Azərbaycan parlament nümayəndə heyətinin Ankaraya rəsmi səfəri çərçivəsində Milli Məclisin Sədri Sahibə Qafarova Türkiyə Böyük Millət Məclisinin Sədri Numan Kurtulmuşla görüşüb.
Parlamentin Sədri 2023-cü ilin həm Azərbaycanın, həm də Türkiyənin həyatında tarixi yubileylərlə zəngin olduğunu vurğulayaraq, bu il Azərbaycan xalqının ümummilli lideri, müstəqil Azərbaycan dövlətinin qurucusu, görkəmli siyasi və dövlət xadimi Heydər Əliyevin anadan olmasının 100-cü ildönümünün yüksək səviyyədə qeyd edildiyini, həmçinin Türkiyə Cümhuriyyətinin yaranmasının 100-cü ildönümünün tamam olduğunu bildirib. Onun sözlərinə görə, bu bayram təkcə Türkiyənin deyil, bütün türk dünyasının bayramıdır.
Türkiyənin hər platformada Azərbaycanın yanında olduğunu söyləyən Numan Kurtulmuş Ermənistan-Azərbaycan münaqişəsinin artıq həll olunduğunu, ərazi bütövlüyümüzün təmin edildiyini söyləyib. Hazırda Azərbaycanın haqlı mübarizəsini əngəlləməyə çalışan dövlətlərin və bəzi lobbi dairələrinin olduğunu söyləyən TBMM Sədri ölkəmizin diplomatiya sahəsində də qələbə qazanacağına inamını ifadə edib.
***
Milli Məclisin sədri Sahibə Qafarovanın başçılıq etdiyi parlament nümayəndə heyəti Türkiyə Respublikasının banisi Mustafa Kamal Atatürkün məzarını – Anıtqəbiri ziyarət edib, xatirəsini ehtiramla anıb.
Sahibə Qafarova məzarın önünə əklil qoyub.
Sonra Milli Məclisin sədri xatirə kitabına ürək sözlərini yazıb.
Ə.BƏDƏLOV
XQ