Nəşriyyat, yazar və oxucu üçbucağında təmaslar 

Mədəniyyət Nazirliyi, Azərbaycan Nəşriyyatları Assosiasiyası (ANAİB), Sumqa­yıt Şəhər İcra Hakimiyyəti və Abşeron-Xızı Regional Təhsil İdarəsinin birgə təşkilatçılığı ilə III Sumqayıt Kitab Sərgisi başlanıb. 

Ölkənin 30-dək nəşriyyatının iştirakı ilə təşkil olunan sərgi Kimyaçı Mədəniy­yət Sarayında keçirilir. Biz də sərgiyə gedənlərə qoşulub, saraya daxil oluruq. Ayrı-ayrı stendlərə düzülmüş çeşidli ki­tablar elə ilk baxışdan müasir poliqrafik dizaynı və mövzu rəngarəngliyi ilə seçi­lir. Kitabsevərlərin çoxluğu da diqqətdən yayınmır.

İlk müsahibimiz “Qədim qala” nəşriyyatının direktoru Şöhlət İxti­yaroğludur. O, həvəslə sərgi barədə fikirlərini bildirir: 

– Bizim də üzvü olduğumuz Azər­baycan Nəşriyyatları Assosiasiyası ya­randığı qısa vaxtda 14 belə sərgi təşkil edib. Başlıca məqsəd yeni formatlarda kitab təbliğatını reallaşdırmaq, nəşrlərin hər bir oxucu üçün əlçatanlığını təmin etməkdir. Buna görə də satışdakı ki­tablara müxtəlif faizli endirimlər tətbiq edilir. Bir neçə ay əvvəl gənc oxucular arasında ilk dəfə təşkil etdiyimiz Yay oxu marafonuna 3 min nəfər qoşulub. Həmin layihənin qaliblərini bu gün mü­kafatlandıracağıq ki, müəyyən motiva­siya olsun. Eyni zamanda Payız oxu marafonuna bu sərgidə start veriləcək.

– Bugünkü sərgidə kitablara oxu­cu marağından razısınızmı?

– Sərgi yenicə açılsa da, alıcılar çoxdur. Yaşlı, orta və gənc nəsil oxu­cuların yeni nəşrlərə marağı fərəh do­ğurur. Bayaqdan fikir verirəm, heç kim buradan əliboş getmir.

Sərgi ilə tanışlığımızı davam etdiri­rik. Təşkilatçılardan öyrənirik ki, burada nəfis tərtibatlı yüzlərlə adda kitab 30–70 faiz endirimlə oxuculara təklif olunur. Satıcıların arasında tanınmış yazarlar, kitab müəllifləri də var. Qələm dostla­rımız Elxan Elatlı, Rövşən Abdullaoğ­lu, İlham Qəhrəman, Xan Rəsuloğlu və başqaları sərginin işində fəal iştirak edirlər. 

Azərbaycan Ədəbiyyatı Fondu­nun baş direktoru, yazıçı Varis bi­zimlə söhbətində belə tədbirlərin təqdirəlayiq olduğunu vurğulayır:

– Azərbaycanda kitaba, mütaliəyə marağın azaldığını söyləyənlər yanılır­lar. Baxın, sərgiyə kiçikdən-böyüyə nə qədər oxucu gəlib. Hamının marağına və zövqünə uyğun, özü də güzəştli qiy­mətlərlə hər cür kitab var.

“Göyərçin” jurnalının baş redak­toru, şair, filologiya elmləri doktoru Rafiq Yusifoğlu da söhbətə qoşulir:

– Kitab bayramında tanınmış ədib­lərin, mədəniyyət xadimlərinin iştirakı ilə təqdimatlar, imza saatları, konsert proqramları, şeir gecələri, ustad dərs­ləri, uşaqlar üçün nağıllar aləminə sə­yahətlər, debatlar və sair olacaq. Elə bu gün tədbirdə AYB Sumqayıt bölməsinin üzvləri oxucular qarşısında yaradıcılıq hesabatı verəcəklər. Bundan gözəl nə ola bilər?

Yenicə aldığı kitablarla “Körpü” nəşriyyatının stendi qarşısında rastı­mıza çıxan yazıçı Hümbət Həsənoğlu da ürək sözlərini bizimlə bölüşür: 

– Belə sərgilər naşir və yazarların oxucularla birbaşa ünsiyyəti, mədəni tələbatla bağlı sosial sifarişlərin öyrəni­lib reallaşdırılması baxımından önəmli­dir. Ötən il rəhbərlik etdiyim “Sumqayıt Dostlar Klubu” gənclər arasında ən çox kitab oxuyanların müsabiqəsini keçir­mişdi. Bayaq stendləri gəzərkən “Kitab kafesi”ndə çalışan bir qız mənə dedi ki, müəllim, sizin müsabiqənin qaliblə­rindənəm. Doğrusu, onun sözlərindən məmnun oldum. Deməli, seçimi düz etmişik. Arzu edirəm ki, həmin qız kimi kitabsevərlərimizin sayı daha da çox olsun. 

Çox keçmir ki, mədəniyyət sarayının 2-ci mərtəbəsində sərginin rəsmi açılış mərasimi başlanır. Dövlət himnimiz ifa olunur. Şəhidlərin xatirəsi 1 dəqiqəlik sükutla yad olunur. Sonra Azərbaycan Nəşriyyatları Assosiasiyasının sədri Şəmil Sadiq çıxış edərək belə satış-sər­gilərin kitab maarifçiliyinə dəstək məra­mı daşıdığını, Elm və Təhsil, Mədəniy­yət nazirliklərinin, müvafiq qurumların sərginin təşkilinə lazımi dəstək verdiklə­rini bildirir və hər kəsi kitab bayramında yaxından iştirak etməyə çağırır.

Daha sonra Abşeron–Xızı Regio­nal Mədəniyyət İdarəsinin rəisi Fərid Qurbanzadə, Sumqayıt Şəhər İcra Ha­kimiyyətinin nümayəndəsi Fərman Ka­zımov və başqaları sərgi barədə ürək sözlərini söyləyirlər. Əlvan musiqi proq­ramı təqdim olunur.

Sərgidə dərs vəsaitlərinə, bədii ədə­biyyata, sosioloji nəşrlərə maraq daha böyükdür. Sumqayıtdakı 3 nömrəli peşə liseyinin şagirdləri könüllülər qismində sərgiyə gələnlərə bələdçilik edirlər. 

Onu da deyək ki, kitab bayramı tək­cə nəşriyyatların məhsullarının satışı ilə məhdudlaşmır. Həvəskar ustaların düzəltdikləri bəzək əşyalarının, gənc rəssamların çəkdiyi tabloların nümayişi sərgiyə əlavə rəng qatır. 

Üç gün davam edəcək sərgidə as­sosiasiya rəhbərliyinin "STEAM əsaslı təhsil" mövzusunda çıxışı, dilçi alim Rafiq İsmayılov, şair-pedaqoq Zahid Xəlil və professor Qulu Məhərrəmlinin “Oxu bacarığı: dil bilgisi, yoxsa intel­lekt göstəricisi?” panelində iştirakları da nəzərdə tutulur. 

Əli NƏCƏFXANLI
XQ