Qarabağ müharibəsini döyüşdə udduğumuz kimi, mədəniyyət, informasiya savaşında da bədxahlarımıza qarşı ciddi mübarizə aparmalıyıq ki, nailiyyətlərimizi mənimsəməsinlər. İndiyədək ağ ləkə kimi görünən belə boşluqlardan daha biri dolmaq üzrədir.
Bakı Xoreoqrafiya Akademiyasının müəllimi, Azərbaycan Respublikasının Əməkdar artisti Eteri Cəfərova neçə vaxtdır ki, Moskva Dövlət Xoreoqrafiya Akademiyasında staj keçir və 250 illik tarixə malik bu sənət ocağında tələbələrə Azərbaycan milli rəqslərini öyrədir. Eteri xanımın Moskva dövrü yaradıcılığına keçməzdən onu oxucularımıza tanıdaq:
1996-cı ildə Bakı Xoreoqrafiya Məktəbini ansambl artisti ixtisası üzrə bitirib və Filarmoniyanın Dövlət Rəqs Ansamblında əmək fəaliyyətinə başlayıb. Eyni zamanda Azərbaycan Dövlət Mədəniyyət və İncəsənət Universitetinin mədəni maarif fakültəsində təhsil alıb, magistratura pilləsini də fərqləmə diplomu ilə bitirib. 2018-ci ildə Moskva Dövlət Mədəniyyət institutunda müasir xoreoqrafiyanın ixtisasartırma kursunu keçib.
On ildir ki, Bakı Xoreoqrafiya Akademiyasının milli rəqslər kafedrasında müəllimdir. Hazırda baş müəllim və doktorantdır. E. Cəfərova 2007-ci ildə Əməkdar artist fəxri adına layiq görülüb. 2010–2015-ci illərdə Prezident mükafatçısı olub. 2019-ci ildə Milli rəqs sənətinə verdiyi töhfəyə görə “Humay” mükafatına layiq görülüb, 2021-ci ildə Beynəlxalq Xoreoqrafiya Akademiyasının “Fəxri akademik”i adına layiq görülüb.
Moskva Dövlət Xoreoqrafiya Akademiyasında assistent-stajor kimi oxuyub çalışan Eteri xanımın sayəsində hələ ötən tədris ilində xalq-səhnə rəqsləri kafedrasının müəllimi, baletmeyster, Rusiya Dövlət Akademik Böyük Teatrının balet truppasının repetitoru Anna Antropovanın sinfinin dövlət imtahanında Azərbaycan musiqisi səsləndirilib və Eteri xanımın quruluşunda bizim milli rəqslərimiz ifa olunub.
Cahangir Cahangirovun musiqisi əsasında “Süzən qızlar” rəqsi Eteri Cəfərovanın quruluşunda 3-cü əcnəbi kursun – Cənubi Koreya, İtaliya və Yaponiyadan olan tələbələrinin ifasında təqdim edilib. Üzeyir Hacıbəylinin “Koroğlu” operasından “Qızlar rəqsi”ndən bir fraqmenti (SSRİ Xalq artisti Qəmər Almaszadənin quruluşunda) isə yapon tələbə qız ifa edib.
Eteri xanım həmin çıxışları xatırlayarkən belə deyir:
– Əcnəbi tələbələr solo çıxışları zamanı mənim Bakıdan apardığım sarı rəngli səhnə libasımda səhnəyə çıxırdılar. Mən həmin libasda “Sarı gəlin”i rəqs edirəm. Dövlət imtahanında çıxış edənlər əla qiymət alanda çox sevindik. Çünki bu akademiyada ən yüksək qiymət almaq çox çətindir. İmtahandan sonra qızlar onlara Azərbaycan rəqsi öyrətdiyim üçün mənə təşəkkür etdilər. Onların öz ölkələrinə qayıtdıqdan sonra müxtəlif səhnələrdə bizim rəqslərmizi oynayacaqlarını, Azərbaycan rəqs sənətinə məhəbbət yaradacaqlarını düşünmək xoşdur.
Eteri xanım Moskva akademiyasında 1-ci və 2-ci kurs tələbələri ilə də çalışır. Gənclər Azərbaycan rəqslərinə, eləcə də ornamental tikməli rəqs geyimlərinə heyranlıqlarını gizlətmirlər. Hətta bizim səhnə geyimlərimizin muzey eksponatı olduğunu zənn edirlər.
– Eteri xanım, bəs, bu vaxta kimi Moskvada Azərbaycan milli rəqslərindən niyə xəbərsiz olublar?
– Uzun illər öncə balet artisti, pedaqoq, xalq-səhnə rəqsləri üzrə tədqiqatçı Tamara Tkaçenkonun “Xalq rəqsləri” (1967) kitabında dünya rəqsləri içində Azərbaycan rəqsləri barədə də yazılıb. O zaman bizim rəqslərə aid bölmənin yazılmasında müəllifə SSRİ Xalq artisti, mərhum Qəmər Almaszadə kömək etmişdi. O ki qaldı sizin soruşduğunuz məsələyə, biz öz proqramlarımızı Moskva, Peterburq xoreoqrafiya məktəblərinin tədris proqramları əsasında qururuq. Şəxsən mənə həmişə toxunurdu ki, niyə həmin proqramlara Pamir xalq rəqsinədək ən müxtəlif xalq rəqsləri salınır, amma Azərbaycan xalq rəqsləri yox?
– Niyə?
– Məsələ ondadır ki, bu akademiyada uzun illər kafedra müdirləri, bədii rəhbərlər bizim xəyanətkar qonşuların nümayəndələri olublar. Ona görə də Azərbaycan rəqslərinin Moskva Dövlət Xoreoqrafiya Akademiyasının tədris proqramına və səhnəsinə yolu bağlı olub. İnanırsınız, bu gün Akademiyada Azərbaycan rəqslərinə nə qədər böyük maraq var?! Hər müəllim məni öz qrupuna çəkir ki, onun tələbələri ilə məşğul olum, öyrədim. Bu akademiya Böyük Teatr üçün kadr hazırlayır. Mən də çalışıram ki, müraciət edənləri razı salım: kimin üçünsə konsertdə çıxışdan ötrü rəqs qururam, bir başqası müsabiqədə Azərbaycan rəqsi ilə çıxış etmək istəyir, hansısa tələbəyə hazır, qurulmuş rəqsimizi öyrədirəm, kim isə etüd ilə kifayətlənir.
– Siz özünüz də nələrisə öyrənirsiniz?
– Əlbəttə! Moskva akademiyasının çox təməlli tədris ənənələri var, mən həm də assistent kimi biliyimi artırıram. Necə deyərlər, həm öyrədirəm, həm də öyrənirəm.
– Eteri xanım, sizə Moskvada həmişəlik qalmaq və Azərbaycan rəqs sənətini tədris etmək təklif olunubmu?
– Bəli, belə bir təklif var. Hətta vətəndaşlığımı dəyişib həmişəlik Moskvada qalmağı da təklif edirlər. Mən isə qərarımda qətiyəm: assistenturanı bitirən kimi Vətənə qayıdacağam.
Gülcahan MİRMƏMMƏD