Azərbaycan Yazıçılar Birliyində (AYB) “Ul­duz” jurnalının "Yeni nəsil: proza", "Yeni nəsil: poeziya" və "Yeni nəsil: tənqid" buraxılışlarının təqdimat mərasimi keçirilib. 

Jurnalın baş redakto­ru Əməkdar jurnalist Qulu Ağsəs Cəfər Cabbarlı adı­na Respublika Gənclər Kitabxanası ilə birgə real­laşdırılan layihəyə əmək sərf etmiş gənc redaktorları təq­dim edərək deyib ki, onların ciddi səyi ilə 35 yaşına qə­dər istedadlı gənclərin yara­dıcılığı jurnalın xüsusi nöm­rələrində bir araya gətirilib. 

AYB-nin sədri Xalq yazıçısı Anar gənc ədəbi redaktorlara belə münbit şərait yaradılmasını yüksək dəyərləndirib, buraxılışların önəmini açıqlayıb və hər üç nömrədə sanballı yazıların yer aldığını söyləyib. AYB-nin sədr müavini, “525-ci qəzet”in baş redaktoru Rə­şad Məcid deyib ki, ədə­bi-bədii orqanların müxtəlif nömrələrinin hazırlanması­nın gənc redaktorlara həvalə edilməsi təcrübəsi əvvəllər də olub və bu, özünü doğrul­dan yanaşmadır.

“Yeni nəsil: proza” bu­raxılışının redaktoru Furqan 35 yaşa qədər nasirlərin təxminən 20 hekayəsinin jurnalda işıq üzü gördüyünü bildirib və həmin bədii nü­munələlərin zaman keçdikcə öz aktuallığını itirməyəcə­yinə inam ifadə edib. “Yeni nəsil: tənqid” buraxılışının redaktoru, fəlsəfə doktoru Elnarə Qaragözova xüsusi nömrə üçün yazıların seçi­mində maksimum obyektiv­liklə ən dəyərli təhlillərə üs­tünlük verildiyini qeyd edib. Nəticədə ədəbi ictimaiyyətə dərin elmi məzmunlu yazılar təqdim olunub. “Yeni nəsil: poeziya” buraxılışını ərsəyə gətirmiş gənc redaktor Ra­mil Əhməd isə buraxılış­larda nəsr, nəzm və tənqidi materialların ayrı-ayrılıqda yer aldığına diqqəti cəlb edib. O, poeziya buraxılışı­nın “Ulduz”un 650-ci sayına təsadüf etdiyini vurğulayıb. Yazı müəlliflərindən olan fəlsəfə doktoru Nərgiz İsma­yılova gənclərə diqqətə görə minnətdarlığını bildirib.

Hər üç buraxılışın ümu­mi icmalını verən AMEA Ədəbiyyat İnstitutunun şöbə müdiri, filologiya elmləri doktoru Vaqif Yusifli la­yihə barədə özəl qeydləri­ni diqqətə çatdırıb. Dünya Gənc Türk Yazarlar Birliyi İdarə Heyətinin sədri İn­tiqam Yaşar bu qurumun 25 illiyi ilə əlaqədar belə bir buraxılışın hazırlanması ilə bağlı təklif irəli sürüb.

Sonda Qulu Ağsəs təq­dim olunan buraxılışların bir almanax şəklində nəşrə hazırlanacağını bildirib.

Rizvan FİKRƏTOĞLU
XQ