TÜRKSOY-un Türkmənistanın Anev şəhərinin 2024-cü il üçün “Türk dünyası mədəniyyət paytaxtı” elan edilməsi ilə əlaqədar açılış mərasimi keçirilib.
Xatırladaq ki, ötən il Azərbaycanın Şuşa şəhəri “Türk dünyası mədəniyyət paytaxtı” seçilmişdi. Dekabr ayında isə ilin bağlanış mərasimi çərçivəsində Şuşada Türk Dünyası Mədəniyyət Paytaxtları Birliyinin ilk təsis konfransı olub və paytaxtlıq estafeti Anev şəhərinə verilib.
Anevdə tədbirin açılışında Türkmənistanın Baş nazirinin müavini Mahricemal Mamedova Türkmənistan Prezidenti Sərdar Berdiməhəmmədovun tədbir iştirakçılarına ünvanladığı məktubunu oxuyub. Türk Mədəniyyəti və İrsi Fondunun prezidenti Aktotı Raimkulova iştirak etdiyi mərasimdə daha sonra TÜRKSOY-un Baş katibi Sultan Raev nitq söyləyərək, Anev şəhərinin və bu torpaqların türkmən xalqının müqəddəs vətəni, böyük türkmən tarixinin və bənzərsiz mədəni irsinin mərkəzi olduğunu vurğulayıb. O bildirib ki, bu il TÜRKSOY tərəfindən yaranmasının 300 illiyi münasibətilə Türk dünyasında milli türkmən ədəbiyyatının klassiki, böyük şair Məhdimqulu Fəraqi ili elan olunub.
Daha sonra türk coğrafiyasından olan 9 ölkədən 650-dən çox sənətçi türk xalqlarının rəngarəng rəqslərini və musiqisini ifa ediblər.
Ə.DOSTƏLİ
XQ