Bu il mart ayının 31-nə Dövlət Neft Fondunun (DNF) vəsaitləri 2024-cü ilin əvvəlinə (56 milyard 70 milyon ABŞ dolları) nisbətən 2,3 faiz artaraq 57 milyard 373 milyon ABŞ dolları təşkil edib.
DNF-nin bu barədə məlumatında daha sonra bildirilir ki, cari ilin yanvar–mart ayları ərzində qurumun büdcə gəlirləri 5 milyard 268 milyon manat, büdcə xərcləri isə 3 milyard 205 milyon manat təşkil edib.
Bu ilin ilk rübü ərzində DNF-in neft və qaz sazişlərinin həyata keçirilməsi ilə bağlı gəlirləri 3 milyard 421 milyon manat, o cümlədən mənfəət neftinin və qazın satışından 2 milyard 646 milyon manat, bonus ödənişləri 776 milyon manat, tranzit gəlirləri 0,3 min manat olub. Fondun vəsaitlərinin idarə olunmasından əldə edilən gəlir isə 1milyard 847 milyon manat təşkil edib.
Hesabat dövrü ərzində DNF-in 2024-cü il büdcəsinin icrası çərçivəsində 3 milyard 195 milyon manat vəsait dövlət büdcəsinə transfert edilib. 2024-cü ilin yanvar–mart aylarında “2019–2023-cü illər üçün Azərbaycan Respublikasında ali təhsil sisteminin beynəlxalq rəqabətliliyinin artırılması üzrə Dövlət Proqramı”nın maliyyələşməsinə 1 milyon manat, “Gənclərin xarici ölkələrin nüfuzlu ali təhsil müəssisələrində təhsil almalarına dair 2022–2026-cı illər üçün Dövlət Proqramı”nın maliyyələşməsinə isə 3,2 milyon manat yönəldilib. Sözügedən dövrdə DNF-in idarə edilməsi ilə bağlı xərcləri 5,9 milyon manat təşkil edib.
Valyuta məzənnələrinin dəyişməsindən yaranan fərq ilə bağlı DNF-in büdcədənkənar gəliri hesabat dövrü üzrə 151,7 milyon manat olub.
XQ
