Fikrət Əmirov adına Gəncə Dövlət Filarmoniyasında ilk dəfə "Muğam gecələri" layihəsi çərçivəsində Xalq artisti, “Şöhrət” və “Şərəf” ordenli Mənsum İbrahimovun rəhbərliyi ilə “Qarabağ” muğam qrupunun konserti uğurla keçib.
Qədim Nizami yurdu tarixən sözə, sənətə bağlı diyardır və Azərbaycanın mədəni həyatında hər zaman xüsusi rol oynayıb. Burada muğam Şərq poeziyasının daimi yol yoldaşı olub. Gəncə bir çox milli musiqi xadimi yetişdirib. Təkcə Fikrət Əmirovun adını çəkmək kifayətdir ki, bu barədə təsəvvürlər daha da zənginləşsin.
Xatırladaq ki, vaxtilə tanınmış muğam ustası, Xalq artisti Arif Babayev və Nəzakət Teymurova UNESCO-nun dəstəyi ilə Gəncədə 3 gün muğamsevərlər qarşısında çıxış etdikdən sonra şəhərin bir neçə musiqi məktəbində açıq dərslər keçiblər.
Cəncəlilər fitri istedad sahibi Mənsum İbrahimovun rəhbərliyi ilə “Qarabağ” muğam qrupunun konsertini böyük coşqu ilə qarşılayıblar. Mənsum İbrahimovun Xalq artisti tarzən Elçin Həşimovun, Əməkdər artistlər kamança ifaçısı Elnur Əhmədovun və nağara ifaçısı Kamran Kərimovun müşayiəti ilə təqdim etdiyi Azərbaycan muğamları, xalq mahnıları sənətsevərlərdə böyük heyranlıq doğurub. Görkəmli sənətkarın torpaqlarımızın müstəqilliyi uğrunda canını, qanını əsirgəməyən şəhid və qazilərimizə həsr etdiyi "Zəfər" mahnısını tamaşaçılar ayaq üstə alqışlayıblar.
Konsert proqramında Xalq artistinin yetirmələri Sədəf Budaqova və Gülzar Fərəcova da çıxış ediblər.
XQ