Özbəkistandakı Heydər Əliyev adına Azərbaycan Mədəniyyət Mərkəzi Nizami Gəncəvi adına Daşkənd Dövlət Pedaqoji Universiteti ilə birgə “Nizami Gəncəvi yaradıcılığında türkçülük məfkurəsi” adlı beynəlxalq elmi konfrans keçirib.
Məclisdə Azərbaycan, Türkiyə və Özbəkistanın nizamişünas alimləri, ölkə ali məktəblərinin professor-müəllim heyəti, tədqiqatçılar, Nizami Gəncəvinin yaradıcılığı ilə maraqlanan müəllim və tələbələr iştirak ediblər. Çıxış edənlər Nizami Gəncəvi irsinin tədqiqi və təbliği istiqamətində bir sıra maraqlı təklif irəli sürüblər.
Konfransda AMM nəzdində Nizami Gəncəvi irsinin dünyada tanıdılması, təd-qiqi və bu istiqamətdə təbliğat işlərinin həyata keçirilməsi məqsədilə Türk dünyası nizamişünas alimlərindən ibarət Beynəlxalq Nizami Gəncəvi Elmi-Tədqiqat Cəmiyyəti (ETC) təsis edilib, qurumun fəaliyyət strategiyası qəbul olunub. Cəmiyyətin Azərbaycan, Özbəkistan, Türkiyə elm xadimləri və alimlərindən ibarət idarə heyəti yaradılıb. DDÖDƏU-nun professoru Nurbay Cabbarov cəmiyyətin sədri, AMEA-nın Gəncə Bölməsi Nizami Gəncəvi Mərkəzinin direktoru, filologiya üzrə fəlsəfə doktoru Əlimuxtar Muxtarov icraçı katib seçiliblər.
***
Özbəkistandakı Heydər Əliyev adına Azərbaycan Mədəniyyət Mərkəzinin direktoru Samir Abbasov “Özbəkistan–Azərbaycan” Dostluq Cəmiyyətinin (AÖDC) icrası direktoru Erkin Nuriddinovla görüşüb.
Söhbət zamanı Azərbaycanla Özbəkistan arasında mədəni əlaqələrin daha da möhkəmləndirilməsinə dair 2024-cü il üzrə görüləcək işlər müzakirə olunub. Görüşdə ikitərəfli əməkdaşlığın genişləndirilməsi, bu il AÖDC nümayəndə heyətinin Azərbaycana səfəri, universitetlərimiz arasında əməkdaşlığın genişləndirilməsi, Azərbaycan Dövlət Pedaqoji Universiteti və Gəncə Dövlət Universiteti ilə birgə layihələrin reallaşdırılması, bu ildən başlayaraq, Nizami Gəncəvi adına Daşkənd Dövlət Pedaqoji Universitetində Azərbaycan dili və ədəbiyyatı fənninin tədrisi, bu məqsədlə Azərbaycandan müvafiq pedaqoqların dəvət olunması, qarşılıqlı mühazirələrin keçirilməsi məsələləri diqqət mərkəzində olub.
Özbəkistanda bu il dövlət səviyyəsində keçiriləcək Azərbaycan mədəniyyət günlərinə dair təşkilati işlərin həlli, bu ölkədə Nizami Gəncəvi, Məhəmməd Füzuli və Maqsud Şeyxzadə irsinin təbliği, onların əsərlərinin tərcümə və nəşr layihələrinin reallaşdırılması barədə fikir mübadiləsi aparılıb, bu tədbirlərin həyata keçirilməsi məsələləri razılaşdırılıb.
***
Özbəkistanın kinematoqrafiya sahəsinin rəhbərləri və əməkdaşlarına-rejissor, operator və aktyorlara ölkənin yüksək mükafatları təqdim edilib. Kinematoqrafiya Agentliyinin (KA) “Kinematoqrafiya fədəkarı” medalı ilə təltif olunanlar arasında Özbəkistan Milli Televiziya və Radio Şirkətinin rejissoru, tanınmış kinorejissor, soydaşımız Eldar Məmmədov da var.
Təntənəli yığıncaqda medalı Eldar Məmmədova KA-nin direktoru Firdavs Abduxalikov təqdim edib. Bildirilib ki, Eldar Məmmədov 2023-cü ildə 7 sənədli film çəkib və 12 televiziya verilişi hazırlayib. Ötən il rejissor Azərbaycanda yaradıcılıq səfərində olub. Füzuli şəhərində Özbəkistan Prezidenti Şavkat Mirziyoyevin təşəbbüsü ilə inşa olunan 960 nəfərlik məktəb binasının tikintisi haqqinda “Dostluq rəmzi” adli sənədli film çəkib. O, eyni zamanda, “Azad Şuşa” sənədli filmini ərsəyə gətirib. Eldar Məmmədov 177 sənədli, 30 bədii film və 200-dən çox televiziya verilişi hazırlayıb. Eldar Məmmədov 2022-ci ildə isə Özbəkistanın “Dostluq” ordeninə layiq görülüb.
Qulu KƏNGƏRLİ,
XQ-nin xüsusi müxbiri
Daşkənd
.jpeg)
