Dünən ümummilli lider Heydər Əliyevin anadan olmasının 100 illik yubileyinə həsr olunmuş “Əziz Şuşa” beynəlxalq velosiped yarışı ilə bağlı mətbuat konfransı keçirilib.
Tədbirdə “Əziz Şuşa” beynəlxalq velosiped yarışının direktoru Ronald Hofer, yarışın marşrut üzrə direktoru Elçin Qəhrəmanov, Gənclər və İdman Nazirliyinin baş məsləhətçisi Ülviyyə Hacıyeva, Azərbaycan Velosiped Federasiyasının baş katibi Elnarə Musayeva, yarısın təhlükəsizlik üzrə meneceri, Azərbaycan Velosiped Federasiyasının İcraiyyə Komitəsinin üzvü Vüqar Salahov iştirak ediblər.
Azərbaycan Velosiped Federasiyasının baş katibi Elnarə Musayeva “Əziz Şuşa” beynəlxalq velosiped yarışının Beynəlxalq Velosipedçilər İttifaqının müəyyənləşdirdiyi təqvim planına daxil edilən 2.2 kateqoriyalı 5 mərhələli turnir olduğunu bildirərək deyib ki, 14 ölkədən 16 komanda iştirak edəcək. Onlar artıq Bakıdadır.
Yarışın direktoru Ronald Hofer turnirin böyük tədbir olduğunu qeyd edərək, yüksək təşkilatçılığa görə Azərbaycan Velosiped Federasiyasına təşəkkürünü bildirib.
Xatırladırıq ki, “Əziz Şuşa” beynəlxalq velosiped yarışı iyunun 7-dən 11-dək keçiriləcək.
“Xalq qəzeti”