Ötən həftə ölkəmizdə keçirilən I Beynəlxalq TÜRKSOY Teatr Festivalının Azərbaycan Dövlət Akademik Musiqili Teatrında bağlanış və mükafatlandırma mərasimi keçirildi.
Festivala yekun vuran TÜRKSOY-un baş katibi Sultan Raev yüksək qonaqpərvərlik və təşkilatçılığa görə Azərbaycan Mədəniyyət Nazirliyinə təşəkkürünü bildirdi. Baş katib Azərbaycanı və paytaxt Bakını Türk dünyasının böyük mədəniyyət mərkəzlərindən biri kimi səciyyələndirdi, bu il “Türk dünyasının mədəniyyət paytaxtı” missiyasını yerinə yetirən Şuşanın qardaşlıq, dostluq və mənəviyyat şəhəri olduğunu söylədi.
Türk dünyasının çətin dönəmlərdə daim Azərbaycanın arxasında olduğunu deyən Sultan Raev ölkəmizin ərazi bütövlüyünü və suverenliyini bərpa etməklə güc və qüdrətini dünyaya nümayiş etdirdiyini vurğuladı.
İlk festivalın uğurla reallaşdığını bildirən baş katib növbəti teatr şöləninin gələn il Türkmənistanın Aşqabad şəhərində keçiriləcəyini diqqətə çatdırdı.
Sonra türk respublikalarının aparıcı teatr kollektivlərini bir araya toplayan festivalın qalib tamaşaları elan olundu. Türk dünyasının teatr mütəxəssislərindən ibarət münsiflər heyətinin rəyinə əsasən, “Ən yaxşı musiqi tərtibatına görə” İstanbul Dövlət Teatrı “Bir nəfəs Dədə Qorqud” tamaşası ilə qalib elan olundu. Kasımalı Jantoşev adına İssıkgöl Musiqili Dram Teatrının (Qırğızıstan) “Günəşə toxunan uşaq” və Səmərqənd Musiqili Dram Teatrının (Özbəkistan) “Leyli və Məcnun” tamaşaları “Ən yaxşı tamaşa” nominasiyası üzrə mükafata layiq görüldülər.
Tamaşanın ən yaxşı plastik həllinə görə Türküstan Musiqili Dram Teatrı (Qazaxıstan) “Qorqud əfsanəsi” səhnə əsəri mükafat aldı. Müsabiqənin “Ən yaxşı ak-trisa” mükafatı iki sənətçiyə – Azərbaycan Dövlət Akademik Milli Dram Teatrından Məsmə Aslanqızına (“Qarabağnamə”) və Məhdimqulu adına Türkmənistan Dövlət Musiqili Dram Teatrından Gülnabat Abdullayevaya təqdim edildi.
Festivalın müsabiqədənkənar tamaşa nümayişlərinə görə isə Azərbaycan Dövlət Akademik Musiqili və Dövlət Pantomima teatrları fəxri diplomlarla təltif olundular.
Q.RAMİLƏ
XQ
