı” döş nişanını təqdim etdi. Yazıçı Qırğız Respublikasının mədəniyyət və incəsənətinin inkişafına verdiyi töhfəyə görə bu təltifə layiq görüldü.

Daha sonra qardaş ölkənin incəsənət ustalarının ifasında qala-konsert təqdim olundu.

Konsertdə Qırğızıstanın Xalq artisti Azamat Bolqonbayev, Əməkdar artistlər “Manas”çı Samat Koçorbayev, Elnurə Muktarbekqızı, Gülzinət Surançiyeva, həmçinin Abdılas Maldıbayev adına Qırğızıstan Milli Akademik Opera və Balet Teatrının artistləri Atabek Sadırkulov və Dayana Kıdırəliyeva, “Muras” Folklor-Etnoqrafik Ansamblı, Nurdin Tuqolov adına “Ak-Maral” Dövlət Rəqs Ansamblı, Toktoqul Satılqanov adına Qırğızıstan Milli Filarmoniyasının adına Estrada-Simfonik Orkestri və başqa ifaçılar çıxış etdilər.

Proqramda “Vətən” (söz – Şailoobek Duyşeyev, musiqi – Muratbek Beqaliyev), “Səhər sirri” (Əsgər İsayev, Sərdarbek Juməliyev), “Səhər bülbülü” (Turar Kojomberdiyev, Nəsır Davlesova), “Sevgilim” (söz və musiqi – Jamin Akimaliyeva), “Aseldeyim” (söz və musiqi – Bek Borbiev) və digər mahnılar ifa olundu.

Qırğızıstan ifaçılarının təqdim etdiyi musiqi və rəqs nömrələri alqışlarla qarşılandı.

Qonaq ifaçıların Azərbaycan musiqisinə müraciəti isə xüsusi rəğbət doğurdu “Səndən nigaranam” və “Azərbaycan” mahnıları qonaqlara xüsusi zövq yaşatdı. Bununla da, Bakıda qırğız mədəniyyəti və incəsənəti şöləsi tarixə qovuşdu.

F.SALMANOVA

E.AĞALAR(foto)

XQ