Məlum olduğu kimi, aprelin 4-də ABŞ-ın sabiq prezidenti Donald Tramp məhkəmə qarşısına çıxıb. Birləşmiş Ştatlarda 2024-cü ildə keçiriləcək prezident seçkilərində namizədliyini irəli sürmək üzrə olan siyasətçi 17 illik romantik eşq macərası barədə susması müqabilində porno aktrisa Stormi Danielsə ödənişlərini gizlətmək üçün maliyyə sənədlərini saxtalaşdırmaqda ittiham olunub.
Qeyd edək ki, cinayət işinin başlanmasına səbəb olan qalmaqaldan ictimaiyyət hələ 2018-ci ildə xəbər tutmuşdu. Keçmiş porno aktrisa, hazırda “paranormal araşdırmalar” haqqında televiziya şousunun aparıcısı Stormi Daniels (əsl adı - Stefani Klifford) jurnalistlərə 2006-cı ilin iyulunda Donald Trump ilə yatdığını söyləmişdi.
İttiham öz yerində. Onun doğruluğuna inanan çox az adam tapılar. Hətta, Trampın aktrisa ilə gizli eşq macarasının mövcudluğuna inananlar olsa belə, sabiq prezidentin həbs təhlükəsinin başqa səbəblərə görə gündəmə gəldiyini vurğulayanlar daha çoxdur. Yəni, Tramp dilinə dinclik vermirdi. Hazırkı ABŞ Administrasiyasını, o cümlədən Prezident Co Baydeni sərt tənqid edirdi.
Amma səbəb yalnız bu da olmaya bilər. Ümumən, Tramp xarakter baxımından xeyli dərəcədə qeyri-ordinar adamdır. İpə-sapa yatmayandır. Vaxtilə onun davranışlarına nəzərən avantüristin prezident kreslosunu zəbt etdiyini deyənlər var idi. Belə bir rəy heç də əbəs deyildi. Çünki sabiq prezident bütün qayda və etiketləri pozurdu. Onun Birləşmiş Ştatların dərin dövlətinin konsepsiyasına zidd hərəkətlər etdiyini vurğulayanlar çoxdur. Bu mənada irəli sürülmüş ittiham o qədər də böyük sayılmamalıdır. Hərçənd əgər, sübuta yetirilsə, Trampa, nə az nə də çox, düz 136 il həbs cəzası düşür.
Hazırda Tramp ABŞ tarixində cinayət işi açılan ilk keçmiş prezidentdir. Siyasətçi israr edir ki, qanunsuz heç nə etməyib və siyasi təqibin qurbanıdır. Özünü “ABŞ tarixinin ən günahsız insanı” sayan sabiq dövlət başçısı yalnız qurbandırmı? Tam mümkündür ki, Tramp səs-küylü məhkəmə prosesini öz xeyrinə çevirsin. Üstəlik, keçmiş prezidentin cinayət təqibinin ABŞ üçün siyasi böhrana çevrilmə riski də aktualdır.
Məsələ burasındadır ki, Trampa qarşı məhkəmə prosesinin keçirildiyi binanın önünə yüzlərlə insan toplaşmışdı. Onların sırasında həm keçmiş prezidentin tərəfdarları, həm də əleyhdarları var idi. Buradakı mitinq irimiqyaslı iğtişaşlara çevrilməsə də, hər kəsdə təəssürat var idi ki, siyasətçiyə qarşı həyata keçirilənlər absurddur. Yeri gəlmişkən, ABŞ mediası da bu absurdizmin müxtəlif tərəflərinə kifayət qədər geniş yer verməkdədir.
İctimai rəy sorğularına əsasən, Donald Tramp ABŞ-ın Respublikaçılar Partiyası daxilindəki əsas rəqibi, Florida ştatının qubernatoru Ron DeSantisi xeyli geridə qoyur. Aprelin 1-də iki namizəd arasında fərq 26 faiz təşkil edirdi.
Görünür, hazırda Trampın gələcək uğuru, digər məsələlərlə yanaşı, onun cinayət işi ətrafında ajiotajı saxlaya bilib-bilməməsindən də asılıdır. Bu baxımdan bəzi siyasi ekspertlər Donald Trampın vəkillərinin məhkəmə prosesini prezident seçkilərinə qədər uzatmağa çalışacaqlarını vurğulayırlar. Maraqlıdır ki, bununla bağlı ajiotaj onun yüksək vəzifəyə seçilməsinə maneə olmayacaq, əksinə, sabiq dövlət başçısına ciddi dividend qazandıracaq.
Trampın təmsil etdiyi Respublikaçılar Partiyasında isə qorxurlar ki, uzunmüddətli perspektivdə sabiq prezidentə qarşı cinayət işi Amerikanın siyasi sistemi üçün ciddi nəticələr verə bilər. Bu, mənfi presedent yaradar və digər keçmiş dövlət başçıları və siyasətçilər də cinayət təqibi ilə üzləşərlər.
Ümumən, beynəlxalq siyasi dairələrdə D.Trampın söz azadlığının qurbanı olduğunu da bildirənlər yetərincədir. Yuxarıda vurğuladığımız kimi, sabiq prezident xaraktercə çılğındır və ilk baxışdan qoyulan bütün tabuları pozmağa meyilli kimi görünürdü. Çıxışları və səsləndirdiyi bəyanatlar, ayrı-ayrı hadisə və proseslərə yanaşma tərzi də bundan xəbər verməkdədir.
R.AMİN