Cəlil Məmmədquluzadə adına Naxçıvan Ədəbiyyat Muzeyində muxtar respublikanın 100 illik yubileyinə həsr olunmuş “Muxtariyyət dövründə Naxçıvan ədəbi mühiti” mövzusunda toplantı keçirilib.
Məclisi giriş sözü ilə açan muzeyin direktoru Aləmzər İbrahimova bildirib ki, Naxçıvan Azərbaycanın çoxəsrlik keçmişində layiqli yer tutub, xalqımızın ictimai-siyasi və elmi-mədəni həyatında özünəməxsus rol oynayıb. Qədim türk yurdunun ədəbi-bədii irsi və söz yaradıcılığı ənənələri milli ədəbiyyatımıza mövzu əlvanlığı, ideya-məfkurə siqləti gətirib.
Naxçıvan ədəbi mühitinin ölkəmizin ədəbiyyatına parlaq ədəbi simalar, qiymətli əsərlər bəxş etdiyindən danışan Naxçıvan Muxtar Respublikası Yazıçılar Birliyinin sədri, Əməkdar mədəniyyət işçisi Asim Əliyev muxtariyyət dövründə diyarın qələm sahiblərinin yaradıcılığından ətraflı bəhs edib, ünlü sənətkarların həyat yolundan söz açıb.
Azərbaycan Yazıçılar Birliyinin üzvlərindən Elxan Yurdoğlu, Təranə Arifqızı, Kəmalə Nəsrin, Məftunə Nur, Əzizə Həsənova, Gulsadə İbrahimli Naxçıvan ədəbi mühitinin özünəməxsusluğunu qeyd ediblər, parlaq nümayəndələrini xatırlayıblar. Şairlər Səbinə Əlincəli, Alməmməd Eldaroğlu, Aytəkin Səfərəliyeva, Sevinc Səbzəliyeva Naxçıvana, onun insanlarına həsr edilmiş şeirlərini söyləyiblər.
Sonda iştirakçılar ədəbiyyat Muzeyini ziyarət edib, “Naxçıvan Muxtar Respublikası–100” sərgisi ilə tanış olublar.
XQ
