Son illər ölkə iqtisadiyyatının şaxələndirilməsi istiqamətində həyata keçirilən tədbirlər qeyri-neft sektorunun inkişafını xeyli sürətləndirib. Bunun da nəti­cəsində ümumi daxili məhsulda, eləcə də ixracda sözügedən sahənin xüsusi çəkisi getdikcə artır. Hazırda Azərbaycanda qeyri-neft sektorunun prioritet sahələrindən olan turizmin inkişafına da xüsusi önəm verilir. Bu da təsadüfi deyil. Çünki ölkəmiz yüksək turizm potensialına görə daha çox diqqət çəkir. Elə bu səbəbdən də gəzinti və istirahət üçün Azərbaycanı seçən əcnəbi turistlərin sayı ildən-ilə artır. 

Ölkəmizə gələn turistlər isə paytaxt Bakı ilə yanaşı, gözəl təbiəti, tarixi-me­marlıq abidələri və müasir infrastrukturu olan regionlarımıza da səfər edirlər. Azər­baycanın zəngin turizm potensialını aqrar sahə ilə əlaqələndirmək məqsədilə həya­ta keçirilən tədbirlər rayon və kəndlərimi­zin turizm potensialının üzə çıxarılması üçün yeni imkanlar yaradır. Bu mühüm amili nəzərə alan Kənd Təsərrüfatı Nazir­liyi artıq bir neçə ildir ki, tərəfdaş qurum­larla birgə “Şəhərdən kəndə” adlı aqrar turizm layihəsini həyata keçirir. 

Nazirliyin tabeliyində olan “Aqrar Tə­darük və Təchizat” Açıq Səhmdar Cəmiy­yəti tərəfindən həyata keçirilən bu layihə ölkəmizdə aqroturizmin inkişaf etdirilməsi və təsərrüfat sahibləri üçün əlavə gəlir imkanlarının yaradılmasına xidmət edir. Məlumat üçün bildirirk ki, sözügedən la­yihənin məqsədi ölkəmizdə aqroturizmin inkişaf etdirilməsi, regionlarda yaşayan əhalinin məşğulluğunun artırılması, yerli fermer təsərrüfatları üçün alternativ satış kanalı, eləcə də şəhər sakinləri və xari­ci turistlər üçün fərqli turizm imkanlarının yaradılmasıdır. 

“Şəhərdən kəndə” layihəsinin uğurları ildən-ilə artır. Bu baxımdan 2023-cü ildə də layihə çərçivəsində yaddaqalan tədbir­lər həyata keçirilib, bölgələrdə aqroturiz­min inkişafı istiqamətində bir sıra uğurlara imza atılıb. Kənd Təsərrüfatı Nazirliyinin məlumatına görə, il ərzində Şabran, Qu­sar, Göygöl, Şamaxı, İsmayıllı, Qəbələ, Oğuz, Qax, Zaqatala və Balakən rayon­larında, ümumilikdə, 33 təsərrüfatın qiy­mətləndirilməsi həyata keçirilib. Bununla yanaşı, İsmayıllı, Zaqatala, Göygöl, Şa­maxı, Oğuz, Qax, Lənkəran və Astara ra­yonları üzrə 9 aqroturizm təsərrüfatında abadlaşdırma işləri yekunlaşdırılıb.

Yeri gəlmişkən, “Şəhərdən kəndə” adlı aqroturizm layihəsi fermerlər üçün istehsal etdikləri məhsulları nümayiş et­dirmək baxımından əla fürsətdir. Belə ki, layihəyə qoşulan fermer və təsərrüfat sa­hibləri istehsal etdikləri kompot, mürəbbə, turşu, arıçılıq məhsulları, quru meyvələr və digər təbii, orqanik məhsulları böl­gələrdə təşkil edilən stendlərdə nümayiş etdirməklə onların dequstasiyası və sa­tışını həyata keçirmək imkanı qazanırlar. 

Eyni zamanda, layihə ölkəmizdə aqroturizmin inkişafı, regionlarda yaşa­yan əhalinin məşğulluğunun artırılması, yerli fermer təsərrüfatları üçün alternativ satış kanalı, eləcə də şəhər sakinləri və xarici turistlər üçün fərqli turizm imkanları­nın yaradılması baxımından önəmli tədbir kimi diqqət çəkir. Bunun nəticəsidir ki, la­yihəyə qoşulmaq istəyən fermerlərin sayı ildən-ilə artır.

Xatırladaq ki, layihədə iştirak üçün əsas meyar fəaliyyətlərində aqrar sahə­nin mövcudluğu, əraziyə qədər yolun rahatlığı, turistlər üçün istirahət imkan­larının müxtəlifliyi və təsərrüfat sahibinin turistlərlə rəftar baxımından malik olduğu şəxsi keyfiyyətləri nəzərə alınır. Eyni za­manda, əvvəl dəstək göstərilən “Lakesi­de Garden”, “Tofiqoğlu bal”, “Bio Garden”, “Bal Evi”, “EKO Zaqatala”, “Hope lake”, “Sitrus vadisi”, həmçinin Quba rayonunun Qımılqazma kəndində yerləşən təsərrü­fatlarda təmirdən sonra monitorinqlər ke­çirilib. Monitorinqin nəticələrindən məlum olub ki, ötən il 2019-cu illə müqayisədə aqroturizm istiqamətində regionlara turist axını 5 dəfə artıb. Layihənin icrasına baş­lanıldığı ötən müddətdə isə təsərrüfatlara səfər edən turistlərin ümumi sayı 230 min nəfərə çatıb. 

2023-cü ildə dəstək göstərilən təsər­rüfatlar üzrə turistlər üçün 8 aqrotur ya­radılıb, aqroturların satış şəbəkəsinin genişləndirilməsi məqsədilə 53 turizm şirkətinin nümayəndələri üçün infoturlar təşkil edilib. İl ərzində, həmçinin təsərrü­fat sahiblərinin “Şəhərdən kəndə” layihəsi barədə məlumatlılığını artırmaq məqsə­dilə ölkənin şimal-qərb, qərb, cənub və aran regionlarında təqdimatlar keçirilib. Bundan əlavə, Göygöl, Şamaxı, İsmayıllı, Qəbələ, Oğuz, Qax və Zaqatala rayon­larından olan 105 təsərrüfat sahibi aqro­turizmlə bağlı keçirilən müxtəlif təlimlərə cəlb edilib. Aqroturizm təsərrüfatlarının tanıdılması məqsədilə fermerlərə media və marketinq dəstəkləri göstərilib, təsər­rüfat sahələrində çəkilişlər aparılıb, medi­atur və müsabiqələr təşkil edilib.

Ümumilikdə isə, ötən il layihə çərçi­vəsində 175 təsərrüfatdan 221 fermerə aqroturizmlə bağlı müxtəlif mövzularda təlimlər keçirilib. Təsərrüfat sahəsinin in­kişaf etdirilməsi və turistlər üçün xidmət səviyyəsinin artırılması məqsədilə 22 təsərrüfatda abadlaşdırma işləri görülüb, müxtəlif avadanlıqlarla təmin edilib.

Mirbağır YAQUBZADƏ
XQ