Dünən Milli Məclisin Ailə, qadın və uşaq məsələləri və Hüquq siyasəti və dövlət quruculuğu komitələrinin “Sağlam ailə modeli və nikah hüququ” mövzusunda birgə ictimai dinləməsi keçirilib.
Müzakirəni giriş sözü ilə açan Ailə, qadın və uşaq məsələləri komitəsinin sədri Hicran Hüseynova erkən nikahların, qohum evliliklərinin hazırda aktual məsələlərdən olduğunu qeyd edib. Diqqətə çatdırılıb ki, məsələyə dair parlamentə qanun layihəsi daxil olub və komitə iclasında geniş müzakirə edilib.
Komitə sədri daxil olan qanun layihəsində nikah yaşının bir ildən çox olmayaraq azaldılması halının aradan qaldırılması ilə bağlı dəyişikliyin təklif olunduğunu, yetkinlik yaşına çatmayanla qeyri-rəsmi nikaha daxil olan şəxs və buna şərait yaradan valideynlər barəsində İnzibati Xətalar Məcəlləsində və Cinayət Məcəlləsində məsuliyyətin nəzərdə tutulduğunu deyib. Hicran Hüseynova 2011-ci ildə Milli Məclisin deputatı olarkən Birinci vitse-prezident Mehriban Əliyevanın təşəbbüsü ilə Ailə, həm də Cinayət Məcəlləsinə edilən dəyişikliklərin müsbət nəticələr verdiyini diqqətə çatdırıb. Qanunvericiliyə edilən son dəyişikliklər də ölkəmizdə ailə institutunun gücləndirilməsinə, sağlam ailə modelinin, düzgün ailə münasibətlərinin qurulmasına öz töhfəsini verəcək.
Sonra parlamentin Hüquq siyasəti və dövlət quruculuğu komitəsinin üzvü Əminə Ağazadə Cinayət Məcəlləsinə və İnzibati Xətalar Məcəlləsinə təklif olunan dəyişikliklərin mahiyyəti barədə danışıb. Dinləmədə deputatlar, aidiyyəti qurumların, həmçinin QHT-lərin nümayəndələri və digər rəsmi şəxslər çıxış edərək qohum nikahların fəsadlarından, milli genofonda vurduğu ziyanlardan qanunvericiliyin sərtləşdirilməsinin əhəmiyyətini, bu sahədə həyata keçirilən dövlət siyasəti ilə bağlı fikirlərini bölüşüblər.
Əliqismət BƏDƏLOV
XQ
