Erməni silahlı birləşmələrinin üzvləri tərəfindən Azərbaycan Silahlı Qüvvələrinin əsirlikdə olan hərbi qulluqçuları, mülki və digər şəxslərə qarşı ağır cinayətlər törədilməsi faktları üzrə başlanmış cinayət işinin istintaqı davam etdirilir.

Azərbaycan Respublikasının Pro­kurorluq orqanları tərəfindən başlan­mış cinayət işinin istintaqı ilə müəyyən edilib ki, 2013-2023-cü illərdə separatçı qurumun “prezident aparatının rəhbəri­nin müavini, prezidentin xarici siyasət məsələləri üzrə köməkçisi, xarici işlər naziri və xüsusi tapşırıqlar üzrə prezi­dentin köməkçisi vəzifələrində” işləmiş, 1973-cü il tarixdə Xankəndi şəhərində anadan olmuş Babayan Davit Klimoviç həm 44 günlük Vətən müharibəsi döv­ründə, həm Azərbaycan Respublikası­nın ərazi bütövlüyünün bərpa olunması, əhalinin təhlükəsizliyinin təmin olunma­sı məqsədilə aparılan antiterror tədbir­lərində qondarma qurumun digər “rəh­bər vəzifəli şəxsləri” ilə cinayətkar birlik halında milli düşmənçilik və nifrət aşı­layan, terrorçu qruplaşmaların fəaliyyə­tini əlaqələndirməklə məşğul olması, o cümlədən, 2020-ci il oktyabrın 17-də, Gəncə şəhərinin müdafiə olunmayan və mülki əhalinin yaşadığı əraziləri, yaşayış məntəqələri və silahsızlaşdı­rılmış zonaları hədəfə almaqla, ballistik raketlərdən istifadə edib çoxsaylı mülki şəxslərin ümumi təhlükəli üsulla, xüsu­si amansızlıqla, terrorçuluqla əlaqədar, milli ədavət və düşmənçilik zəminində qəsdən öldürülməsi və yaralanması ilə bağlı cinayətləri təşkil etməsinə əsaslı şübhələr müəyyən edilib.

Davit Babayan 2020-ci il oktyabrın 28-də Azərbaycan Respublikası Ci­nayət Məcəlləsinin 100.1, 100.2 (tə­cavüzkar müharibəni planlaşdırma, hazırlama, başlama və aparma), 32.3, 114.1 (muzdlular yığma, onlara təlim keçmə, maliyyələşdirmə və başqa cür maddi təminat vermə, habelə onlardan hərbi münaqişədə və hərbi əməliyyat­larda istifadə etməni təşkil etmə), 32.3, 116.0.1, 32.3, 116.0.6, 32.3, 116.0.7, 32.3, 116.0.8, 32.3, 116.0.9, 32.3, 116.0.10 (silahlı münaqişə zamanı beynəlxalq humanitar hüquq normala­rını pozma), 117.2-ci (silahlı münaqişə zamanı hərəkətsizlik etmə və ya ci­nayətkar əmr vermə), 32.3,214.2.1, 32.3,214.2.3, 32.3,214.2.4 (terrorçu­luğu təşkil etmə), 283.2.1, 283.2.3-cü (milli düşmənçiliyin salınmasını təşkil etmə) və digər maddələri ilə təqsirləndi­rilən şəxs qismində cəlb edilib, barəsin­də məhkəmənin qərarı əsasında həbs qətimkan tədbiri seçilərək beynəlxalq axtarışa verilib.

Sentyabrın 29-da D.Babayan Azər­baycanın hüquq-mühafizə orqanları tərəfindən saxlanılaraq istintaqa təqdim olunub və ona həmin tarixdə qeyd olu­nan maddələr üzrə ittiham elan edilib.

Bundan başqa, istintaqla 1965-ci ildə Azərbaycanın Xocavənd rayonun­da anadan olmaqla orada yaşamış, Ermənistanın sabiq hərbi qulluqçusu, 2015-2018-ci illərdə qondarma rejimin “müdafiə naziri” vəzifəsində işləmiş, eləcə də Azərbaycan ərazisində fəa­liyyət göstərmiş qanunsuz hərbi silahlı qrupun üzvü olan Mnatsakanyan Lyo­va Henrixi qabaqcadan əlbir olduğu şəxslərlə birgə 2002-ci il mayın 8-də beynəlxalq humanitar hüquqla müdafiə olunan Məmmədov İlham Yusif oğlunu və digər əsir düşmüş azərbaycanlıları Füzuli rayonunun Alxanlı kəndi ərazi­sində əsir götürərək Füzuli şəhərində yerləşən hərbi hissədə milli ədavət zə­minində çoxsaylı işgəncələr verdiyi və həmin il noyabrın 19-dək onu əsirlikdə saxlamalarına əsaslı şübhələr müəy­yən edilib.

Lyova Mnatsakanyanın 2006-cı il noyabrın 8-də Azərbaycan Respublika­sı Cinayət Məcəlləsinin 113-cü (işgən­cə) maddəsi ilə təqsirləndirilən şəxs qismində cəlb edilməsi barədə qərar qəbul edilib və həmin il noyabrın 14-də müvafiq məhkəmənin qərarı ilə barə­sində həbs qətimkan tədbiri seçilməklə İnterpolun Milli Mərkəzi Bürosu vasitə­silə beynəlxalq axtarışa verilib.

Cari il sentyabrın 29-da L.Mnat­sakanyan Laçın sərhəd-buraxılış məntəqəsindən Ermənistana keçmək istəyərkən saxlanılaraq istintaqa təq­dim olunub və həmin tarixdə ona qeyd olunan maddə ilə ittiham elan edilib.

Hər iki şəxs barəsində həbs qə­timkan tədbirinin seçilməsinə dair məhkəmə qərarı icra olunaraq Dövlət Təhlükəsizliyi Xidmətinin istintaq təcridxanasına etap olunub.

Hazırda cinayət işləri üzrə zəruri və təxirəsalınmaz istintaq-əməliyyat təd­birləri davam etdirilir.

XQ