Azərbaycanda 2004-cü ildən indiyədək uğurla reallaşdırılan regionların sosial-iqtisadi inkişafı dövlət proqramları rayonların iqtisadi potensialı­nın artmasına, infrastruktur təminatının, kommunal xidmətlərin keyfiy­yətinin daha da yüksəlməsinə, biznes və investisiya mühitinin, əhalinin rifahının yaxşılaşmasına müsbət təsir göstərib, bununla da ölkəmizin strateji inkişaf hədəflərinə nail olunmasına əhəmiyyətli töhfə verib. 

Regional proqramların uğurla ic­rası dövründə kənd və qəsəbələrin, şəhərlərin siması köklü şəkildə dəyişib, əhalinin paytaxta axını səngiyərək əks proses başlayıb, rayonlarda işləməyə və yaşamağa üstünlük verənlərin sayı getdikcə artıb.

Sonuncu “Azərbaycan Respublika­sı regionlarının 2019–2023-cü illərdə sosial-iqtisadi inkişafı Dövlət Proqramı” çərçivəsində həyata keçirilən layihələr nəticəsində yüksək göstəricilər əldə edilib. Regionlarda infrastruktur tədbir­lərinin icrası, o cümlədən yol-nəqliyyat, elektrik, qaz və su təchizatı sistemlərinin yenilənməsi işləri uğurla davam etdirilib. 

Ümumiyyətlə, regionların sürət­li tərəqqisi respublikada reallaşdırılan davamlı sosial-iqtisadi inkişaf strate­giyasının mühüm tərkib hissəsidir. Bu istiqamətdə qəbul edilən və yüksək səviyyədə gerçəkləşdirilən dövlət proq­ramlarında, habelə regionların sosial-iq­tisadi inkişafına dair əlavə tədbirlərlə bağlı sərəncamlarda nəzərdə tutulan vəzifələrin həyata keçirilməsi respubli­kada qeyri-neft sektorunun davamlı in­kişafına, yerlərdə kommunal xidmətlərin və sosial infrastruktur təminatının key­fiyyətinin yüksəldilməsinə, sahibkarlıq mühitinin daha da yaxşılaşdırılmasına, investisiya qoyuluşunun artmasına, yeni müəssisələrin, iş yerlərinin açılmasına, nəticədə isə əhalinin məşğulluğunun artırılmasına və yoxsulluq səviyyəsinin azaldılmasına təkan verib. 

Prezident İlham Əliyevin aprelin 9-da Hacıqabul rayonu, Gəncə və Qəbələ şəhərlərinə səfəri bir daha göstərdi ki, əvvəllər olduğu kimi, sonuncu (2019–2023-cü illər) regional proqramda da nəzərdə tutulan tədbirlərin uğurla hə­yata keçirilməsi Azərbaycanın yuxarıda adları çəkilən rayonlarının hər birinin malik olduğu özünəməxsus təbii, mad­di əmək resurslarından, coğrafi, nəq­liyyat-kommunikasiya imkanlarından səmərəli istifadə edilməsi, yoxsulluğun səviyyəsinin aşağı salınması, məşğulluq problemlərinin həlli üçün kifayət qədər əlverişli zəmin yaradıb. Sənəddə sosi­al, infrastruktur, aqrar sahələrin inkişafı ilə bağlı tədbirlər, yeni iş yerlərinin ya­radılması ilə əlaqədar layihələr xüsusilə diqqətdə saxlanılıb. Nəticədə respubli­kanın ərzaq təhlükəsizliyinin təmin edil­məsi, əhalinin sosial şəraitinin daha da yaxşılaşdırılması istiqamətində mühüm irəliləyiş əldə olunub. 

Prezident İlham Əliyev Hacıqabul ra­yonunda vətəndaşların rahat gediş-gəli­şini təmin etmək məqsədilə əsaslı şəkil­də yenidən qurulan uzunluğu 39 kilometr olan iki hərəkət zolaqlı Muğan-Birinci Paşalı-İkinci Paşalı-Şorbaçı-Birinci Udul­lu-Tağılı-İkinci Udullu-Qubalı avtomobil yolunun açılışında iştirak edib. Bu yolun istifadəyə verilməsi ilə 12 mindən çox əhalinin rahat gediş-gəlişi təmin olunub, yük və sərnişin daşınması asanlaşıb.

Dövlətimizin başçısı Hacıqabul ra­yonunda isə “Agro Dairy” MMC-yə məxsus 4200 hektar torpaq sahəsinə Kür çayından nasos stansiyası vasitə­silə suvarma suyunun çatdırılması üzrə suvarma qurğuları kompleksi ilə tanış olub. Qeyd edək ki, Azərbaycan Prezi­denti əkin sahələrinin suvarma suyu ilə təminatının yaxşılaşdırılması, habelə əkin dövriyyəsinə əlavə torpaqların cəlb olunması işlərinin davam etdirilməsi və bu istiqamətdə yeni layihələrin hazırlan­ması məqsədilə 2021-ci il mayın 29-da Sərəncam imzalayıb. Sərəncama uy­ğun olaraq Hacıqabul rayonu ərazisində “Agro Dairy” MMC-yə məxsus torpaq sahəsini suvarma suyu ilə təmin etmək üçün Kür çayının Sabirabad rayonun­dan keçən hissəsində sərfi saniyədə 3 kubmetr olan 4 aqreqatlı üzən nasos stansiyasının, boru kəmərinin və də­mir-beton kanalının tikintisinə başlanılıb.

Prezident İlham Əliyev səfər çərçivə­sində Gəncə şəhərində də olub və bura­da Ekoloji Park Kompleksinin tikintisi ilə tanış olub. Dövlət başçısına Qərb bölgə­sində ilk dəfə Gəncə şəhərində salınan Ekoloji Park Kompleksinin tikintisinə və onun ətrafında abadlıq işlərinə 2021-ci ilin dekabrında başlanıldığı, Gəncəçayın sağ sahilində yerləşən və son tamamla­ma işləri həyata keçirilən kompleksin 11 hektar ərazini əhatə etdiyi barədə ətraflı məlumat verilib.

Dövlətimizin başçısının Gəncə səfə­ri çərçivəsində açılışında iştirak etdiyi şəhər idman sarayı ölkə rəhbərinin mü­vafiq sərəncamına əsasən inşa edilib, ti­kintisinə isə 2018-ci ilin iyununda başla­nılıb. Yüksək keyfiyyətlə aparılan tikinti işləri bu ilin martında tam başa çatdırılıb.

Belə nəhəng idman qurğusunun yaradılması Azərbaycanın idman ölkə­si kimi nüfuzunu yüksəltməklə yanaşı, regionlarda yaşayan gənclərin idmana həvəsinin artırılması, onların potensialı­nın üzə çıxarılması və ümumilikdə idma­nın kütləviliyinin təmin edilməsi baxımın­dan mühüm əhəmiyyət daşıyır.

Yeri gəlmişkən, həmin gün Gən­cə şəhər stadionunun təməlini qoyub. Bununla bağlı dövlətimizin başçısına stadionda yaradılacaq şərait barədə məlumat verilərək 1959-1963-cü illərdə inşa edilən Gəncə şəhər stadionunun 1964-cü ildə istismara verildiyi, son illər­də bu idman infrastrukturunda tamaşaçı tribunalarının yararsız vəziyyətə düş­düyündən və texniki cəhətdən istismarı mümkün olmadığından ərazidə köməkçi məşq meydançaları və futbol akademi­yası binası tikildiyi bildirilib. 

Prezident İlham Əliyevin 2023-cü il 6 oktyabr tarixli Sərəncamına əsasən, Gəncə şəhər stadionunun yenidən qu­rulması işlərinin layihələndirilməsi və həyata keçirilməsi üçün Prezidentin eh­tiyat fondundan ilkin olaraq bir milyon manat ayrılıb. Stadionun layihələndirmə işləri artıq başa çatdırılıb. Qeyd edildiyi kimi, aprelin 9-da isə ölkə rəhbəri tərə­findən stadionun təməli qoyulub. 

Dövlətimizin başçısı Qəbələyə səfəri zamanı “Hacıalılı” elektrik yarımstan­siyası və Regional Təlim Mərkəzinin, Rayon Mərkəzi Xəstəxanasının, Bum qəsəbəsində tam orta məktəbin yeni bi­nasının istifadəyə verilməsində və Bö­yük Pirəli-Kiçik Pirəli-Xırxatala-Cığatel­li-Həmzəli avtomobil yolunun açılışında iştirak edib.

Qəbələdə istifadəyə verilən mü­hüm sosial əhəmiyyətli obyektin–isteh­lakçıların elektrik enerjisi təchizatının keyfiyyətinin yüksəldilməsi məqsədilə yenidən tikilən 110/35/10 kV-luq 26 meqavat-amperlik “Hacıalılı” yarıms­tansiyasının gücü 41 MVA-ya çatdırılıb. Rayon Mərkəzi Xəstəxanasının istifa­dəyə verilməsi ilə Qəbələdə vətəndaş­ların hərtərəfli tibbi xidmətlə təmin edil­məsi, onların müalicə və müayinə işinin yüksək səviyyədə təşkili daha da yaxşı­laşdırılıb. 17 minə yaxın əhalinin yaşa­dığı 15 yaşayış məntəqəsini birləşdirən Böyük Pirəli-Kiçik Pirəli-Xırxatala-Cığa­telli-Həmzəli avtomobil yolunun işə sa­lınması isə rayon mərkəzi ilə nəqliyyat əlaqəsinin yaxşılaşdırılmasını, həmçinin bu bölgədə turizmin və kənd təsərrüfatı­nın inkişafını, eləcə də insanların həyat tərzinin yüksəlməsini şərtləndirib. Bum qəsəbəsində tam orta məktəbin yeni bi­nası istifadəyə verilməsi isə dövlətimizin prioritetləri sırasında müasir məktəblərin qurulmasının və təhsil müəssisələrinin əsaslı təmirinin bariz ifadəsinə çevrilib. 

Prezident İlham Əliyevin Hacıqabul rayonu, Gəncə və Qəbələ şəhərlərində olması bir daha göstərir ki, dövlətimizin başçısı işğaldan azad olunmuş ərazilə­rin bərpa və yenidən qurulmasının pri­oritet elan etməsinə baxmayaraq, res­publikamızın digər şəhər və rayonlarının inkişafını da diqqətdə saxlayır. Bunu belə bir fakt da təsdiqləyir: ölkə rəhbəri 2021-ci ildə 17, 2022-ci ildə 14, 2023-cü ildə 11, bu ilin ötən dövründə isə 5 rayonda 47 səfərdə olub. Ümumilikdə, Prezident İlham Əliyev işğaldan azad olunan ərazilər də daxil olmaqla, 2021-ci ildən indiyədək bölgələrə 140-a yaxın səfər edib. Bu, Azərbaycan Prezidenti­nin bölgələrin inkişafına diqqət və qayğı­sının parlaq ifadəsidir. 

İlqar HƏSƏNOV,
Vaqif BAYRAMOV
XQ