Türkiyənin Qars şəhərində ümummilli lider Heydər Əliyevin 100 illik yubileyinə həsr olunmuş beynəlxalq konfrans keçirilib.

18-19 oktyabr 2023-cü ildə Qars Qafqaz Universiteti, Azərbaycanın Tür­kiyədəki səfirliyi, Qarsdakı Baş Kon­sulluğu, respublikamızın Elm və Təhsil Nazirliyi, Diasporla İş üzrə Dövlət Ko­mitəsi, Elger Elm və Təhsil Mərkəzi, Əskişəhər Azərbaycanlılar dərnəyi, Türkiyə-Azərbaycan Dərnəkləri Fede­rasiyası, İğdır Azərbaycan evinin təşki­latçılığı ilə keçirilən “Heydər Əliyev və Türkiyə” adlı multidisiplinar beynəlxalq elmi konfransa 12 ölkədən 100-dən çox elm adamı qatılmışdı.

Dövlət müstəqilliyimizin 32-ci ildö­nümünə təsadüf edən tədbir Azərbay­can və Türkiyənin dövlət himnlərinin səsləndirilməsi ilə başladı.

Qars Qafqaz Universitetinin rektoru, professor-doktor Hüsnü Kapu və Azər­baycanın Qarsdakı baş konsulu Nuru Quliyevin giriş nitqləri ilə başlanan kon­fransın plenar iclasında tədbirin təşkilat komitəsinin sədri, dosent İlkin Qulusoy, Azərbaycanın Türkiyədəki səfirliyinin təhsil üzrə müşaviri Nəcibə Nəsibova, Elm və Təhsil Nazirliyinin təmsilçisi Müjdat Həsənov, Əskişəhər Azərbay­canlıları Dərnəyinin sədri Cavid Aydın çıxış etdilər.

Azərbaycan ali təhsil müəssisələ­ri adından Bakı Dövlət Universitetinin, Azərbaycan Dövlət İqtisad Universite­tinin, Azərbaycan Dillər Universitetinin, Azərbaycan Dövlət Neft və Sənaye Universitetinin prorektorlarının təbrik nitqləri dinlənildi.

Konfransın plenar iclasında pro­fessor Toğrul İsmayıl, professor Yusuf Bayraktar və dosent Elman Cəfər­li mövzu ilə bağlı məruzələrində Ulu öndərin azərbaycançılıq məfkurəsi və dövlətçilik irsi geniş təhlil olundu.

Üç bölmədə işini davam edən kon­fransda ümummilli lider Heydər Əliye­vin dövlətçilik, elm, təhsil, mədəniyyət, ordu quruculuğu, gənclər siyasəti, mul­tikulturalizm və digər sahələrdə həyata keçirdiyi islahatlarından bəhs olundu, foto və video təqdimatlar edildi.

Naxçıvan Dövlət Universitetinin dosenti, filologiya üzrə fəlsəfə doktoru Surə Seyidin "Heydər Əliyev və Şərq qapısı" qəzeti, Azərbaycan Dövlət İd­man Akademiyasının baş müəllimi, pedaqogika üzrə fəlsəfə doktoru Müj­kan Məmmədzadənin "Heydər Əliyev və hərbi təhsil siyasəti" mövzusunda­kı elmi məruzələri də maraqla qarşı­landı.

Məruzələrdən sonra konsert proq­ramı nümayiş olundu, Azərbaycan xalq musiqilərindən seçmələr səsləndirildi.

Konfrans çərçivəsində qonaqlar Qars Qafqaz Universitetində qurulan Heydər Əliyev Mərkəzini ziyarət edib, mərkəzin fəaliyyəti ilə tanış olublar.

Tədbirdən sonra Azərbaycanın Karsdakı Baş Konsulluğunun təşkilat­çılığı ilə konfrans iştirakçılarına ziyafət təşkil edildi, Qars Qafqas Universitetin­də fəaliyyət göstərən Azərbaycan rəqs qrupunun konsert proqramı nümayiş olundu. Qonaqlar Heydər Əliyevin 100 illik yubiley plaketi və diplomlar təqdim edildi.

Onu da əlavə edək ki, ümummilli lider Heydər Əliyevin Qarsa səfəri za­manı onun təşəbbüsü ilə Qars Qafqaz Universitetində Azərbaycan türkcəsi və ədəbiyyatı ixtisası yaradılıb. 18 ildir fəa­liyyət göstərən bu ixtisasın bakalavriat pilləsi üzrə bugünədək yüzlərlə məzunu olmuşdur. 2014-cü ildən ixtisas magist­ratura pilləsi üzrə də kadr hazırlığı işi həyata keçirməkdədir.

Surə SEYİD 
Naxçıvan