Gənclik çağlarımızda onun kitablarının əl-əl gəzdiyini gözəl xatırlayıram. “Qış gecəsi”, “46 Bənövşə”, “Kəndimizdə bir gözəl var”, “Sevdasız aylar” kimi romanları xəyallarımızı göylərə qanadlandırırdı. Təxminən 45 il əvvəl Sumqayıtda keçirilən tədbirlərin birində Salam Qədirzadənin özü ilə görüşüb tanış olanda hədsiz dərəcədə sevindim. Birlikdə çəkildiyimiz şəkli də əziz xatirə kimi qoruyub saxlayıram. Onunla, həmçinin İshaq İbrahimov, Fikrət Qoca, Pənah Xəlilov, Vaqif İbrahim və başqaları ilə birlikdə çəkilən həmin şəkildə unudulmaz bir an əbədiləşib. 

İndi 100 yaşı tamam olan Salam Qədirzadə hələ uşaq yaşlarından ədə­biyyata böyük həvəs göstərib. Şeir və hekayələr yazıb, ədəbi dərnəklərə ge­dib. Orta məktəbdən sonra məhz bu sahədə təhsil almağı planlaşdırırdı. Lakin İkinci Dünya müharibəsi həmin arzuları ertələdi 18 yaşında könüllü şəkildə cəbhəyə yola düşdü. Dava­nın od-alovundan keçdi. Cəbhələrdə göstərdiyi şücaətə görə III dərəcəli Şöhrət ordeni, “İgidliyə görə” və sair medallarla təltif olundu. 

Müharibənin arzularını düz 5 il təxirə saldığı gənc Salam ordudan tərxis edil­dikdən sonra elə həmin səbəbdən tikin­tisi yarımçıq qalmış Sumqayıta gələrək fabrik-zavod təhsili məktəbində müdir müavini vəzifəsinə təyin edilib. 1948-ci ildə universitetinin filologiya fakültəsi­nin qiyabi şöbəsinə daxil olub və res­publika radiosunun yerli verilişləri üzrə məsul redaktoru vəzifəsində çalışıb. Daha sonra M.Qorki adına Dünya Ədə­biyyatı İnstitutuna təhsil almağa gön­dərilib. Moskvada tələbə ikən diplom işi olaraq yazdığı “Gənclik” povestini “Detgiz” nəşriyyatı ayrıca kitab şəklin­də nəşr edib. Qəlbi yaradıcılıq həvəsi ilə döyünən gənc Bakıya qayıdandan sonra Azərbaycan Yazıçılar İttifaqının orqanı olan “Azərbaycan” jurnalında çalışıb. Uzun illər “Kirpi” satirik jurnalın­da işləyib, beş il jurnalın baş redaktoru da olub. Onunla birlikdə işləmiş sumqa­yıtlı qələm dostum Zümrüd Baloğlano­va həmişə Salam Qədirzadənin yüksək insani keyfiyyətlərindən, yumşaq ürəkli, lakin prinsipial bir rəhbər olmasından ağızdolusu danışır. 

Salam Qədirzadə 35-dək kitabın müəllifidir. Oxucuların səbirsizliklə göz­lədiyi əsərləri ən yüksək tirajlarla nəşr olunub. O, dramaturq kimi də tamaşa­çıların rəğbətini qazanıb, pyesləri təkcə Azərbaycanda deyil, Ukrayna, Moldova və digər ölkələrdə səhnəyə qoyulub. “Hardasan, ay subaylıq?”, “Həmişəxa­nım”, “Gurultulu məhəbbət”, “Şirinbala bal yığır” kimi komediyaları indi də gün­dəmdədir.

Unudulmaz yazar yaradıcılıq baxı­mından çox dolgun, ömür baxımından isə cəmi 64 illik bir bir həyat yaşayıb. “Hər gün ömürdən gedir” adlı son ki­tabını görmək ona qismət olmasa da, inamla deyə bilərik ki, Salam Qədirza­də ömrünün hər gününün qədrini bilib, yaradıcılığının şəhdini, şirəsini kitab səhifələrinə sıxaraq oxucularına ərmə­ğan edib. 

Bu yazını hazırlayarkən övladları Ruslan və Leyla ilə zəngləşib danış­dıq, sevə-sevə andıq onu. Qeyd etməyi borc bilirəm ki, onlar Salam Qədirzadə­nin ədəbi irsini böyük məhəbbətlə qo­ruyurlar. 

Ə.NƏCƏFXANLI, “Xalq qəzeti”