Dövlət Təhlükəsizliyi Xidmətinin (DTX) Mədəniyyət Mərkəzində DTX-nin Heydər Əliyev adına Akademiyasının yaranmasının 25 illik yubileyi ilə bağlı təntənəli mərasim keçirilmişdir. Tədbirdə hüquq-mühafizə və digər dövlət orqanlarının rəhbərləri, DTX-nin rəhbər heyəti və əməkdaşları, ali təhsil müəssisələrinin rektorları, millət vəkilləri və təhlükəsizlik orqanlarının veteranları iştirak etmişlər. Bu barədə DTX-nin mətbuat xidməti XQ-yə məlumat vermişdir.

Öncə ümummilli lider Heydər Əliyevin və Azərbaycan Respublika­sının müstəqilliyi və ərazi bütövlüyü uğrunda canlarından keçmiş şəhidləri­mizin əziz xatirəsi birdəqiqəlik sükutla yad olunmuş, Dövlət himni səsləndiril­mişdir. Sonra akademiyanın 25 illiyinə həsr olunmuş videoçarx nümayiş etdi­rilmişdir. 

DTX rəisi, general-polkovnik Əli Nağıyev qonaqları salamlayaraq, aka­demiyanın professor-müəllim heyətini və kursantlarını yubiley münasibətilə təbrik etmişdir. Xidmət rəisi 25 il bun­dan əvvəl - 1998-ci il dekabrın 1-də ulu öndər Heydər Əliyevin müvafiq sərəncamı ilə xüsusi xidmət orqanları üçün ali təhsilli kadrların hazırlanması məqsədilə təhlükəsizlik orqanı akade­miyasının yaradılmasının, eləcə də 25 illik yubileyinin məhz Ümummilli liderin anadan olmasının 100-cü ildönümünə təsadüf etməsinin bu orqanların tarixin­də mühüm hadisə olduğunu vurğula­mışdır. Qeyd etmişdir ki, hazırda təhsil ocağında Heydər Əliyevin peşəkarlıq məktəbinin və vətənpərvərlik irsinin sa­diq davamçıları yetişdirilir. 

Şərəfli ömrünün 25 ilini həsr etdiyi təhlükəsizlik orqanları qarşısında Ulu öndərin əvəzsiz xidmətlərini nəzərə alaraq, Azərbaycan Respublikasının Prezidenti cənab İlham Əliyevin 2005-ci ilin dekabr ayının 20-də imzaladığı fərmanla akademiyaya dahi şəxsiyyət Heydər Əliyevin adının verilməsinin isə təhlükəsizlik orqanlarının tarixinə növ­bəti əlamətdar hadisə kimi daxil oldu­ğunu qeyd edən general-polkovnik Əli Nağıyev bildirmişdir ki, bu gün DTX-nin və akademiyanın şəxsi heyəti öz fəaliy­yətini Ümummilli liderin amalları və ide­yaları üzərində qurmaqdadır.

DTX rəisi Prezident İlham Əliyevin diqqət və qayğısı ilə ötən müddət ərzin­də akademiyanın maddi-texniki baza­sının təkmilləşdirilməsi, təhsilin müasir tələblərə uyğun şəkildə təşkil edilməsi, çağdaş texnoloji yeniliklərin uğurla tət­biqi tədris prosesinin səviyyəsinin yük­səldilməsi yönümündə görülən işlərdən ətraflı danışmış, son illərdə kursantların ölkəmizin aparıcı ali təhsil müəssisələri arasında keçirilmiş müxtəlif bilik yarış­larında ardıcıl olaraq qalib adını qa­zanmasının qürurverici hal olduğunu demişdir.

Daha sonra digər çıxışçılar Azərbay­canda təhsil-tədris sahəsində aparılan islahatlardan, akademiyanın bu strateji sektorun inkişafına verdiyi töhfələrdən bəhs etmiş, professor-müəllim heyə­tinə və kursantlara çətin və şərəfli yolda uğurlar arzulamışlar.

Tədbirin rəsmi hissəsi başa çatdıq­dan sonra qonaqlara mədəniyyət və incəsənət xadimlərinin ifasında bədii proqram təqdim olunmuşdur.

Akademiyanın yaranmasının 25 il­lik yubileyi ilə əlaqədar silsilə tədbirlər dekabrın 2-də “Dövlət Təhlükəsizliyi Xidmətinin Heydər Əliyev adına Akade­miyası Ulu Öndər irsinin daşıyıcısıdır” adlı elmi-praktiki konfransla davam et­mişdir.

Xidmət rəisi qeyd etmişdir ki, əmə­liyyat şəraiti baxımından, həmçinin ki­bertəhlükəsizlik və informasiya təhlükə­sizliyi cəhətdən meydana gələn yeni çağırışlar akademiyada təhsil alan, gələcəklərini təhlükəsizlik orqanları ilə bağlayacaq kursantların öz biliklərini, burada çalışan mütəxəssislərin isə ba­carıq və vərdişlərini dövrün tələblərinə uyğun artırmalarını, tədris proqramla­rının davamlı yenilənməsini vacib edir. Hazırda bu istiqamətdə lazımi tədbirlər görülməkdədir. 

XQ